Чайтсис, Снежана вӧчас спортын карьера, кыпӧдчас вылӧ-вылӧ. А кыдзи нӧ мӧд ногыс? Батьыс ӧд лыжиӧн котралӧм кузя тренер. А нылыслӧн первой разряд нин, петкӧдчӧ районса сборнӧйын да весиг шедӧдіс нин республикаса первенствоын призёр ним. А тренировкаӧдзыс разминка пыдди котралӧ кросс Изьвавомсянь Кельчиюрӧдз, кӧні батьыс нуӧдӧ секция…
Дерт, спортын кӧ Снежана нималіс, Николай Ивановичлы вӧлі эськӧ, ок, нимкодь, но падмӧдіс виччысьтӧм мытшӧд. И тайӧ мытшӧдыс вӧлӧма венны позьтӧм. Квайтӧд классянь Снежана Филиппова ветлӧма сиктса клубӧн веськӧдлысь Анна Меньшиковаӧн юрнуӧдӧм улын йӧктан студияӧ. Нывъяс аддзӧмаӧсь ӧнія йӧктӧмӧ велӧдӧм кузя юӧрсӧ да гижӧдчӧмаӧсь сэтчӧ. А бӧрыннас кӧть эськӧ гӧгӧрвоӧмаӧсь, мый велӧдчӧны йӧзкостса ног кокнаныс печласьны-вӧрӧдны, да хореографияыс сы выйӧдз нин мусмӧма, студияысь мунны некод нин абу кӧсйӧма.
Школа помалігкежлӧ Снежана стӧча нин тӧдӧма: кутас водзӧ велӧдчыны йӧктыны, сӧмын профессиональнӧя нин. Ныв тшӧкыда пыравлӧма культура колледжлӧн сайтӧ, тӧдмасьӧма быдсикас юӧрӧн. Культура керкаын занятиеяс кындзи дасьтысьӧма и гортас. Видзӧдӧма видеороликъяс, и со велалӧма нин пуксьыны шпагат вылӧ да вӧчны мукӧд элемент.
2016 во. Снежана Филиппова пырӧма босьтны тӧдӧмлун В.Т.Чисталёв нима культура колледжын хореография творчество нырвизь серти. Велӧдчӧмыс пансьӧма кӧкъямыс асылын. Нёль «пара», а сы бӧрын – «Пелысь мольяс» йӧктан ансамбльын репетицияяс… Татшӧмторйыс абу быдӧнлы вын сертиыс, но нывлы отсалӧма спортын водзмӧстчӧмыс да мичаа-бура йӧктыны ыджыд кӧсйӧмыс.
Яков верӧспуыскӧд найӧ тӧдмасьлӧмаӧсь ичӧтдырйиыс на лыжиӧн котралан секцияын. 2018 воын гозъялӧн чужӧма Виктория нылук. Изьвавомысь том хореограф пукалӧма на гортас кагаыскӧд, а сійӧс коралӧмаӧсь нин районса культура керкаӧ удж вылӧ. Том нывбаба бӧрйӧма Галпиын культорганизатор удж да такӧд тшӧтш корсьӧма посни ныв-зон пӧвстысь йӧктыны окотитысьясӧс. Сэк жӧ уджавны босьтчӧмыс веськалӧма пандемия ыпнитан кадӧ, да занятиеяссӧ тырвыйӧ нуӧднысӧ абу артмӧма. Кыдзи нӧ выльӧн локтысьтӧ велӧдан йӧктыны дистанционнӧя? Да нӧшта на и гортас ас кежсьыс?!.
Тайӧ луныс вӧлӧма мукӧдыс кодь жӧ, нинӧм шензьӧданаыс лоны абу вермӧма. Но Снежана сьӧлӧмнас кылӧма: олӧмас мыйкӧ вужвыйӧныс вежсяс. И збыльысь, сьӧлӧмыс абу ылӧдлӧма: Снежана Филиппова дорӧ шыӧдчӧма Щельяюрса культура керкаын художествоа веськӧдлысь Наталья Иренёва да вӧзйӧма вуджны овны-уджавны ва вылын уджалысьяслӧн посёлокӧ. Том специалист кӧсйысьӧма мӧвпыштлыны, но мӧд лунас нин сылы звӧнитӧма культура керкаӧн веськӧдлысьыс Виктория Канева да шыасьӧмсяньыс нин гӧгӧрвоӧдӧма, мый бурыс лоӧ на дорӧ уджавны локтӧмсьыс. Виктория Ивановна тӧдчӧдӧма, мый медводдза видеороликсӧ видзӧдӧмсянь нин налы воӧма сьӧлӧм вылас йӧктӧмыс, торйӧн нин пуантынас.
Снежаналӧн Яковкӧд Кельчиюрын сӧмын на кыпӧдӧм ыджыд да шоныд керка, кытчӧ нӧ мӧдлаӧ вӧрзьӧдчасны, йӧз сиктӧ мунасны?.. Муннысӧ, дерт, оз мунны, но ӧд позьӧ ветлыны удж вылас рейсӧвӧй автобусӧн ли ас машинаӧн!
2021 вося февраль 1 лунӧ Щельяюрса культура керкаын босьтчис уджӧ выль балетмейстер. Снежана йӧзӧдӧ «ВКонтактеын» посёлокса котыръясын аслас группаясӧ волыны окотитысьясӧс бӧрйӧм кузя видеороликъяс. Чукӧстчысьыс ӧкмӧ вывті уна да, том специалист такӧдӧ асьсӧ, вочасӧн пӧ кодсюрӧлы дышӧдас да, дугӧдчасны. Но збыльвылас мунысьыс зэв этша.
Талун Снежана Филиппова районын медся нималана да радейтана хореографъяс лыдын. Асьныд думыштлӧй: сы дорын йӧктыны велӧдчӧны посёлокысь 80 верстьӧ, том да зонпосни. Первоклашкаяслы да выпускникъяслы – «Тандем», коймӧд да нёльӧд классын велӧдчысьяслы – «Улыбка», квайтӧдсаяслы – «Изюминка». Сизимӧд-кӧкъямысӧд классаяслӧн «Фэнтези», 8-10-ӧдлӧн – «Кассиопея». Таысь кындзи «Ритмикаӧ» котралӧны детсадсаяс, тшӧтш и балетмейстерлӧн нёль арӧса нылукыс. А таысь кындзи эм на и верстьӧ войтырлы «Фитнес-балет» да «Танго»!
– Дерт, ёна мудза. Но зільтӧгыд, мырсьытӧгыд олӧмад нинӧм он шедӧд. Сэсся ышӧдӧ-лӧньӧдӧ, мый вӧча ассьым радейтана удж, мый збыльмӧді ичӧтдырся гуся кӧсйӧмӧс, – висьталӧ Снежана Филиппова. – Ми петкӧдчылам ог сӧмын асланым посёлокын, тшӧкыда ветлывлам районса мукӧд сикт-грездӧ. Пырӧдчылам и быдсикас онлайн-конкурсӧ. Шуам, дзик на неважӧн лоим войтыркостса ордйысьӧмын первой степеня лауреатъясӧн.
Кодлӧнкӧ, гашкӧ, серамыс петас, но шойчча ме хореография пыр жӧ. Йӧктігӧн быттьӧ орчча тыдавтӧм мирӧ веськавла. Сэн пытшкын чӧжсьӧмсьыс мездыся, сэсь жӧ и выль сьӧлӧм-ловкылӧмсӧ гумлала. Сійӧ мирыс мойдын кодь мича, гажа, ас дорас чуксалана. Сійӧ тыр пластикаӧн, ритмӧн, сэн лайкыда шлывгӧм-вӧрӧмыс ӧтлаасьӧ шыладыскӧд. <>
Игорь КОЛЕСОВ.
Комиӧдіс Елена ПЛЕТЦЕР.
Снимокъясыс Снежана ФИЛИППОВАЛӦН гортса архивысь.