Ми водзӧ тӧдмӧдам газет лыддьысьясӧс 
«Земский доктор» уджтасӧ пырӧдчӧм медработникъяскӧд. Талунъя гӧсьт – зумыд этш-ӧбичаа томиник ныв, коді велӧдчӧм бӧрас бергӧдчис чужанінас отсавны ас сиктсаяслы.
Изьва районысь врач амбулаторияысь фельдшер Александра Истомина татчӧсса. Дас ӧти класс помалӧм бӧрын пырис босьтны «Лечебное дело» специальносьт серти тӧдӧмлун Сыктывкарса
И.П.Морозов нима медицина колледжӧ.
– Велӧдчыны мунігӧн нин ас кежысь тӧді, мый кута уджавны чужанінын. Збыльвылас сідз и артмис, – висьталӧ том ныв.
Александралӧн ыджыд батьыс нэмсӧ зільӧма Койю посёлокын фельдшерӧн да, матыссаыс тшӧкыда висьтавлӧмаӧсь нывлы сылӧн удж-нок йывсьыс. Тадзи и чужӧма медикӧн лоны кӧсйӧмыс. Ышӧдӧма нӧшта и сійӧ, мый медицинаыд век колана.
Ӧні Александра зільӧ фельдшерӧн чужан сиктсяньыс 40 километр ылнаын. Сылӧн дӧзьӧр улын – Кыдзкар сикт да Чика грезд, матӧ 900 морт.
– ФАП-ын уджалігад быдсикас тӧжд-нокыс вичмылӧ. Та понда кылан асьтӧ торйӧн нин коланаӧн да тӧдчанаӧн. И лунтырнас кӧ отсалан кӧть ӧти мортлы, гӧгӧрвоан, мый луныс весьшӧрӧ эз коль, – юксьӧ видзӧдласнас Александра.
Уджъёртъясыс вочаалӧмаӧсь нылӧс шоныда да восьса сьӧлӧмӧн. Дерт, нимкодь лоӧма и сиктсаяслы.
– Ставӧн виччысьӧмаӧсь локтӧмӧс да окотапырысь отсасисны быд ногыс, – висьталӧ Александра.
Том фельдшерлы уджыс сьӧлӧм сертиыс, сӧмын майшӧдлӧ юрсиктсянь ылыслуныс да шогмытӧм туйыс. Вермас пӧ лоны, рӧспута дырйи медикаментсӧ ас кадӧ оз вайны, либӧ висьысьӧс больничаӧ нуны сьӧкыд лоӧ.
Александра Истомина могмӧдӧ кыдзкарсаӧс да чикасаӧс колана лекарство-препаратӧн, нуӧдӧ приём, урчитӧ бурдӧданног, пистиалӧ да вӧчӧ мукӧд сикас удж.
* * *
Пасъям: «Земский доктор» уджтас серти Александралы вичмӧдісны 1 миллион шайт да могмӧдісны оланінӧн. Ставнас 2022 воӧ «Здравоохранение» нацпроект серти Коми Республикаын инасис удж вылӧ 300 гӧгӧр врач да 800-ысь унджык медработник.
<> Иван ПОПОВ. Комиӧдіс Елена ПЛЕТЦЕР. Снимокъясыс ӧтуввезйысь.