Коми Республикаса правительствоын регионса вузъясӧн, техникум-колледжъясӧн веськӧдлысьясӧс корлӧмӧн видлалісны, кыдзи ышӧдны студентъясӧс уджавны стройотрядъясын.
Вӧлі пасйӧма, мый ветымынысь унджык воӧн студентъяслӧн отрядъяс пуктісны ассьыныс пай «Сияние Севера» биару труба нюжӧдӧмӧ, Сыктывкарын вӧр комплекс да Печораын электростанция лэптӧмӧ, Вуктыл да Усинск каръяс стрӧитӧмӧ.
Тайӧ традициясьыс оз ӧтдортчыны и талун. Комиын студотрядъясӧ ӧтувтчӧма 700 сайӧ том морт, а Ухтаса да Сыктывкарса госуниверситетъясысь нёль стройотрядын зільӧ ӧкмысдас студент.
–Буретш стрӧитчысьяслӧн студотрядъяс медся ёна колӧны республикалы, – висьталіс регионса правительствоӧн веськӧдлысьӧс вежысь Лариса Карачёва. – Ми кыпӧдам школаяс, детсадъяс, ФАП-яс, и таын студентъяс вермасны сетны ыджыд отсӧг. Ми кӧсъям, медым быд стрӧитчанінын вӧлі тырмымӧн уджалысь, а студентъяс вермисны нажӧвитчыштны гожӧмнас.
«Россияса студотрядъяс» котырысь Комиын юкӧнлӧн правлениеӧ пырысь Анатолий Чемезовлӧн кывъяс серти, матысса кадӧ нин регионса минстройкӧд ӧтув найӧ видзӧдласны, уна-ӧ стрӧитчан бригада колӧ республикалы, да юӧртасны та йылысь велӧдчанінъясӧ.
Та бӧрын нин студентъяслы висьталасны, мый налӧн лоас позянлун уджавны стройотрядын.
Гижӧдсӧ дасьтіс Павел СИМПЕЛЕВ.
Снимокъясыс ӧтуввезйысь.