Комиын «Дзоньвидзалун» нацпроект весьтӧ эштӧданвыйӧдз вайӧдӧма модуля дас вит ФАП.
Регионса правительствоӧн веськӧдлысьӧс вежысь Лариса Карачёвалӧн висьталӧм серти, став бурдӧдчанінсӧ лоӧ помалӧма июль 1 лунӧдз. Ӧти на пиысь, Сыктывкар бердса Выльтыдор посёлокын, дась нин.
Казьтыштам, таво выль ФАП-яссӧ шуӧма восьтыны Изьва, Кулӧмдін, Кӧрткерӧс, Сыктывдін, Мылдін, Сыктыв да Удора районъясын, а сідзжӧ Ухта бердса Кӧмдін посёлокын да Печора районса Конецбор грездын.
– «Дзоньвидзалун» нацпроект сетӧ позянлун кыпӧдны ӧнія выль бурдӧдчанінъяс, и мый торйӧн нин тӧдчана, ылі сикт-грезд-посёлокын, кӧні водзті фельдшеръяслы ковмыліс ломтыны пач да ваявны ва. Выль ФАП-ясас шоныд да югыд, воӧ ва, эм став колана медоборудование-аппаратураыс, – висьталіс Лариса Карачёва. – Такӧд тшӧтш регионса дзоньвидзалун видзан министерствоӧн веськӧдлысьяс райбольничаясысь врачьяскӧд ӧтвылысь вӧчӧны став коланасӧ, медым вӧлі кодлы уджавны выль ФАП-ясас. Тайӧ и опыта нин фельдшеръяс, и том на специалистъяс.
* * *
Содтӧд пасъям, таво «Дзоньвидзалун» нацпроектлӧн «Модернизация первичного звена здравоохранения» регионса уджтас весьтӧ ФАП-яс, бурдӧдчан амбулаторияяс, кар-районса больнича-поликлиникаяс кыпӧдӧм-дзоньталӧм, транспорт да оборудование ньӧбӧм вылӧ шуӧма видзны 1,6 миллиардысь унджык шайт. <>
Гижӧдсӧ дасьтiс Александра АРТЕЕВА.
Снимокъясыс ӧтуввезйысь.