«Дзоньвидзалун» нацпроект серти Интаын водзӧ дзоньталӧны-выльмӧдӧны медучреждениеяс.
Карса больничалӧн поликлиникаын ремонт вылӧ веськӧдӧма нин 50 миллион шайт, а став уджыс сувтас 93,5 миллион шайт дон. Дзоньтасьны босьтчӧмаӧсь и хирургия корпусын.
Та йылысь юӧртіс больничасьыс главврач Валентина Копченкова Интаӧ республикаса правительствоӧн веськӧдлысьӧс вежысь Лариса Карачёвалӧн волігӧн аддзысьлӧм дырйи.
«Дзоньвидзалун» нацпроектлӧн регионса программа вылӧ подуласьӧмӧн позьӧ оз сӧмын дзоньтасьны да медоборудование-аппарат ньӧбавны, но и республикаса сикт-грездын ФАП-амбулатория кыпӧдны. Торйӧн кӧ, таво шуӧма восьтыны выль ФАП Абезьын, а 2025 воын – Петруньын.
Таысь ӧтдор, нацпроект весьтӧ жӧ тӧдчымӧн лои выльмӧдӧма карса больничаысь автопарк. 2021 восянь содтӧд ньӧбӧма 18 автомашина. Таво ваясны нӧшта куимӧс.
Больничаын уджалысьяс вӧдитчӧны выль оборудование-аппаратъясӧн, на лыдын ӧнія кадся эндоскопъясӧн да маммографӧн.
Инта карса больнича подулын шуӧма восьтыны и ПЦР-лаборатория, медым врачьяс вермисны ӧдйӧджык да стӧчджыка пуктыны висьысь мортлы диагнозсӧ.
Сэк жӧ, кыдз пасйис Лариса Карачёва, зэв тӧдчана тырвыйӧ уджӧдны выль бурдӧдчан оборудованиесӧ. Войвыв кытшбердса карын эм кодлы тайӧс вӧчнысӧ. Бӧръя куим воӧн больничаӧ удж вылӧ босьтӧмаӧсь 23 врачӧс да 48 фельдшер-медсестраӧс. Таво нӧшта воасны кык анестезиолог-реаниматолог, врач-невролог да участокса терапевт. А локтан воын виччысьӧны хирургӧс, офтальмологӧс, оториноларингологӧс да терапевтӧс.
<> Гижӧдсӧ дасьтіс Александра АРТЕЕВА.
Снимокыс ӧтуввезйысь.