Коми Республикаса водзмӧстчысь томулов видлісны быдсикас проект дасьтӧм-гижӧмын сямсӧ. Татшӧм позянлуныс налӧн лои Коми Республикаса госслужба да веськӧдлан академиялӧн «Институты специальных технологий севера» НП-кӧд «Profesarium: Кампус лидеров изменений» уджтас ӧтув збыльмӧдӧмӧн.
Тайӧ проектыс мӧдысь нин вермис президент грантъяс фондлӧн конкурсын, мый тӧдчӧдӧ томулов пӧвстын сылысь коланлунсӧ. «Profesarium» велӧдчан программаӧн ышӧдӧны регионса ныв-зонмӧс водзмӧстчыны проект дасьтан-збыльмӧдан да предпринимательство сӧвмӧдан уджын.
Кольӧмвося ноябрсянь таво апрельӧдз «Profesarium: Кампус лидеров изменений» проект серти тӧдӧмлун-сямсӧ содтісны кар-районъясысь 160 ныв-зон: Сыктывкарса И.А.Куратов нима педколледжысь, Коми агропромышленнӧй, политехническӧй, лесопромышленнӧй, автомеханиче-скӧй техникумъясысь, сервис да связь, торгово-экономическӧй колледжъясысь студентъяс да челядь керкаясысь быдтасъяс.
Сизим тӧлысьӧн томулов велӧдчисны гижны республикалы тӧдчана да колана бизнес-проектъяс, а сідзжӧ видлісны ӧтуввез пыр вӧзйыны ассьыныс тӧвар-услугасӧ йӧзыслы.
Коми госслужба академияын пасйӧны, «Profesarium: Кампус лидеров изменений» кодь уджтасъясыс пӧ выль тӧдӧмлун кындзи сетӧны томуловлы позянлун видлыны асьнысӧ выль уджсикасын. А петкӧдчӧ тайӧ налӧн аслыспӧлӧс проектъясас.
Со, шуам, Сыктывкарса автомеханическӧй техникумын велӧдчысьяс Максим Перевозчиков да Владислав Конаков лӧсьӧдчӧны збыльмӧдны ассьыныс уджтасъяссӧ чужан Сыктывдін районас. Максим чужӧма-быдмӧма Ыбын, Владислав – Часын.
Владислав кӧсйӧ могмӧдны сиктса войтырӧс пывсянӧн. «Сикт-грездсаыдлы душ-ваннаыд оз ков, найӧ окотапырысь мыссьӧны-корӧсясьӧны пывсянын. А жарыд бура кутчысьӧ, да и кӧрыс чӧскыд буретш керйысь лэптӧм пывсянын. Проектсӧ дасьтытӧдз юаси рӧдвужлысь да, ставныс ошкисны буретш татшӧмсӧ жӧ», – висьталіс Владислав Конаков.
А со Максим Перевозчиков лӧсьӧдчӧ восьтыны мотопрокат. Республикаын пӧ талун мотоциклӧн журъялыштны вӧзйысьыс лыда, а кӧть регыдик кежлӧ сэтчӧ пуксьывны окотитысьыс, ок, уна. «Техникум помалӧм бӧрын ме кӧсъя ас вылӧ уджавны босьтчыны. Бур, академияын миянлы тыр-бура гӧгӧрвоӧдісны, кыдзи котыртчыссьӧ самозанятӧйлӧн удж-нокыс», – пасйис Максим.
Сыктыв районысь тшӧтш некымынӧн пырӧдчисны «Profesarium: Кампус лидеров изменений» уджтасӧ. Шуам, Визинын чужлӧм ныв, Сыктывкарса И.А.Куратов нима гуманитарно-педагогическӧй колледжын велӧдчысь Дарья Куратова дасьтӧма «Челядь челядьлы» социальнӧй проект. Сы серти позяс велӧдны тыр арлыдтӧмъясӧс видзчысьӧмӧн вӧдитчыны ӧтуввезйӧн. И вӧчны тайӧс кутасны накӧд тшӧтшъяясыс. «Челядь челядьлы» велӧданногсьыс водзӧсыс ыджыдджык, ӧд ныв-зон «ӧти гы вылынӧсь» да бура гӧгӧрвоӧны ёрта-ёртсӧ. Та дырйи нӧшта и аслыссикас наставникалӧм артмӧ: ӧти том морт велӧдӧ-уставитӧ мӧдӧс. Но медвойдӧр, дерт, аслыс колӧ велӧдчыны», – висьталіс Дарья.
Студентка сідзжӧ пасйис, «Кампусын» велӧдчигӧн пӧ мойвиис тӧдмасьны уна аслыспӧлӧс, зэв водз-мӧстчысь йӧзкӧд. Таысь кындзи пӧ нӧшта на и проект гижны, смета дасьтыны, колана тӧвар дон туявны велалі.
Сыктыв вожысь нӧшта ӧти студентка – Сыктывкарса сервис да связь колледжын велӧдчысь Наталья Лапшина. Ныв чужӧма-быдмӧма Ёльбаза посёлокын, ӧні велӧдчӧ «Пошта йитӧд» нырвизьын. Натальялӧн проектыс чача кыӧм кузя, и нимыс тешкодиник – «Вязани лапки». «Кампусын велӧдчигӧн ме ёнджыка куті эскыны ас вын-сямӧ да гӧгӧрвои, мый радейтана удж-нокнад тшӧтш позьӧ нажӧвитчыны», – кывкӧрталіс ныв.
<> Иван ПОПОВ.
Снимокъясыс Коми Республикаса госслужба да
веськӧдлан академияысь пресс-службалӧн.