– Школаын велӧдчигӧн на ме гӧгӧрвои,
мый кӧсъя да верма отсавны йӧзыслы, – висьталӧ Коми Республикаса кардиодиспансерысь операционнӧй медсестра Елена Езовских. – Татшӧм арлыднад эськӧ унаӧн сорсьывлӧны профессия бӧрйӧмнас, а ме со гӧгӧрбок ставсӧ артыштӧмӧн восьлалі аслам туйӧд да пыри босьтны тӧдӧмлун Сыктывкарса медицина училищеӧ. Сэні нин пырӧдчи хирургияӧ, а операция вӧчанінын практика дырйи гӧгӧрвои: меным сьӧлӧм серти сестралӧн хирургкӧд ӧтувъя уджыс. И буретш на сайын морт олӧмыс.
Медучилище 1993 воын помалӧм бӧрын Елена Викторовна кутчысьӧма республикаса больничаын уджӧ, а сэсся тӧдмалӧма регионын регыдъя кадӧ ыджыд кардиодиспансер восьтӧм йылысь да мӧдӧдчӧма содтыны тӧдӧмлун-сямсӧ Москваын, академик Б.В.Петровский нима хирургия наука шӧринын.
Буретш сэні Елена Езовских пыдісянь тӧдмасьӧма аортокоронарнӧй шунтирование, сьӧлӧм лапӧд протезируйтан, мукӧд сьӧлӧм висьӧм бырӧдан, Росс да Бенталл де Боно ног операция вӧчанногӧн да выльӧн босьтӧм дипломӧн воӧма республикаса кардиодиспансерӧ.
– 1998 восянь ӧнӧдз уджала диспансерын операция вӧчанінын. Менам вылыс квалификация. Та кадӧн велалі уна методикаӧ нин: отсася ангиография, сьӧлӧм удж бурмӧдан да эндоскопия операция вӧчигӧн, – пасйӧ Елена Викторовна. – Дерт, и водзӧ содта тӧдӧмлун-сямӧс, пырӧдчылі академик В.И.Шумаков нима ФНЦТИО-ын нуӧдан научно-практическӧй конференцияясӧ.
Елена Езовских серти, аслад сям-кужӧмлуннад быть колӧ юксьыны быдмысь войтыркӧд, наставитны том уджъёртъястӧ. Талун кежлӧ сылӧн тӧжд-дӧзьӧр улынӧсь кыкӧн.
– Прӧст кадӧ, кӧть эськӧ татшӧмыс и гежӧда вичмывлӧ, пырӧдча спортӧ, йӧкта. Тӧвнас зэв ёна радейта исласьны конькиӧн. Йӧзтӧ бурдӧдігӧн и ас дзоньвидзалун йывсьыд вунӧдны оз позь, – кывкӧрталіс Елена Викторовна.
Снимок вылын: кардиохирург Артём Голубевкӧд сьӧлӧм заведитӧм бӧрын.
<> Иван ПОПОВ. Комиӧдіс Елена ПЛЕТЦЕР. Снимокъясыс ӧтуввезйысь.