Коми Республикаса правительство да Россияса промышленносьт да вузасьӧм кузя министерство костын сёрнитчӧм серти федеральнӧй уджтасӧ пырӧдчӧмӧн регионӧ вайӧма школаын велӧдчысьяслы ӧкмыс автобус, а сідзжӧ мобильнӧй медицина комплекса сизим ГАЗ машина.
Коми Республикаса правительствоӧн веськӧдлысьӧс вежысь Лариса Карачёва сетіс выль машина ключьяссӧ муниципалитетъясӧн юрнуӧдысьяслы да регионса юралысь Владимир Уйба нимсянь чолӧмаліс найӧс автопаркнысӧ выльмӧдӧмӧн.
– Миян республикалы, кӧні лунвывсянь войвылӧдз да рытыввывсянь асыввылӧдз уна сё километр, торйӧн нин тӧдчана выльмӧдны-бурмӧдны медицина да велӧдан юкӧнъясын автотранспорт, медым сикт-грездын олысьяс вермисны ас кадӧ шыӧдчыны мобильнӧй ФАП-ӧ врач-фельдшер дорӧ отсӧгла, а челядь – воӧдчыны школаӧ шоныд бур автобусӧн, – чукӧртчӧмаяс дорӧ шыӧдчис Лариса Карачёва.
Ӧнія выль оборудование-аппаратураа татшӧм медицина комплексъяссӧ шуӧма мӧдӧдны Кӧрткерӧс, Койгорт, Удора, Емдін, Луздор, Мылдін районъясса да Печора карса больничаясӧ. Мобильнӧй ФАП-нас кутасны вӧдитчыны этша йӧза сикт-посёлокын, кӧні олысьясыслӧн лоас позянлун кар-юрсиктӧ ветлытӧг туявны ассьыныс дзоньвидзалунсӧ да бурдӧдчыны, позьӧ шуны, гортас.
Матысса кадӧ нин выль автобусӧн кутасны новлӧдлыны школаӧ да урок бӧрын гортас Чилимдін районса Окунёв Носысь да Замежнӧйысь, Кӧрткерӧс районса Калятыысь, Печора бердса Лугӧвӧйысь, Вуктыл районса Дутовысь, Кулӧмдін районса Пожӧгысь, Удораса Благоевысь, Емдін сиктысь, а сідзжӧ Сосногорскса коррекционнӧй школа-интернатысь челядьӧс.
Таво жӧ федеральнӧй программа серти регионса кар-районысь школаяслы шуӧма вичмӧдны нӧшта 42 выль автобус. <>
Гижӧдсӧ дасьтіс Александра АРТЕЕВА.
Снимокъясыс ӧтуввезйысь.