Сосногорск районса шӧр больничаысь
хирург Виталий Дунаев чужӧма Москваын. Бать рӧдас ставныс медикъяс да, тайӧ жӧ туйӧдыс мунны окотитӧма челядьдырсяньыс.
Помалӧма Москваын А.И.Евдокимов нима медико-стоматологическӧй университет. Уджас сям-кужӧмлунсӧ вочасӧн содтӧма юркарса государственнӧй да асшӧра клиникаясын, та дырйи тшӧтш велӧдчӧма «векни» специальносьтъясӧ.
Виталийлӧн висьталӧм серти, Сосногорскӧ воӧм мысьт вель дыр велалӧма выльнога уджас. «Земский доктор» уджтас серти сылы вичмӧдӧмаӧсь 1 миллион шайт, да и оланіннас больничаыс отсалӧ.
Виталий Дунаевлӧн корӧмӧн Сосногорскса бурдӧдчанін могмӧдӧмаӧсь содтӧд оборудованиеӧн, да том врач ӧні зільӧ ыджыдджык водзӧсӧн. Талун сійӧ кывкутӧ йӧзыслӧн вир сӧн лючки удж понда – флебологалӧ. Нуӧдӧ УЗИ-ӧн вӧдитчӧмӧн приём, а сідзжӧ ӧнія выль технология пыртӧмӧн вӧчалӧ операция. Пасъям, водзынджык татшӧм позянлуныс Сосногорскын эз вӧв.
– Республикаын олысьяслӧн талун эм позянлун веськавны выль технологияа малоинвазивнӧй операция вылӧ. Сійӧ вӧчсьӧ ӧдйӧ да дойдавтӧг. Висьысьӧс сійӧ жӧ лунас лэдзам гортас, – висьталӧ Виталий Дунаев.
Эндовазальная лазерная облитерация вен нижних конечностей – тадзи шусьӧ варикоз бырӧдан ӧнія операция-бурдӧданногыс. Татшӧмӧн медся тшӧкыда вӧдитчӧны мир пасьталаын, а талун пыртӧма уджӧ и Сосногорскса шӧр больничаын.
Водзӧ вылӧ тӧжд-мог йывсьыс Виталий шуӧ тадз: «Окота пыртны уджӧ сӧн выльнога бурдӧданног, отсавны кыдз позьӧ унджык нёрпалысьлы. Ӧд сӧн петӧмыд абу сӧмын мисьтӧм, сысянь пансьӧ варикоз, тромбоз, тромбофлебит».
<> Иван ПОПОВ. Комиӧдіс Елена ПЛЕТЦЕР. Снимокъясыс ӧтуввезйысь.