Кольӧм шойччан лунӧ медводдзаысь на кыпыда пасйим Коми кыв да гижӧд лун. Такӧд да нӧшта на и «Коми му» газетлы 105 во тырӧмкӧд йитӧдын кольӧм пекничаӧ аслыспӧлӧс десантӧн ветлім Кӧрткерӧсса М.Н.Лебедев нима библиотекаӧ.
Ёрта котырын вӧліны Коми йӧзӧдчан керкаӧн веськӧдлысь Галина Макарова, «Йӧлӧга», «Чушканзі» да «Би кинь» журналъясса главнӧй редакторъяс Ирина Терентьева, Екатерина Макарова да Алёна Нестерова, «Войвыв кодзув» журналысь кывкутысь секретар Иван Кичигин да «Коми му» газетысь редактор Елена Плетцер.
Кӧрткерӧсын тайӧ луныс лэбовтіс ӧти здукӧн, ӧд сымда йӧзкӧд – зонпосникӧд, томуловкӧд и верстьӧкӧд – лои аддзысьлӧма, сымда висьталӧма да кывзӧма.
Библиотекаӧ воӧмсянь нин миян тшаюйтігкості «Йӧлӧга» газетса главнӧй редактор Ирина Терентьева аддзысьліс Кӧрткерӧсса школаысь дасӧд классын велӧдчысьяскӧд.
Сійӧ тӧдмӧдіс томуловӧс петаснас, висьталіс, кыдзи «чужӧ» быд журнал, а сідзжӧ гӧгӧрвоӧдіс ставсӧ серпас-презентацияӧн.
Дерт жӧ, чуксаліс ныв-зонмӧс и аслыныс гижны «Йӧлӧгаӧ».
Та бӧрын лыддьысянінса ыджыд да зэв мича жырйын чукӧртчисны верстьӧ войтыр.
Та пӧрйӧ Коми йӧзӧдчан керкаӧн веськӧдлысь да журнал-газет вӧчысьяс тӧдмӧдіс-ны нин локтысьясӧс став петаснас, казьтыштісны налысь историясӧ да тшӧтш и уджын тешкодь лоӧмторъяс.
Бокӧвӧй морт моз кывзі уджъёртъясӧс да, сьӧлӧмӧй и лолӧй нимкодясис: сэтшӧм ӧзъян синмӧн ставӧн висьтасисны.
А кор бӧрыннас некымынӧн кӧсйысисны быть судзӧдны коми газет-журналтӧ, нӧшта на долыд лои. Збыльысь ӧд, татшӧм аддзысьлӧм бӧрас кӧ кӧть ӧти морт гижӧдчас, и тайӧ нин бур.
Пажнайтӧм мысьт бара на бергӧдчим библиотекаӧ. Алёна Нестероваӧс сэн виччысисны нин коймӧд классаяс, кодъяс окотапырысь тӧдмасисны «Би киньса» главнӧй редакторкӧд и журналнас, а сэсся и ворсісны петасын йӧзӧдӧм ворсӧмъясысь.
Сыкості мукӧдыс варовитісны районысь внештатнӧй авторъяскӧд. Колӧ шуны, сёрниыс артмис колана и миянлы, и гижысьясыслы. Шуам, ӧткымынӧн ыззисны гижны «Чушканзіӧ», мӧдъяс – «Коми мукӧд» ёртасьны. Кутам лача, йитӧдыс збыльысь ладмас-ёнмас.
–Окота, мед эськӧ татшӧм аддзысьлӧмыс вӧлі унджык. Торйӧн нин ичӧт сикт-грездын тіянӧс виччысям. И волігъясад том бать-мамӧс быть колӧ ышӧдны велӧдны челядьсӧ коми кывйӧ. Мед найӧ оз вышшитчыны да оз укӧрайтны миянлысь медся мича, медся муса, медся шоныд коми кывнымӧс, – бурсиис янсӧдчигӧн Сюзяыбысь Антонина Ветошкина.
А ми аттьӧалам Кӧрткерӧсса библиотекаын уджалысьясӧс да торйӧн нин Валентина Владимировна Шестаковаӧс тайӧ шоныд аддзысьлӧмсӧ котыртӧмысь.
Сё пасибӧ тіянлы чужан кывнымӧс пыдди пуктӧмысь, сійӧс радейтӧмысь да сӧвмӧдны зільӧмысь.
Елена ПЛЕТЦЕР.
<> Снимокъясыс авторлӧн да Светлана ИВАШЕВАЛӦН.