Ясли-садйын нин тыдовтчӧ, кутшӧм морт быдмӧ. Воспитательлӧн, психологлӧн да мукӧд специалистлӧн та дырйи зільӧмыс зэв тӧдчана. Ӧд мам-бать быдтасыслысь унатор оз вермыны либӧ оз кӧсйыны казявны. Катшалы пӧ кӧть ракалы, быдӧнлы аслас челядьыс мича.
Республикаса юралысьлӧн Общественнӧй приёмнӧйын сёрниыс муніс буретш сад-яслиӧ ветлан арлыда челядь йылысь.
Сёрниыс пансис нывбабалӧн «веськыд йитӧда» телефон пыр шыӧдчӧмсянь. Сыктывкарса детсадъясын пӧ оз тырмы логопед. Бӧръя кадӧ пӧ буретш татшӧм специалистыс колӧ челядюловлы, унаӧн сёрӧн заводитӧны сёрнитны да. Бать-мамлы ковмӧ пӧ бокысь корсьны логопедсӧ да вештыны таысь уна сьӧм…
Сыктывкарса администрацияысь дошкольнӧй образование управлениеӧн веськӧдлысь Галина ДАЙНЕКО:
– Сыктывкарса детсадъясын збыльысь оз тырмы логопедыс да педагог-психологыс. И ми тӧдам, мый бӧръя кадӧ уна кагалӧн сёрниыс торксьӧма. Талун юркарса 21 сад-яслиын зільӧ 55 логопед да дефектолог. 66 детсадйын эм сідз шусяна компенсируйтан группа. Татшӧмсӧ котырталам быд во. Сідз, мӧйму вӧлі куим группа, таво – кык пӧв унджык нин. Но бать-мам пиысь унаӧн оз кӧсйыны сетны сэтчӧ кагуксӧ, виччысьӧны, кор восьтасны татшӧм челядьыслы торъя детсад. Но ӧд кадыс мунӧ, и кагукнысӧ бурдӧдны-велӧдны вермас лоны сёр.
Учреждениеын, кӧні татшӧм группаыс абу на, восьталӧны логопунктъяс.
Таысь ӧтдор Сыктывкарса 59 дошкольнӧй организацияын зільӧ 47 педагог-психолог. Татшӧм специалистыс оз жӧ тырмы. Та вӧсна сад-яслиса веськӧдлысьяс ыстӧны ассьыныс уджалысьяссӧ велӧдчыны. Детсадъясын тайӧ уджас ышӧдӧны и СГУ-са студентъясӧс. Ёна отсасьӧны юркарысь методика котырса велӧдысь-психологъяс.
Педагог-психолог колӧ и челядьлы, и верстьӧлы. Та вӧсна 2020 восянь велӧдан учреждениеясын котырталӧны психолог-педагоглысь консилиумъяс, кытчӧ пырӧны педагог-психолог, воспитатель да детсадйӧн веськӧдлысь. Сэтчӧ корлӧны и психолог-педагогсянь да юӧр-методика боксянь отсӧг сетӧм кузя шӧринысь специалистъясӧс, кодъяскӧд кырымалӧма сёрнитчӧм.
Консилиумыс отсалӧ педагогъяслы, челядьлы, кодъяс дзоньвидзалун боксянь оз вермыны быдтор вӧчны («ограниченные возможности здоровья»), оз гӧгӧрвоны велӧдчан программасӧ. Жаль, но татшӧм дзолюкъясыс и водзті вӧліны, и ӧні эмӧсь, и водзӧ на лоасны. Та вӧсна быдӧнлы колӧ кужны накӧд уджавны.
Бать-мамлӧн да воспитательяслӧн шыӧдчӧм бӧрын консилиумса специалистъяс ставсӧ гӧгӧрбок видлаласны да висьталасны, кыдзи отсавны дзолюкыслы. Велӧдысьлы да психолог-педагоглы колӧ ӧтув зільны. Тӧдчана, кӧні олӧ да велӧдчӧ кагаыс, мый вӧчсьӧ сы гӧгӧрын, кодъяс да кыдзи сыкӧд сёрнитӧны.
Психолог-педагогсянь да юӧр-методика боксянь отсӧг сетӧм кузя шӧринӧн веськӧдлысь Наталья СБОРНОВА:
– Медым отсавны бать-мамлы да вочавидзны челядь быдтӧмын налӧн уна сикас юалӧм вылӧ, 2015 воын Сыктывкарын котыртім психолог-педагоглӧн консультация шӧрин. Таво нин сэтчӧ вайӧдлісны 615 кагаӧс. На пиысь комын прӧчентыс дзоньвидзалун боксянь оз вермыны быдтор вӧчны. А ӧд тайӧ зэв на ичӧт кагукъяс – пузчужӧмасянь сизим арӧсӧдз. Найӧ матысса кадӧ локтасны, а кодсюрӧ и ветлӧ нин детсадса компенсируйтан группаӧ, и налы колӧ психолог-педагоглӧн отсӧг.
Кымын водзджык верстьӧ казяласны кагукыслӧн дзоньвидзалунын да сӧвмӧмын тырмытӧмторъяссӧ, сымын унджык кад лоас отсавны ичӧт мортлы.
Быд кагакӧд шӧринса специалистъяс уджалӧны куим тӧлысь. Дзолюкӧс быд боксянь видлалӧны логопед, дефектолог да психолог. Та бӧрын найӧ сёрнитӧны бать-мамыскӧд, юӧртӧны налы, ставыс-ӧ лючки, мыйкӧ кӧ неладнӧ, велӧдасны, кутшӧм занятиеяс колӧ нуӧдны кагаыскӧд гортас, а ковмас кӧ, ыстасны колана врач, шуам, психиатр, невролог, ортопед, офтальмолог да мукӧд дорӧ.
Бать-мамлы шӧринас дасьтӧмаӧсь брошюра, кӧні пасйӧма быд воськов, кытчӧ позьӧ шыӧдчыны, кагаыскӧд кӧ мыйкӧ неладнӧ, кутшӧм кабала-документ та могысь колӧ, мый позьӧ вӧчны аслыныс да с.в.
Арӧсӧдз кӧ дзолюк оз бергӧд юрсӧ да оз кыв некутшӧм шы, оз казяв бать-мамыслысь сёрнисӧ, ачыс оз тёльгы, чӧв олӧ либӧ «сёрнитӧ» ӧти и сійӧ жӧ шыӧн, верстьӧлы колӧ кыдз позьӧ ӧдйӧджык шыӧдчыны логопед дорӧ. Логопед отсалас и 2,5-3 арӧса кагалы, сійӧ кӧ оз сяммы йитны кывъяс сёрникузяӧ, тёльгӧмсьыс кӧ немтор он гӧгӧрво. Татшӧм специалист дорас колӧ шыӧдчыны, кага кӧ висьталӧм пыдди унджыкысьсӧ петкӧдлӧ ассьыс кӧсйӧмсӧ кинас, ныр-вомнас да синнас, оз сёрнит мукӧд челядькӧд, оз гӧгӧрво да оз сяммы вочавидзны юалӧм вылӧ.
Логопед-дефектолог дорӧ отсӧгла позьӧ шыӧдчыны Сыктывкарын Орджоникидзе уличаса 22-ӧд номера керкаӧ, либӧ гижӧдчыны 21-41-44 телефон пыр. Отсаласны и Тентюков уличаса 97-ӧд номера керкаын.
Дефектолог видзӧдӧ, кыдзи сӧвмӧ кагалӧн вежӧрыс, мый сійӧ тӧдӧ нин да кыдзи тайӧс донъялӧ. Шуам, дзолюк оз гӧгӧрво, мый серпасалӧма, оз куж та йылысь висьтавны, оз сяммы йитны ставсӧ кутшӧмкӧ сюрӧсӧ, сылы веськодь, мый вӧчсьӧ сы гӧгӧр, да оз велав, мыйӧ велӧдӧны сад-яслиын. Тайӧ специалистыс сідзжӧ юӧртас, дась-ӧ кагаыс школа кежлӧ.
Педагог-психолог отсалас верстьӧлы гӧгӧрвоны быдтаснысӧ, воны сыкӧд ӧти кывйӧ, велӧдны бурӧ да видзны лёксьыс, юӧртас, лӧсялӧ-ӧ сылӧн вежӧрыс арлыдыслы.
«Веськыд йитӧда» телефон пыр звӧнитіс нӧшта ӧти ань да юаліс, кыдзи велӧдны кагасӧ ветлыны выль сад-яслиӧ?
Сыктывкарысь 108-ӧд номера детсадйысь педагог-психолог Светлана КОЗЛОВА:
– Да, кага вежӧрлы тайӧ пыркнитӧм кодь. Тӧдтӧм челядь, тӧдтӧм воспитательяс. Ме эськӧ вӧзйи быдтасныдкӧд водзвыв волыны выль сад-ясли йӧрас, петкӧдлыны сылы, кытчӧ мӧдас ветлыны. Та дырйи колӧ висьтавны, мый вӧсна вежинныд детсадсӧ. Позьӧ паныдасьлыны воспитательыскӧд, детсадса психологкӧд да мукӧд специалисткӧд. Ӧтуввезйын психолог-педагоглӧн консультация шӧринлӧн сайтын та кузя эм уна юӧр.
Ассянь юалі жӧ, ёна-ӧ мӧрччӧны челядьлы сідз шусяна гаджетъяс?
Психолог-педагогсянь да юӧр-методика боксянь отсӧг сетӧм кузя шӧринысь педагог-психолог Екатерина ТРОПНИКОВА:
– Тайӧ чорыда мӧрччӧ. Ӧтуввезйысь кага вылӧ ылькнитӧ зэв уна юӧр, серпас, кагалӧн вежӧрыс таысь ӧдйӧ мудзӧ, сійӧ омӧля нин ставсӧ гӧгӧрвоӧ, некодкӧд оз ёртась, ӧд и планшет-телефоныс сыкӧд оз сёрнит, и дзолюк велалӧ чӧв овны.
Мукӧд верстьӧлы и нимкодь, кагаыс оз дӧзмӧдчы да, чӧла пукалӧ. Найӧ и асьныс челядьыскӧд оз сёрнитны, этша семьяын ӧтув лыддьӧны небӧг. Весиг сад-яслиӧ уна кага волывлӧ телефонӧн. Бать-мам пиысь кодсюрӧ асьныс корӧны, медым кагасӧ ичӧтсянь велӧдісны вӧдитчыны компьютерӧн, интерактивнӧй пӧвйӧн да мукӧд электроникаӧн.
Найӧ весиг оз тӧдны, мый СанПиН серти кагалы вит арӧсӧдз оз позь вӧдитчыны некутшӧм электроникаӧн. А та бӧрын планшет-компьютер дорын позьӧ пукавны луннас сӧмын сизим минут. Школаын та бӧрся видзӧдӧны на, а гортаныс челядь вӧчӧны мый кӧсйӧны. Кӧть войбыд пукаласны телефонас зунясьӧмӧн.
А ӧд важ йӧз на шулӧмаӧсь, кор пӧ кагаыд пидзӧс вылад тӧрӧ, сэки велӧд, а кор оз понды тӧрны, сэки он нин велӧд. <>
Николай РАЗМЫСЛОВ.
Снимокъясыс авторлӧн да ӧтуввезйысь.