Потаныс вӧлӧма шензьӧдана мича да, Ириналы окота лоӧма кыны сэтшӧмӧс жӧ. Нӧбасигас на аддзӧма кыӧм потансӧ ӧтуввезйысь да веськыда «ӧзйӧма» нылукыслы татшӧмсӧ вӧчны кӧсйӧмнас. А сійӧс збыльмӧдӧм могысь сӧмын куимтор и колӧма: гамак кыан кӧв, кӧрт профиль да кужӧмлун…
Мира чужӧм бӧрын, кор Ирина Рочевалӧн прӧст кадыс вӧлыштӧма, босьтчӧма уджӧ. Некутшӧм мастер-классӧ абу ветлӧма, а ачыс, ас кежсьыс воськов бӧрся воськов пырӧдчӧма уджаланногас. Корсьӧма и кӧрт подулӧн могмӧдны дась мастерӧс.
Кольӧмвося августын кыӧм кофе рӧма медводдза креслӧыс ӧні мичмӧдӧ керкасӧ. Гортсаясыс зэв ёна радейтӧны сэні пукавны. Креслӧыс кутӧ сё ветымын килограммӧдз сьӧкта. Сійӧс позьӧ пысавны-крепитны став сикас пӧтӧлӧкас, а окота кӧ петкӧдны ывлаӧ, тырмымӧн ньӧбны торъя стойка.
Талун кежлӧ Ирина Рочевалӧн куим удж дась нин, нӧшта кыкӧс вӧчӧ заказ серти. Татчӧ колӧ пасйыны, гамак кӧвъя (сійӧс вӧчӧма полиэфир сунисысь) потан-пуклӧсыс зэрысь ни шондіысь оз пов, да сійӧс кокни весавнысӧ.
– Ӧні мен окота нин кыны нӧшта и лэбув. Татшӧмыс зэв мичаа видзӧдсьӧ, сійӧн кокни вӧдитчынысӧ, да и 250 килограммӧдз сьӧкта кутӧ! – шуӧ Ирина. – А креслӧ дорӧ ме содтӧд вура рӧм сертиыс лӧсялана юрлӧс. Чайта, и водзӧ сӧвмӧда ассьым сям-кужӧмлунӧс.
<> Игорь КОЛЕСОВ. Комиӧдіс Елена ПЛЕТЦЕР.
Снимокъясыс Ирина РОЧЕВАЛӦН гортса архивысь.