Быдтыны тӧлка да кывкутысь йӧзӧс

Енбиа том войтырлӧн академияса попечительяс сӧветлӧн чукӧртчылігӧн видлалісны, кутшӧм нырвизьясын кутас сӧвмыны искусствоын, спортын да наукаын водзмӧстчысь челядьлы отсӧг сетан республикаса шӧрин.

 

Сочиса «Сириус» кодь жӧ тайӧ шӧринсӧ Комиын вӧлі котыртӧма 2017 воӧ.

Уджсӧ сійӧ нуӧдӧ куим туйвизьын: «Наука», «Искусство», «Спорт».

2021 восянь шӧриныс кывкутӧ и регионса велӧдчысьяс костын ставроссияса олимпиадаяс котыртӧм вӧсна.

Кольӧм во Коми Республикаысь кӧкъямыс ныв-зон лоисны вермысьяс лыдын.

Олимпиадаын 1-ӧд места шедӧдысьяслы сетӧны ветымын сюрс, 2-ӧд да 3-ӧд места босьтысьяслы – комын сюрс шайт.

2021-2022 воясӧ шӧринӧн котыртлӧм сё дас сизим сменаын тӧдӧмлунсӧ кыпӧдӧма 2.600 ныв-зон, содтӧд комын программа серти велӧдчӧмаӧсь нёльсёӧн.

Республикаысь 1.617 том мортӧс пыртӧма енбиа да ыджыд сяма войтырлӧн Россияса реестрӧ, а регионса реестрын пасйӧма 3.500 велӧдчысьӧс.

– «Образование» нацпроектлӧн медшӧр могъяс лыдын индӧма лӧсьӧдны став коланасӧ, медым челядь быдмисны тӧлка да кывкутысь йӧзӧн.

Медым збыльмӧдны могсӧ, колӧ ӧтув зільны йӧзӧс велӧдан, культура, спорт да наука учреждениеяслы, а республикаса гырысь предприятиеяслы – вичмӧдны налы отсӧг.

Шӧринын вӧдитчӧны ӧнія кадыслы лӧсялана оборудованиеӧн. Аттьӧала найӧс, кодъяс отсалӧны енбиа том войтырлӧн академиялы водзӧ сӧвмыны, – висьталіс чукӧртчылігас регионса юралысь Владимир Уйба.

 

<>  Гижӧдсӧ дасьтіс  Павел СИМПЕЛЕВ.

Снимокыс ӧтуввезйысь.

Быдтыны тӧлка да кывкутысь йӧзӧс

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх