Лэбач… Вына да повтӧм Лэбач… Лэбач шонді…
Код йылысь тайӧ ме?..
Сы йылысь, коді козьналӧ быдмысь войтырлы шонді югӧр, сетӧ вын да туйдӧ олӧмӧ бур туй. Сы йылысь, коді ышӧдӧ эскыны аслыд. Татшӧм Лэбач-шондінас меным лоис Луздор районысь Гурьёвчиса шӧр школаын роч кыв да литература велӧдысь Надежда Максимовна Осипова.
Школаын уджавны Надежда Максимовна заводитӧма менам батьлӧн велӧдчигӧн на. Сэки жӧ сійӧ лоӧ мамлӧн классӧн веськӧдлысьӧн.
Нёльӧд класс, комын нывка да зонка – збойӧсь, ярӧсь, вильышӧсь.
Кытчӧ бергӧдны налысь помасьлытӧм вын-эбӧссӧ? Надежда Максимовна аддзӧма кытчӧ, котыртлӧма гажъяс, концертъяс, быдсяма петкӧдчӧмъяс…
Менам мам пыдди пуктӧмӧн висьтавлӧ аслас класс да Надежда Максимовна йылысь, кӧть комын ӧти во нин кольӧма школа помалӧмсяньыс.
Ёртъясыскӧд чукӧртчывлігӧн радпырысь казьтывлӧны гажа вояссӧ.
Мамлы медъёна кольӧмаӧсь вежӧрас, кыдзи велӧдысьыскӧд ветлывлӧмаӧсь походӧ, отсасьлӧмаӧсь горт гӧгӧрас олӧма войтырлы.
Надежда Максимовна век накӧд тшӧтш и уджавлӧма, и шойччылӧма, и гажӧдчылӧма.
Вокӧйлы тшӧтш усьӧма шуд велӧдчыны тайӧ бур морт дорас, нэм кежлас сюркнявны пель саяс олӧмӧ велӧдан урокъяссӧ.
2017 восянь и меным мойвиис тӧдмавны, кутшӧм радейтӧмӧн, пӧсь сьӧлӧмӧн Надежда Максимовна юксьӧ челядькӧд тӧдӧмлуннас. Вит воӧн сійӧ лоис меным ас мортӧн.
Став котырнымӧс – батьӧс, мамӧс, вокӧс, менӧ – петкӧдіс олӧмӧ Надежда Максимовна.
И ми быдӧн шоныда казьтывлам радейтана велӧдысьнымӧс. Сійӧ нуӧдӧ урокъяссӧ сідзи, мый окота кывзыны сійӧс, лыддьысьны, вӧчны гортса удж да аскинас бара локны школаӧ.
Сылӧн велӧдчысьяс вермӧны олимпиада-конкурсъясын, бура сдайтӧны экзаменъяс.
Ӧкмысӧд класс помалігӧн радейтана велӧдысьным шуис миянлы: «Челядь, мый кӧть оз ло тіян олӧмын, пыр кольӧй мортӧн!». А ӧд быдмысь войтырлы тайӧ медколана велӧдӧмыс.
Во сайын ме петі Надежда Максимовналӧн шоныд борд улысь, велӧдча ӧні искусство гимназияын, кӧні паныдаси выль велӧдысьяскӧд, кодъяс тшӧтш козьналӧны миянлы зумыд тӧдӧмлун да сетӧны бур вылӧ лача.
Но Гурьёвчиысь ассьым радейтана велӧдысьӧс некор ог вунӧд.
Мыйта велӧдчысьӧс шонтісны Надежда Максимовналӧн тӧждысяна бордъясыс да сӧстӧм югӧръясыс, мыйта кыпыдлун, выльтор босьтісны сылӧн урокъяс дырйи нывъяс да зонъяс – он вермы лыддьӧдлыны!
Аттьӧ ставсьыс, миян Лэбач-шондіӧй! <>
Татьяна ЗИЗГАНОВА.
Снимок вылын: Надежда Максимовна Осипова да Татьяна Зизганова.