Выльлунӧ искусство гимназияса этношӧринын воссис «уЛОВи Love» выставка. Ассьыныс уджъяссӧ сэнi петкӧдлӧны фотоклубӧ волысь ныв-зон.
И пыр жӧ шыбитчис синмӧ, мый быдӧн ачыс мӧвпыштӧма, кыдзи бурджыка мыччӧдны видзӧдысьлы ассьыс снимокъяссӧ, медым сiйӧ дырджык сулалiс на дорын. Да мӧвпыштчис, мый эськӧ кӧсйӧма висьтавны фотографыс аслас уджын. Весиг этношӧринса кӧлуй-эмбурнас та могысь вӧдитчӧмаӧсь.
Со Виталия Бондаренко «Керка» нимӧн ӧтувтӧм снимокъяссӧ ӧшлӧма джодждӧраӧн вевттьӧм важ сундук вылӧ сувтӧдӧм печканъяс весьтӧ. Орччӧн жӧ и самӧваръяса да туисъяса пызан. Нывлӧн снимокъяс вылас татшӧм жӧ эмбур – и збыльысь быттьӧ керка вежӧсӧ веськалiн, весиг сынӧд кӧрсӧ кылан.
Екатерина Виктова фотографияяссӧ неыджыд гӧгрӧс пызан вылӧ пуктӧма – босьт киад да ӧти бӧрся мӧдӧс видзӧдав, Александра Куликова уджъяс дорас мичмӧдчанторъяс ӧшлӧма. Унджыксӧ аслас киӧн жӧ вӧчӧма.
Тимофей Устюжов выставка вылын петкӧдлӧ гортсаясыслысь портретъяс: мамыслысь, ыджыд мамыслысь, вокыслысь. Семьяыд пӧ – мирас медыджыд озырлуныс. И вензьыны он вермы – снимокъяссьыс муслунӧн, шудӧн ӧвтӧ. Мамыс, Антонина Анатольевна, отсалӧма пиыслы и выставка кежлас дасьтысьны, мамыс жӧ и фотоклубас вайӧдӧма.
Сергей Доронинлысь вӧр-ваа кык снимоксӧ ӧшинь торйӧдӧ. Ӧшиньсӧ джодждӧраӧн вевттьӧма, юрлӧс пуктӧма. Фотояс гӧгӧрыс ичӧтик дзоридзьяс, серпасъяс меститӧма. Жырсьыс петавтӧг быттьӧ вӧрӧ ли видз вылӧ веськалiн. Кык снимок пӧ и петкӧдла, найӧ аслым медъёна кажитчӧны да.
Таисия Халина журналистӧн мӧвпалӧ лоны да, фотография дорас та боксянь и матыстчӧ. Куим морткӧд сёрнитлӧма, интервью налысь босьтлӧма, тшӧтш и снимайтӧма – выставка вылас гижӧдъяссӧ и снимокъяссӧ петкӧдлӧ.
Кирилл Таравко уджъяс дорас Питер Адамслысь кывъяс вайӧдӧма: бур снимокыд пӧ мортлысь пытшкӧсса ловкылӧмсӧ петкӧдлӧ. И снимайтчигас найӧс и кутӧма тӧд вылас.
Миян ӧд велавсьӧма, мед фотографияын ставыс ясыда тыдалiс, а сiйӧ дзик мӧдарӧ вӧчӧма, пыр он и гӧгӧрво, мый сэнi. Кириллӧн фотограф удж вылӧ аслас видзӧдлас.
– Ми кӧсйим ӧтилаын петкӧдлыны ӧта-мӧдсьыс ёна торъялана снимокъяс, – висьталiс фотоклубӧн веськӧдлысь Людмила Ивановна Игушева. – Челядьтӧ кӧ он юк арлыд, класс серти, наысь зэв бур котыр вермас артмыны. Со и миян клубӧ чукӧртчисны-ӧтувтчисны ӧти музыкант, вит художник, кыкӧн – театр, нёльӧн – гуманитарнӧй юкӧнысь ныв-зон. Нӧшта квайтӧн помалiсны нин гимназияын велӧдчӧмсӧ, но фотографируйтчӧмысь эз эновтчыны. А медся ичӧтыс, Тимофей, кӧть и томджык мукӧдсьыс, но зэв тӧлка детинка.
Тимофейлы и дӧверитiсны вундыны выставка восьтан лентасӧ.
– Челядьтӧ оз ков тшӧктыны ас ногыд жӧ снимайтчыны. Налӧн аслас видзӧдлас, и мед эськӧ налӧн асланыс мӧвпъясыс тыдовтчисны снимокъясас.
И миянлы, видзӧдысьяслы, оз жӧ ков донъявны налысь вӧчӧмторсӧ веркӧса: со тайӧ уджыс меным кажитчӧ, а тайӧ – оз. Миянлы колӧ зiльны налӧн синмӧн видзӧдлыны фотояссӧ, – висьталiс ныв-зонлӧн уджъясӧн тӧдмасьӧм бӧрын фотограф Сергей Зиновьев.
И ныв-зон сыкӧд сӧгласӧсь, быд удж пӧ – тайӧ миян мӧвпъяслӧн, кӧсйӧмъяслӧн портрет.
И выставкаӧ пырӧдчысь ныв-зонлӧн портретъясыс петкӧдлӧны, мый мӧвпъясыс налӧн – югыдӧсь, кӧсйӧмъясыс – гырысьӧсь.
И сям-кужӧмыс тырмымӧн, медым збыльмӧдны гырысь кӧсйӧмъяссӧ. <>
Павел СИМПЕЛЕВ.
Снимокъясыс авторлӧн да фотоклубӧ волысьяслӧн.