Искусство гимназияын медводдзаысь аддзысигӧн тайӧ велӧдысьыс меным кажитчис стрӧгӧн. Бӧрынджык нин ме гӧгӧрвои – сійӧ вӧлӧма зэв шань да ыджыд сьӧлӧма…
Менам ӧні на син водзын сійӧ луныс, кор велӧдысь пырис классӧ да меліа нюмъёвтіс, да эскӧдіс, мый миян пиысь быдӧн вермас бура велӧдчыны. Сідзи и лоис.
Тайӧ велӧдысьыс юксьӧ миянкӧд тӧдӧмлуннас сідзи, мый ставным кывзам сійӧс вом паськӧдӧмӧн.
Сійӧ некор оз дӧзмы, мыйкӧ кӧ эг гӧгӧрвоӧй, да нӧшта ӧтчыд висьталас. И век дась кольччыны урокъяс бӧрын да вочавидзны миян став юалӧм вылӧ.
Сійӧ велӧдӧ мӧвпавны да кутчысьны асланым нырвизьӧ, туйдӧ век зільны да пуктыны став выннымӧс, медым воӧдчыны ас водзӧ сувтӧдӧм могӧдз.
Велӧдысь ышӧдӧ миянӧс радейтны лыддьысьны, кыпӧдӧ ловнымӧс, вӧрзьӧдӧ сьӧлӧмнымӧс.
Медым нимкодьӧдны велӧдысьӧс, мукӧддырйи ме дасьтыся урок кежлӧ дырджык, и менсьым зільӧмӧс сійӧ пыр казялӧ, ошкыштӧ. А меным таысь сэтшӧм долыд!
И век воӧ сьӧлӧм вылӧ, кор сійӧ шуӧ менӧ «Настусь-оз тусьӧн».
Нимкодь вӧлі велӧдысьлы, кор вайи ичӧтдырся видео, кӧні ми, детсадйӧ ветлысьяс на, ворсам «Шыр кывтӧ-катӧ». Ме пукала пыжын да сьыла: «Шыр кывтӧ-катӧ катша кӧя пыжын…».
Велӧдысь юаліс, мый пӧ сійӧ кӧяыс? Ми некод ог вӧлі тӧдӧй.
Сэки сійӧ петаліс мӧд жырйӧ, вайис сэтысь да петкӧдліс кӧясӧ – пӧткалысь морӧс лысӧ.
Коркӧ ме сылысь юалі:
– Мыйын мортлӧн шудыс?
Велӧдысь вочавидзис:
– Шудыд ас кужысь киад. Кужтӧгыд сійӧ оз ло.
Менам велӧдысь радейтӧ мам кывсӧ, чужан мусӧ, вӧр-васӧ, котырсӧ; уна лыддьысьӧ, мичаа сьылӧ да ачыс уна велӧдчӧ.
Сійӧ миянлы сьӧд пемыд войын туй петкӧдлысь кодзув. Нималана гижысь Геннадий Анатольевич Юшковлӧн кывъясӧн кӧ, сійӧ – коми сьӧлӧма да вира.
Велӧдысьным йылысь менам мӧвпъяслы лӧсялӧ поэт Алёна Старцевалӧн кывбурыс. Сэтысь строкаяссӧ кӧсъя сины и аслам велӧдысьлы:
Ставсьыс, мыйӧ велӧдінныд менӧ,
Ыджыд аттьӧ Тіянлы ме шуа.
Ас кыв дорӧ Тіӧн пестӧм муслун
Сьӧлӧм шӧрын водзӧ видза-нуа.
Тіян авъялунысь, веськыдлунысь,
Шаньлунысь, терпенньӧысь, бур сямысь,
Велӧдысьлӧн ыджыд сьӧкыд уджысь –
Муӧдз копыр Тіянлы дзик ставысь!
Менам олӧмын туйвизь индысь – тайӧ Лидия Яковлевна Зварич (снимок вылын) – искусство гимназияын коми кыв да литература велӧдысь. <>
Анастасия МИШАРИНА.