Тавося февраль 21 лунӧ Россияса президент Владимир Путин Федеральнӧй Собрание дорӧ шыӧдчигӧн казьтыштіс спецоперация дырйи доймӧм-ранитчӧмаяслы, налӧн семьяяслы отсалан тэчас лӧсьӧдӧм йылысь.
А апрель 3 лунӧ нин аслас индӧдӧн шуис котыртны «Защитники Отечества» фонд. Нырщикалысьнас индісны президентлӧн администрацияӧн веськӧдлысьӧс первой вежысь Сергей Кириенкоӧс.
Май помын фондыслысь филиалъяс восьталісны странаса быд регионын. Комиын тайӧс вӧчисны жӧ май 30 лунӧ. Сыктывкарын фонд юкӧныслы сетісны Первомайскӧй уличаса 11-ӧд номера керка, кӧні водзті вӧлі Сбербанк.
Республикаса юралысьлӧн Общественнӧй приёмнӧйын Комиын «Айму дорйысьяс» фонд юкӧнӧн веськӧдлысь Денис Коюшев висьтасис, мый удитӧмаӧсь нин вӧчны да кутшӧм тӧжд-мог колӧ на збыльмӧдны.
– Медым профессиональнӧя отсавны ветеранъяслы, Санкт-Петербургын РАНХиГС-лӧн Рытыв-Войвыв веськӧдлан институтын велӧдім 24 социальнӧй координаторӧс. Тайӧ специалистъясыс зільӧны нин Ухта, Усинск, Инта каръясын, Кулӧмдін, Кӧрткерӧс, Изьва, Мылдін, Чилимдін да Кослан сиктъясын. Сыктывкарын СВО-са ветеранъяслы да налӧн семьяяслы отсасьӧ вит координатор. Матысса кадӧ нин республикаын лоас фондса кӧкъямысдас координатор.
Найӧ оз мӧдны пукавны шоныд вежӧсын компьютер водзын да виччысьны, кор кодкӧ шыӧдчас отсӧгла. Координаторыс ачыс мӧдас уджавны СВО-са ветеранкӧд, ковмас кӧ, волас вермытӧм дорӧ гортас.
Тайӧ кык вежоныс петкӧдліс, мый спецоперация вылысь воӧмаяс медсясӧ корӧны лӧсьӧдны йӧзӧдлытӧм тыш-косьса ветеранлысь удостоверение. Сідзжӧ налы колӧ юристлӧн отсӧг, медицина реабилитация, социальнӧй да сьӧма кокньӧд. Кодсюрӧлы абу тырвыйӧ вештӧмаӧсь воюйтӧмысь сідз шусяна довольствиесӧ. Ковмыліс отсавны шыӧдчысьяслы босьтны мутор, инасьны удж вылӧ да ыстыны челядьсӧ шойччан лагерӧ, а сідзжӧ опека улӧ босьтны спецоперацияын усьӧмалысь ныв-писӧ.
Фондлӧн могъяс лыдын и лекарствоӧн (тшӧтш и суйӧрсайсаӧн да донаӧн), реабилитация эмбурӧн (весиг татшӧмыс кӧ абу дон босьттӧг вичмӧдана лыдын), санаторий-курортӧ путёвкаӧн могмӧдӧм. Уналы колӧ психологлӧн отсӧг. «Айму дорйысьяс» фондса специалистъяс сідзжӧ отсаласны ветеранъяслы босьтны выль специальносьт, инасьны кокньыдджык удж вылӧ. Да и уналы, торйӧн нин вермытӧмъяслы, колӧ отсавны бергӧдны горт гӧгӧрас удж. Мукӧдыслы ковмас мыйсюрӧ вежны-дзоньтавны керка-патераас, медым коляскаа ветеран вермис сэні лючки овны.
Медым спецоперацияса ветеранъяс эз усьны ловнас, налы вӧзъясны пырӧдчыны уна сикас общественнӧй уджтасӧ, уджавны томъяскӧд, велӧдны челядьӧс радейтны Аймунымӧс, историянымӧс да пӧль-пӧчлысь традицияяс.
«Защитники Отечества» фонд мӧдас ёртасьны и некоммерческӧй да волонтёр котыръяскӧд, кодъяс и таӧдз нин кутісны йитӧд СВО-са ветеранъяскӧд да налӧн семьяяскӧд.
Фондас отсӧгла вермасны шыӧдчыны найӧ, кодъяс 2022 вося февраль 24 лунсянь вӧліны военнӧй спецоперацияын ДНР-ын, ЛНР-ын да Украинаын, а сідзжӧ Запорожье да Херсон обласьтъясын сентябрь 30 лунсянь воюйтысьяс. Фондас отсаласны и 2014 вося май 11 лунсянь ДНР-са вооружённӧй вынъясын, ЛНР-са народнӧй милицияын, мукӧд военнӧй тэчасын воюйтысьяслы. Гӧгӧрвоана, оз кольны ас кежаныс и спецоперация дырйи усьӧмаяслысь, чорыда ранитчӧм-висьмӧмаяслысь гӧтыр-челядьсӧ.
Фондас позьӧ шыӧдчыны оз сӧмын кутшӧмкӧ торъя могӧн. Шуам, отсавны нюжӧдны биару. «Айму дорйысьяс» фондлӧн ӧти юкӧнын ӧтчыдысь волігӧн позяс босьтны став отсӧгсӧ.
Миян дорӧ позьӧ локны дзонь семьяӧн. Кор бать-мамыслы мӧдасны дасьтыны колана кабала-документ, челядьыс вермасны найӧс виччысьны орчча ворсан жырйын, кӧні эм та могысь став коланаыс.
– Водзті миян дорӧ тшӧкыда шыӧдчылісны ветеранъяс. Мыйӧн вермим, налы отсалім. Но корсюрӧ миян специалистъяслӧн эз вӧв позянлуныс кокньӧдны найӧс, збыльмӧдны корӧмсӧ. Шуам, миян ведомство оз вермы сетны ветеранлысь удостоверение, ог вермӧй реабилитируйтны медицина боксянь, вичмӧдны мутор да сідз водзӧ. Та вӧсна и колӧ вӧлі котыртны «Айму дорйысьяс» фондсӧ. Сэтчӧс социальнӧй координаторъяслӧн эм став позянлуныс отсавны спецоперацияса ветеранлы. И миянлысь соцзащита шӧриннымӧс тайӧ ёна кокньӧдіс, – висьталіс Комиын удж, занятосьт да йӧзӧс социальнӧя доръян министрӧс вежысь Александр Хохлов.
Александр Владиславовичлӧн висьталӧм серти, выльӧн котыртӧм фондас отсаласны весиг налы, кодъяс оз вермыны стӧча юӧртны, мый налы колӧ. Социальнӧй координатор сюся кывзас шыӧдчысьсӧ, гӧгӧрвоас, мый сійӧс майшӧдлӧ да отсалас збыльмӧдны дум-кӧсйӧмсӧ.
* * *
Видеоконференция помас Денис Александрович аттьӧаліс кар-районса администрацияясӧн веськӧдлысьясӧс, социальнӧй координаторъясӧс, соцзащита шӧринъясын зільысьясӧс, общественнӧй котыръясын водзмӧстчысьясӧс отсӧгысь.
Ӧні фондас дасьтӧны координаторъяслы, асланыс уджалысьяслысь лӧсялана удостоверение да мукӧд документ. Лӧсьӧдӧмаӧсь нин сідз шусяна брендбук. Ми ногӧн кӧ, быд муниципалитетын фондас пыранінын лоас ӧткодь рӧма да шыпаса вывеска, медым йӧзыс ылысянь аддзисны, мыйсяма тайӧ учреждение.
Сыктывкарын «Защитники Отечества» фонд восьса ӧкмыс час асывсянь квайт час рытӧдз. Позьӧ звӧнитны 8(8212)28-64-45 номера телефон пыр. <>
Николай РАЗМЫСЛОВ.
Снимокъясыс авторлӧн да ӧтуввезйысь.