Ыджыд Вермӧм лун водзын республикаса содтӧд тӧдӧмлун сетан шӧринсаяс тӧдмасисны фронтӧвик Николай Акимович Рочевкӧд.

Изьва районса Кипиево сиктын 1927 воын чужлӧм салдат тышкасис японечьяскӧд война помас нин.

Аддзысьлӧм дырйи Ыджыд тышса ветеран казьтыштіс челядьлы фронтвывса некымын тешкодь лоӧмтор, а сэккості зонпосни серпасалісны асьсӧ Николай Акимовичӧс да висьталанторсӧ. Уджсӧ помалӧм бӧрын челядь Людмила Геннадьевна Кузиванова велӧдысьныскӧд чолӧмалісны пыдди пуктана землякӧс, сиисны дзоньвидзалун да аттьӧалісны мир вайӧмысь.

Аддзысьлӧм помас Николай Рочев козьналiс челядьлы бурсиӧм: «Видзӧй ӧта-мӧднытӧ, радейтӧй олӧмсӧ, енэжсӧ, шондiсӧ, вӧр-васӧ. Мед Енмыс отсалас, да тi кужанныд мичаа овны ассьыныд югыд туйнытӧ!».

 

Николай Акимовичлы таво мойвиис пӧртны олӧмӧ важся кӧсйӧм – веськавлыны Москваса Гӧрд изэрд вылӧ, Ыджыд Вермӧмлы сиӧм парад вылӧ. Радлам дона морткӧд ӧтвылысь.

 

 

 

 

Серпасалiс Таисия Петрова.

Геннадий ПОПОВ

Победалы-78!

 

Некор огӧ вунӧдӧй

Ыджыд Вермӧм лун.

Чолӧмавны пӧльясӧс

Некодлӧн оз вун.

 

Ставсӧ кутам казьтывны,

Быдмысь пи да ныв.

Копыртамӧй юрнымӧс,

Шуам АТТЬӦ кыв!

 

 

 

 

Серпасалiс Анастасия Макарян.

Локтiм видз вылӧ, а сэнi уна ыджыд турунвиж мач туплясьӧ. «Сё дивӧ!» – шензям, чужъям. ӧти мач потi, а пытшкӧсыс гӧрд, сьӧд кӧйдыса. Кодкӧ гӧрд кусӧксӧ вомас сюйис, ок, и чӧскыд да юмов вӧлӧма. Сэки ме, войвыв кӧдзыд местаясысь
локтӧм морт, дерт, эг тӧд арбуз йылысь. Кутшӧм чӧскыда, вӧлӧм, позьӧ сiйӧс
сёйны.

 

Серпасалiс София Мерзлая.

Монголияын ми ас отрядӧн паныдалiм верблюдъяс. Чуймӧдісны ыджыд, кык гӧрба живӧтинаяс. ӧти зон ёна тешитчис верблюд водзын – ниглясис, шмонитіс, кывсӧ петкӧдліс. Тӧварышъяс ӧлӧдісны пемӧс дэльӧдӧмысь. А верблюдыд видзӧдiс, видзӧдiс йӧюк зон вылӧ да кыдзи сьӧлыштас. Чужӧмыс вӧлi ставнас дулльӧсь. Ёна и сералiсны ёртъяс!

 

 

Серпасалiс Анастасия Шашева.

Шойччылiм ми шоча, но сьӧлӧмсянь. Тӧварышъяс висьтасисны. Коркӧ ӧти отряд сувтіс вӧрӧ. Аддзисны паськыд мича луд, вӧчисны бипур да пуктiсны пуны рок. Кык ёрт мунiсны корсьны тшай вылӧ турун-кор. Неылысь аддзисны ӧмидз куст. Сэтшӧм мича, гырысь да сыв тусь ӧшалiс сэні. Салдатъяс уськӧдчисны да кутiсны сёйны да чукӧртны ӧмидзсӧ. Другысьӧн тратшакылiс. Зонъяс лэптiсны юрнысӧ да аддзисны: кодкӧ накӧд нӧшта эм. Матыстчисны, а сэнi ош юр. Другъяс ставсӧ шыбитісны да садьтӧгыс кутiсны пышйыны ёртъяслань. Тышын вына повтӧм салдатъяс ставсӧ вунӧдiсны да садьтӧг повзисны ошкысь.

Серпасалiс Милана Юмшанова.

 

 

 

 

 

 

Дасьтісны Алёна Нестерова, Людмила Кузиванова.