(1933–1999)
Михаил Игнатов чужлiс 1933 вося ода-кора тӧлысь 28 лунӧ Кулӧмдін районса Помӧсдін сикт улӧ пырысь Мӧдлапӧв грездын.
Сизим класс помалӧм бӧрын велӧдчис Укваса горнӧй техникумын, кӧні и босьтчис гижны кывбуръяс. 1967 воын Михаил Игнатов помалiс А.М.Горький нима литература институт, 1968 воын пырис СССР-са гижысь котырӧ.
Тундраын да войвывса пармаын геофизикъяслӧн сьӧкыд да кывкутана удж йылысь гижис Михаил Игнатов аслас повесьтъясын да висьтъясын. «Чусалысь шом» медводдза висьтсӧ йӧзӧдiс «Войвыв кодзув» журналын 1959 воын. Во мысти татшӧм ним улын гижысьлӧн петiс медводдза небӧг.
Гижлiс и ичӧт арлыда челядьлы. Сылӧн ки улысь петавлісны «Васьӧ да Кардинал», «Юсьяс, донаяс, вай жӧ висьталӧй…» небӧгъяс.
Вильыш Ӧсьтук
Дженьдӧдӧмӧн.
Муртса на Васьӧ удитiс пуксьыны пызан сайӧ вылльӧв кринча дорӧ да босьтны пань – посводзас, кылӧ, мыйкӧ сяркнитiс, быттьӧ кодiкӧ содзтыр из джоджас койыштiс, а сэсся и кильчӧ пос кузяыс тшӧтш.
Пӧльыс (ciйӧ вӧлi лабич дорас пукалӧ, кӧтi утъялӧ) ружӧктiгтыр кыпӧдчыштлiс табурет вывсьыс, видзӧдлiс ӧшинь пыр ывлаӧ да вомсьыс дратвасӧ перйытӧг шуис:
– Мокасьтыд, посводз ӧдзӧссӧ игнавтӧг кольсьӧма да, бара нин Ӧсьтукыд пакӧститчӧ. Нолтӧ, Василей, пиук, петав да ньӧрйышт. Да заворсӧ первой восьты…
Васьӧ лэбыштiс кильчӧ вылӧ. Збыльысь, ӧшинь улын табак град шӧрын сулалiс Ӧсьтук да тэрмасьӧмӧн ас гӧгӧрсьыс вом тырнас кватлалiс паськыд коръяс. Васьӧӧс бытьӧ эз и казявлы, горӧдӧмсӧ сылысь эз кывлы ни. Кажитчӧ, горӧдӧм бӧрас нӧшта на зiльджыка пондiс йирсьыны.
Вот ӧд кутшӧм! Сэнi жӧ, орчча градъяс вылын, и лук, и чеснӧк, и морков, и кӧчан, и картупель быдмӧ, а пырас кӧ йӧрас – табак град вылӧ и уськӧдчӧ! Васьӧлы эськӧ ньӧти абу жаль табакыс, мед сёяс, колӧкӧ, да ӧд висьмыны вермас…
Васьӧ гурйыв восьтiс заворсӧ, кватитiс пос помсьыс гӧлик да пондiс надзӧник матыстчыны Ӧсьтуклань. А Ӧсьтук сiйӧс быттьӧ оз и аддзы, азыма мырсьӧ табак коръясӧн, гашкӧ, курччавтӧг и ньылалӧ да, код тӧдас.
Ho сӧмын на Васьӧ киын гӧликыс кыптiс сынӧдас, Ӧсьтук весыштiс нин места вывсьыс, но чепӧсйигас вомтырнас нӧшта на нетшыштiс. Гӧнитiс заворӧд улич вылӧ метр дас сайӧ, пельсӧ бӧрвыв жмитӧма, сувтiс, бергӧдчис Васьӧлань, бакӧстiс рӧмидзтiгтыр:
– Бе-е-е!
Мый тайӧ «бе-е-е»-нас шуис: либӧ эльтiс Васьӧӧс, эн пӧ судз гӧликнад, либӧ корис котралыштны, суӧдны сiйӧс – гӧгӧрвоны вӧлi сьӧкыд.
Васьӧ некутшӧм скӧрлунтӧг грӧзитыштiс сылы кулакнас:
– Час, ме тэнӧ! Сюрлан нa! – да игналiс заворсӧ.
А Ӧсьтук быттьӧ тайӧс и виччысьӧма: юрсӧ гогйӧдлiгтыр смела матыстчис (ӧнi пӧ тэ потшӧс сайын, он слӧймы пыр петны да нӧйтны!), юрсӧ сюйис завор тас костӧд да некымынысь кыскыштiс нырнас сынӧдсӧ Васьӧлань видзӧдiгтыр. А синмыс вӧлi сэтшӧм сӧстӧм, быттьӧ ӧнӧдз некутшӧм мыж сiйӧ эз и вӧчлы, и сӧмын дзик ӧнi аддзис Васьӧӧс.
– Бе-е,– мелiа бакӧстiс сiйӧ.
– Но и мудер руч жӧ тэ! – Васьӧлӧн пeтic нюмыс, сiйӧ малыштiс Ӧсьтукӧс пель сайтiыс, сьылi кузяыс. – Oк, эськӧ някырта кӧ тэнӧ – тӧдлан сэки! – но ыж тӧдiс нин, буракӧ, мый нинӧм лёкыс оз ло, кватитiс Васьӧлысь чуньсӧ да заводитiс нёнявны-няклявны.
…Тайӧ аслыссяма ыжыс овмӧдчис Васьӧясӧ кольӧм во нин: март тӧлысся рытӧ мамыс локтiс удж вылысь да пась питшӧгсьыс перйис неыджыд дӧра тубрас. Ньӧжйӧник пуктiс тубрассӧ джоджӧ да разис. Васьӧ некыдз эз куж думыштны, мый сэнi вермас лоны кодкӧ ловъя, а, вӧлӧмакӧ, зэв читкыльӧсь сьӧд гӧна баляпи, кодлӧн кымӧс шӧрас тыдалiс еджыдiн: быттьӧ кодкӧ краситӧма сiйӧс сьӧд краскаӧн, да то ли краскаыс кымӧсас вылӧ абу тырмӧма, то ли нарошнӧ мича вылӧ мавттӧг сэтi кольӧма.
– Вот овмӧс содтӧд вайи, – висьталiс мaмыc. – Ыжыс пӧ куимӧс вайӧма да тайӧс ӧтдортӧ, нинӧмысь оз кӧсйы вердны. Ыж видзысьыс и тшӧктiс: куланiнысь пӧ, Лида, босьт, гашкӧ пӧ, бyp сьӧлӧм дорад шонтан да, ловзяс. Меным жаль лои – со и босьтi, – а ачыс видзӧдлас то баляпи вылӧ, то гортсаяс вылас: мый пӧ бapa шуасны.
Батьыс Васьӧлӧн вӧлi кыӧ кулӧм. Пырысь-пыр жӧ бергӧдчис улӧс вылас.
– Татшӧмыд ӧд, кӧнкӧ, весиг сёйнысӧ на оз куж? Няк помысь нёньӧдны ковмас.
Пӧльыс вӧлi газет лыддьӧ, ӧчкиасьӧма да, но сюся пуктiс газетсӧ пызан вылас, а ӧчкисӧ лэптiс плешкас:
– Сарай пельӧсын вӧлi папирос ящик, кодкӧлун лавкаысь вайлi – быттьӧ тӧдсьӧма та шӧрӧ-водзӧ. Oк, лоӧ петны да пыртны выль олысьлы, – а ачыс чеччигмозыс нюмъялӧ, тошкыс весиг водзланьӧ чургӧдчыштӧма.
Мамыслӧн весиг чужӧмыс югдiс, тэрмасьӧмӧн заводитiс пӧрччысьны. Васьӧлы нимкодь жӧ, сылы телепит нин малыштны тайӧ дрӧжжитысь ёкмыльсӧ, инмӧдчис кинас, но повзьӧдiс. Баляпи заводитлiс сувтны кок йылас, но эз артмы. Мамыс ӧлӧдiс Васьӧӧс:
– Тэ эн дӧсадитчы сылы. Час, петавла, лысьтышта Серӧдӧс да вердышта шоныд йӧвнас…
Коли тӧлысь кык, и тайӧ каднас баляпи сӧвмыштiс. Первойсӧ, дерт, прамӧя ноксьыны ковмис сёйны велӧдiгас, а сэсся ачыс кутiс корны: папирос ящикас кӧ – баксыны пондас вӧсньыдик нориник гӧлӧснас, вунӧдiнныд пӧ менӧ, а джоджӧ кӧ лэдзласны – пыр и локтас да кокад нырнас кутас тувкйыны, вайӧ пӧ ӧдйӧджык йӧвтӧ.
Мыйӧн быдмыштiс, пыр и вильышмыны кутiс. Ящикад эз кут йӧрмыны: либӧ пӧрӧдас, либӧ чеччыштас сэтысь, да сэтшӧм пелька, мый кокыс некытчӧ оз инмыв. Марляӧн тупкылiсны ящиксӧ – эз отсав, кыскис марлясӧ да няклялiс. Сэсся джодж кузя ӧтарӧ-мӧдарӧ гӧняйтлыны зiльӧ, тувгӧдӧм кокъясӧн вывлань чеччыштлас, краситӧм джоджыс вильыд, и усьлас, сувтас да бара дурӧ. Дурас, дурас да ӧрекъяс гу-узь! кисьтас, и сӧмын пельсӧ вӧрӧшитӧ. А Васьӧлы тайӧс чукӧртны да весавны! Васьӧ сыӧн эськӧ радейтӧ лелькуйтчыны, но бӧръяторсӧ оз радейт.
Сэсся и ним баляпилы лои. Кыдзкӧ Васьӧ шуис сiйӧс Ӧсьтукӧн‚ а мӧдыс пондiс шыасьны да локны тадзи корӧм вылас.
Мамыс эськӧ шулiс жӧ да:
– Йӧюк! Цсьтнас жӧ гырысь ыжъясӧс чуксалӧны, да и кутшӧм али ним тайӧ. Скодитанаӧсджык да мичаджыкӧс корсь,– но сiдзи и коли…
Дасьтiс да серпасаліс Кристина Кривошеева.