Кулӧмдін район нималӧ бур спортсменъясӧн. Физкультура да спорт сӧвмӧдӧмӧ ыджыд пай пуктӧны тренеръяс да велӧдысьяс.
Районын медбур тренеръясысь ӧти — Ханверди Гаджимурадович Исрафилов.
Ханверди Исрафилов чужис Дагестанын. Армияын служитіс Екатеринбургын. Кулӧмдін районӧ воис 1994 воӧ, уджаліс войскӧвӧй часьтын.
2003 воын педагог босьтчис содтӧд тӧдӧмлун сетны томуловлы районса ДЮСШ-ын.
2015-2020 воясӧ вӧлі нин медшӧр тренерӧн. Талун уджалӧ Кулӧмдінса спортшколаын. Вылыс тшупӧда тӧдӧмлуна педагоглысь диплом босьтіс Сыктывкарса госуниверситетын.
Ханверди Гаджимурадович — зэв кывкутысь, стрӧг да ыджыд терпенньӧа велӧдысь. Пыр дась юксьыны
уджъёртъясыскӧд аслас тӧдӧмлун-сямӧн. Тшӧкыда нуӧдӧ баскетбол да мини-футбол кузя мастер-класс.
Ӧтарӧ корсьысьӧ да кужӧмӧн вӧдитчӧ спортын выльпыртӧмъясӧн. Сюсь вежӧра да писькӧс тренерӧс донъялісны медвылыс квалификация категорияӧн.
Бур тренерлӧн и челядьыс петкӧдчӧны бура. Да оз сӧмын Кулӧмдін районын, но республика тшупӧдын.
Республикаын баскетболысь ордйысьӧмъясын ныв котыр ӧтарӧ шедӧдӧ приз. Казьтыштам ӧткымын вермӧм. 2017 да 2018 воясын Ханверди Гаджимурадовичлӧн быдтасъяс Коми Республикаын баскетбол кузя первенствоын витысь кыпӧдчылісны пьедесталлӧн коймӧд тшупӧдӧ.
2019 воын миян команда лоис призёрӧн 2007 да 2004 воясын чужӧм нывъяс костын ордйысьӧмын.
2020 воын нывка котыр шедӧдіс эзысь медаль.
Кык во дорвыв кыпӧдчыліс медвылыс тшупӧдӧ школаса баскетбол лига «КЭС-БАСКЕТ» регионса этаплӧн финалын! Тайӧ сетіс позянлун петкӧдчыны Рытыв-Войвыв федеральнӧй кытшын «КЭС-БАСКЕТ» финалын.
2022 вося апрельын 2007 воын чужлӧм ныв команда бара лоис баскетболын Коми Республикаса первенствоын коймӧдӧн, а майын Х.Г.Исрафиловлӧн медся ичӧт арлыда быдтасъясыс, 2010 воын чужлӧм нывкаяс, шедӧдісны баскетболысь эзысь медаль Сыктывкарын республикаса первенствоын.
Таво май 13 лунӧ Ханверди Исрафиловлӧн команда бара лоис республика тшупӧдын вермысьӧн! Кебанъёльысь 2011 воын чужлӧм нывкаяс котыр мый вынсьыс венласис баскетболӧн ворсысь зэв ён командаяскӧд да босьтіс зарни!
Кызь во гӧгӧр дорвыв водзмӧстчысь тренер котыртлӧ мини-футболысь «Кубок Хана» ворсӧмъяс. Ордйысьны чукӧртчывлӧны кыдзи миян районысь, сідзи и Кӧрткерӧсысь, Пӧдтыбокысь да мукӧдлаысь котыръяс, весиг юркарысь командаяс волывлӧны.
Тавося вермасьӧмсӧ сиисны Том йӧз волы. Футбол радейтысьяс тышкасисны да «висисны» Хан нима кубок да козинъяс шедӧдӧм вӧсна юрсиктса «Олимпикын» май 7 лунӧ.
Велӧдчысьяслӧн бать-мам да уджъёртъясыс пыдди пуктӧмӧн висьтасьӧны Ханверди Гаджимурадович йылысь: сибыд сёрниа, шань, зіль, окотапырысь выляс нырччӧ, кӧть и стрӧг, но челядьӧс ёна радейтӧ.
Казьтыштам, 2023 вося февральын Ханверди Гаджимурадовичӧс уджын зільӧмысь донъялісны «Коми Республикаса почёта уджалысь» морӧсвывса пасӧн.
Сылӧн ыджыд семья. Аида Имамовна гӧтырыс — история да право велӧдысь, челядьӧс воспитайтан удж кузя директорӧс вежысь. Гозъя быдтӧны куим ныв-пи. Медыджыдыс, Алина, велӧдчӧ Сыктывкарса университетын, Алверди талялӧ бать кок туй — спортсмен, Сыктывкарса «Новая генерация» котырын футболист, а медiчӧт Арианалы 5 арӧс.
Ачыс нималана тренер висьталӧ, мый томдырся дум-кӧсйӧмсӧ сійӧ збыльмӧдӧма: «Спорт, челядь да йӧзӧн пыдди пуктӧм. Менам олӧмын тайӧ — медтӧдчанаыс». <>
Ария НАПАЛКОВА.
Снимокъясыс ӧтуввезйысь.