Юркарса Кӧджпом-Читын «Демография» нацпроект серти кыпӧдісны 5-ӧд номера детсадлысь мӧд корпус. Артыштӧма сійӧс 270 посниулов вылӧ, на пиысь 120-ыс лоасны куим арӧсӧдз дзолюкъяс.
Татшӧм жӧ детсадъяс водзті вӧлі стрӧитӧма Сыктывдінса Выльгортын да юркарса Эжва районын.
–Кӧсйим лэптыны 110 зонпосни вылӧ артыштӧмӧн, но сэсся гӧгӧрвоим, мый этша лоас. И шуим стрӧитны бассейна ыджыд детсад. Та могысь ковмис корсьны 441 миллион шайт. Республикаса бюджетысь вӧлі торйӧдӧма 317 миллион, федеральнӧй сьӧмкудйысь воис 124 миллион шайт, – висьталіс Коми Республикаса юралысь Владимир Уйба. – Детсадйыс зэв колана, ӧд сэні кага оз сӧмын кад колляв, кор бать-мамыс уджалӧны, сэні сійӧ сӧвмӧ.
А челядьӧс сӧвмӧдӧм могысь выль стрӧйбаын эм став коланаыс: музыкаӧ да физкультураӧ велӧдан жыръяс, серпасасян вежӧс, бассейн.
Муниципалитетӧн вичмӧдӧм 15 миллион шайт дон ньӧбӧмаӧсь чачаяс, пызан-улӧс, дозмук, мукӧд коланатор.
Колӧ пасйыны, выль школа-детсад кыпӧдӧны и Сыктывкарын, и мукӧд кар-районын.
–Велӧдчанін, челядьӧс видзанін, физкультура комплекс стрӧитігӧн ми мӧвпалам аскиа лун йылысь. Сэні быдмысь войтыр сӧвмӧны, ичӧтсяньыс сибӧдчӧны сьывны, йӧктыны, радейтны чужан мусӧ, – пасйис Владимир Уйба. – Ӧні, кор миян страна тышкасьӧ неонацизмлы паныд, ми збыльмӧдам Россияса президентӧн сувтӧдӧм мог – кыпӧдам татшӧм стрӧйбаяс.
Бӧръя куим вонас Сыктывкарын, Луздорса Абъячойын, Эжва йывса Помӧсдінын, Вуктыл районса Дутовын, Сыктыв вожса Визинын да Сыктывдінса Час сиктын вӧлі восьтӧма 3.471 велӧдчысь вылӧ артыштӧм сизим школа, а сідзжӧ детсадъяс, кытчӧ вермасны ветлыны 1.355 дзолюк.
<> Гижӧдъяссӧ дасьтіс Павел СИМПЕЛЕВ.
Снимокъясыс ӧтуввезйысь.