Неважӧн на Луздор районса Абъячой сиктын восьтісны «Образование» нацпроект серти кыпӧдӧм школа. Проектас индӧма водзӧ нуӧдны тайӧ уджсӧ.
Та йылысь регионса правительствоын чукӧртчылігӧн юӧртіс ӧтувъя заказчик службаӧн веськӧдлысьлысь удж вӧчысь Александр Воробьёв.
Сылӧн кывъяс серти, ӧні «Образование» нацпроект сертиыс Комиын стрӧитӧны кык велӧдчанін. Ӧтиыс – Эжва районса Емваль микрорайонын 850 ныв-зон вылӧ артыштӧм школа. Стройматериал донсялӧмсӧ тӧд вылын кутӧмӧн сійӧс кыпӧдӧм вылӧ ковмас 1 миллиард 84 миллион шайт. Уджсӧ эштӧдны индӧма 2023 воӧ.
Изьва сиктын стрӧитӧны 600 велӧдчысь вылӧ артыштӧм школа. Сэні вӧчӧны нин пытшкӧсса уджъяс.
–Ми аддзам, кутшӧм ыджыд удж вӧчсьӧ миян республикаын «Образование» нацпроект серти.
Ӧні миянлы колӧ ас кадӧ эштӧдны стрӧйбаяссӧ да могмӧдны школаяссӧ ӧнія кадыслы лӧсялана выль оборудованиеӧн, – чукӧртчылӧм дырйи сёрнисӧ сигӧртігӧн пасйис регионса правительствоӧн веськӧдлысьӧс вежысь Лариса Карачёва. – Ми ог сӧмын стрӧитӧй, но и капитальнӧя дзоньталам велӧдчанінъяссӧ, а сідзжӧ «Земский учитель» программа отсӧгӧн ышӧдам педагогъясӧс уджавны сиктса школаясын.
* * *
Содтӧд пасъям, таво республикаса кар-районын 40 школа шуӧма могмӧдны матӧ 127,9 миллион шайт дон ӧнія выль велӧдчан оборудование-аппаратураӧн.
Торйӧн кӧ, лоӧ ньӧбӧма 1.373 ноутбук, 68 интерактивнӧй дӧска, 52 МФУ, 68 видеокамера да урок вылын велӧдысьлы да челядьлы уна мукӧд коланатор.
<> Гижӧдсӧ дасьтiс Павел СИМПЕЛЕВ.
Снимокъясыс ӧтуввезйысь.