Александр УЛЯШЕВ
Женя артасьнытӧ вермӧ,
Мукӧдторйысь абу кын.
Мед и мускулыс оз нэрмы,
Спортын бертлӧ ассьыс вын.
Зэрыс кобас, енэж шӧрын
Шонді мыччас чужӧмбан.
Мӧд лун асыв арся вӧрын
Тшакыд петас сэн и тан.
Иславнысӧ йи чой йывсянь
«Ватрушки» да даддьыд бур.
Лыжиӧн кӧ сэті тӧвзян,
Усян – дойдан ки-кок, юр.
Йӧзыс клубын талун уна,
Локтісны тшӧтш бать и мам.
Гажа концертасьӧм мунӧ,
Челядь петкӧдлӧны сям.
Костя школа бӧрас воӧ,
Пуысь вӧчӧ самолёт.
Быдма, лётчикӧн пӧ лоа,
Либӧ конструкторӧн. Вот!
Лёня талун ёна радлӧ,
Босьтіс «пять» ӧд, а эз «два».
Гортас кыпыд руӧн катлас
Вадор ключысь чӧскыд ва.
Мамыс пилы ньӧбис шатин,
Чери вугралас пӧ мед.
Сӧн да вугыр сетіс батьыс,
Пластик табсӧ вӧчис дед.
Серпасалiс Геннадий Шарипков
Коми анбур серти посни челядьлы кывбуръяс