Ме ола Абхазияса Сухум карын, велӧдча А.С.Пушкин нима школаын. Радейта ассьым чужан муӧс, ставыс ӧд тані зэв мича – и лӧз саридзыс, и сӧстӧм ваа юясыс, и Кавказ гӧраясыс.
И сэк жӧ век кӧсйи унджык тӧдны Коми му йылысь, ӧд мамлӧн вужъясыс сэтысь, а Удора районын олӧ менам рӧдвуж. Зэв на ичӧтӧн ме вӧлі нин Комиын да нӧшта кӧсъя на ветлыны.
Чой да сылӧн вокъяс
Лыдтӧм шензьӧданатор позьӧ аддзывны и Абхазияысь, и Комиысь. Кавказ да Урал гӧраяс йылысь уна легенда эм, меным жӧ сьӧлӧм вылӧ воисны сэтшӧмъяс, кӧні висьтавсьӧ чой да сылӧн вокъяс йылысь. Вайӧда на пиысь кыкӧс.
Маньпупунёр
Мансилӧн ӧти племя-котыр Ялпынгнер енлӧн борд улын зэв озыра да шудаа оліс. Вождьнас налӧн вӧлі Куущай, а сылӧн Айюм нылыс – медся мичаӧн.
Нывлӧн мичлун йылысь кывсьӧма Торевлы, да сійӧ гӧтрасьны Айюмкӧд мӧвпыштӧма. Локтӧма Куущай дорӧ, но Айюм абу кӧсйӧма петны сы сайӧ.
Скӧрмӧма Торев, вокъяссӧ чукӧстӧма. Уськӧдчӧмаӧсь найӧ племя вылӧ, манси племялы ковмӧма пышйыны оланінсьыс. Айюм сэки корӧма Ялпынгнерӧс юӧртны уськӧдчӧм йывсьыс вокыслы, Пыгрычумлы, коді вӧравны вӧлӧм мунӧма.
Торев великан-вокъясыскӧд муртса абу удитӧмаӧсь суӧдны пышйысь племяӧс, кор налы воча сувтӧма Пыгрычум. Ялпынгнер сетӧма сылы зарни щит да ёсь меч. Пыгрычум веськӧдӧма щитсянь шонділысь югыд югӧрсӧ Торевлы синмас, и Торев пӧрӧма изйӧ. Сы моз жӧ измӧмаӧсь и вокъясыс.
Рица
Важӧн-важӧн паськыд юбокса лудъяс вылын Рица йирсьӧдӧма мӧсъяссӧ. Нылыс сэтшӧм мича вӧлӧма, мый вом дорсӧ весиг алӧйгӧрд тюльпанъяскӧд он ӧткодяв, лӧз синмыскӧд и саридзыс эз вермы венласьны, а чужӧмыс гӧра йывъясын куйлан лымсьыс на еджыдджык вӧлі.
Рицалӧн вокъясыс – Агепта, Ацетук да Пшегишха – мунісны кыйсьыны гӧраясӧ. Лун коли, рыт нин воис, а найӧ эз на бергӧдчыны. Рица водіс ю дорӧ, кунис синсӧ да кутіс сьывны. И сэтшӧм мича гӧлӧсӧн сьылӧ, мый войся лэбачьяс ланьтісны, шоръяс визувтны дугдісны.
Сьылӧмсӧ кылісны Гега да Юпшара рӧзбойникъяс. Ыджыдджыкыс, Гега, ыстіс ичӧтджыксӧ, Юпшараӧс, видзӧдлыны, коді сьылӧ ю дорас. Аддзис Юпшара Рицаӧс да весьӧпӧрис – некор на татшӧм мича нывсӧ эз паныдавлы. Уськӧдчис Рица дорӧ да шамыртіс кинас. Ныв мӧдіс мынтӧдчыны, отсӧг корны. Аддзис тайӧс варыш, лэбис Рицалӧн вокъяс дорӧ да висьталіс налы та йылысь. Вокъяс котӧртісны чойыс дорӧ, но сёрмисны.
Сэки Пшагишха шыбитіс щитсӧ рӧзбойник вылӧ, но эз веськав. Усис щитыс ю шӧрас да помис сійӧс. Артмис ты.
Яндзимысла Рица шыбитчис тыас, а Юпшара кутіс пышйыны. Куим вок вӧтӧдісны сійӧс, Агепта кватитіс шошаӧдыс да шыбитіс тыас. Ваыс сэні пузис да щит вомӧныс чилӧбтіс Юпшараӧс, нуис сійӧс саридзӧ.
А куим вок шогысла измисны да лоисны джуджыд гӧраясӧн. Найӧ и ӧні на сулалӧны ты весьтын да видзӧны мича Рицалысь узьӧмсӧ.
* * *
Ме казялі, мый легендаясыс мыйӧнкӧ ӧткодьӧсь. Кыкнанас висьтавсьӧ чой да сылӧн вокъяс йылысь. Но воддзаас кӧ ставыс бура помасьӧ, мӧдас – шога. Тӧдӧмысь, Уралса Маньпупунёрын да Кавказса Рица ты дорын паныдасьлан морт кодь изъясыс чужтісны ӧтсяма легендаяссӧ.
Кӧсъя аддзывны
А ӧні висьтала, мый эськӧ ме медъёна кӧсъя аддзывны Комиысь. Татшӧминыс лоис дас – топ-10.
Дасӧд местаын тайӧ топас – Манарага. Ненеч кывйысь вуджӧдӧмӧн пӧ Ош лапа.
Матігӧгӧрас олысьыс абу, сідзкӧ, волан кӧ сэтчӧ, ковмас палаткаын войколавны. Тайӧ буретш ме серти.
Печора-Ылыдзса заповедникын эм Ош рудӧг – пещера. Артмылӧма сійӧ ылӧсас комын сюрс во сайын. «Медвежья пещерасӧ» ме инда ӧкмысӧд местаӧ. Рудӧгас пыраніныс ю весьтас 40 метр вылнаын. Пещераас коркӧ овлӧмаӧсь важся йӧз.
Абхазияса гӧраясын уна жӧ рудӧгыс. Гашкӧ, кутшӧмынкӧ ме тшӧтш аддзыла ошкӧс.
Менам рейтингса кӧкъямысӧд местаын – Емдін сикт. Сылӧн зэв озыр история, буретш сэсянь Перымса Степан кутіс пыртны коми йӧзӧс Кристослы эскӧмӧ. Сэні, кӧні сулавлісны язычникъяслӧн бӧлбанъяс, 1795 воӧ кыпӧдӧмаӧсь вичко. Ӧні сэні манастыр, кыдзи и Абхазияса Новый Афонын.
Сизимӧд местасӧ ме сеті Вежа Степан соборлы. Вежӧдӧмаӧсь сійӧс зыряна муын медводдза епископлӧн нимӧн.
Абхазияын тшӧтш уна важся храмыс да манастырыс. Кристослы эскӧмыс тані кутӧма паськавны кык сюрс во сайын на, кор Сьӧд саридз дорӧ проповедуйтны локтӧма апостол Симон Кананит.
Изьва юдорса Галфедь грездсянь неылысь гӧгрӧс изъяссӧ инді квайтӧд местаӧ. Кык миллион во сайын артмылӧм пемыдгӧрд изйыс сэні дасысь унджык. Меным окота тӧдмавны, збыльысь-ӧ найӧ ыджыд вынаӧсь да вермӧны весиг бурдӧдны мортӧс.
Витӧд местаӧ ме пасйи Печора ю бокысь важся йӧзлысь Бызовая да Крутая Гора оланінъяс. Тайӧ стоянкаясас некымын экспедиция нин уджалӧма-туясьӧма, и воддзаас аддзӧмаӧсь пемӧсъяслысь, кызвыннас мамонтлысь, 4 сюрс сайӧ лы.
Нёльӧд местаын – Мамонтӧвӧй куръя. Меститчӧма сійӧ Войвыв кытш сайын, Усва ю бокын. Важся йӧзлысь тайӧ оланінсӧ аддзӧм бӧрын учёнӧйяс вежӧмаӧсь нэмӧвӧйся история вылӧ видзӧдлассӧ.
Окота меным волыны и Маньпупунёрӧ, сійӧс ме пукті коймӧд местаӧ. Эз ӧд весьшӧрӧ йӧзыс бӧрйыны сійӧс Россияса сизим медыджыд дивӧ лыдӧ. Кӧсъя аслам киӧн малыштны бӧлбан изъяссӧ, гусьӧн висьтавны налы ассьым медыджыд кӧсйӧмъясӧс.
Рейтингын мӧд местаӧ ме инді Комиысь вӧрзьӧдлытӧм вӧр-ягсӧ. Сэні жӧ меститчӧны Печора-Ылыдзса заповедник да «Югыд ва» национальнӧй парк. Чайта, Комиысь помтӧм-дортӧм вӧръяссӧ позьӧ ӧтлааститны Сьӧд саридзкӧд. Сійӧ тшӧтш помтӧм-дортӧм.
Но медъёна меным окота аддзывны енэж пӧртмасьӧмсӧ. Войвыв кыасӧ аддзывны меным некор на эз мойвилы, но татшӧм кӧсйӧмыс чужис, кор лыдди «Снежная королева» мойд. Войкытшсайса мичсӧ кывъясӧн он висьтав, сійӧс колӧ ас синнад аддзывны!
* * *
Сёысь кывлӧм дорысь бурджык ӧтчыд аддзывны. Но та могысь меным колӧ ылӧ мунны – Абхазиясянь Комиӧдз. А тіянлы, Войвылын олысьяслы, ставыс тайӧ орччӧн. Видзӧдлӧй, лымйыс кутшӧм еджыд, юыс кутшӧм визув, войвыв кыаыс кутшӧм мича!
А пӧттӧдз любуйтчанныд асланыд чужан муӧн да, волӧй Абхазияӧ, татчӧс мичаинъясӧн нимкодясьӧй! <>
Артём ЗАДОРОЖНЫЙ.
Снимокъясыс ӧтуввезйысь.