Кольӧм вежонӧ Коми Республикаса семьяяс сӧветын зільысь-водзмӧстчысьяс видлалісны нывбаба-мамъяслысь да челядьлысь дзоньвидзалун видзӧм, а сідзжӧ налы отсӧг сетӧм йылысь юалӧмъяс.
Сёрнисӧ нуӧдіс регионса юралысь Владимир Уйба. Чукӧртчылӧм дырйиыс вӧліны тшӧтш исполнительнӧй власьт тэчасысь да Госсӧветысь чинаяс, республикаса учреждениеясӧн веськӧдлысьяс, общественнӧй котыръясӧн юрнуӧдысьяс, православнӧй вичкоын служитысьяс.
–Комиын и ӧнія сьӧкыд кадӧ семьяяслы отсӧгыс вичмӧ, – чукӧртчӧмаяс дорӧ видео пыр шыӧдчӧмӧн пасйис Россия Федерацияса Госдумаысь депутат, регионса семьяяс сӧветса сопредседатель Анна Кузнецова. – Странаын ми зілям вӧчны сідзи, мед быд кага чужигӧн семьялӧн олӧмыс бурмыштіс. Тӧдчана и нывбабалӧн дзоньвидзалун бӧрся нӧбасигас на видзӧдны, а та могысь колӧны бур специалистъяс.
Депутатлӧн кывъяс серти, Комиысь уна челядя семьяяслы отсалан опытсӧ колӧ эськӧ паськӧдны и мукӧд регионын.
Сідз, республикаын 2021 восянь семьялы, кӧні быдтӧны сизим да унджык челядьӧс, вичмӧдӧны сьӧм ньӧбны патера да уна пуклӧса машина. Тавосянь оланін босьтны сертификатсӧ сетӧны и квайт ныв-пи быдтысь семьялы.
Республикаын пӧртӧны олӧмӧ и челядьдыр доръян план. Урчитӧма сійӧс дас во кежлӧ.
Бӧръя кык вонас ёнмӧдӧма пузчужӧм кагаяслы отсалан бурдӧдчанінъяслысь материально-техническӧй подувсӧ, регионса бюджетысь 271 миллион шайт дон ньӧбӧма оборудование.
Челядьлӧн больничалы кыпӧдӧны содтӧд выль стрӧйба, кӧні лоас торъя педиатрия юкӧн.
2022 во помын вӧлі вынсьӧдӧма Комиын неонатальнӧй скрининг сӧвмӧдан программа, и 2023 во заводитчӧмсянь видлалӧмаӧсь нин 1.491 дзолюкӧс, на лыдысь 25 нывкалысь да зонкалысь аддзӧмаӧсь висьӧм.
Кольӧм во регионын ЭКО отсӧгӧн чужӧма 171 кага.
Республикаса быд кар-районын отсалӧны нӧбасьысь нывбабаяслы венны сьӧкыдлунъяс.
Коми Республикаса правительство сувтӧдӧма ас водзас мог дасьтыны специалистъясӧс да мӧдӧдӧ школа помалысьясӧс велӧдчыны медицина вузъясӧ. Сиктӧ уджавны воӧм врачьяслы «Земскӧй доктор» программа серти мынтӧны сьӧм. 2022 воын республикаса медицина учреждениеясӧ локтӧма 184 врач, джынйыс на пиысь – мукӧд регионысь.
–Медицинаын зільысьясӧс ышӧдӧм могысь ми кыпӧдім фельдшеръяслы 9 керка. Тайӧ уджсӧ кутам нуӧдны и водзӧ, могмӧдны оланінӧн тшӧтш и врачьясӧс, – висьталіс республикаса юралысь Владимир Уйба. – Правительстволы колӧ нин видзӧдлыны, кымын олан керка ковмас кыпӧдны 2024 воын, а муниципалитетъяслы торйӧдны та могысь му участок.
<> Гижӧдсӧ дасьтіс Павел СИМПЕЛЕВ.
Снимокъясыс ӧтуввезйысь.