Кольӧм во «Демография» нацпроект весьтӧ республикаысь кӧкъямыс муниципалитетса ылi сикт-грездысь ыджыд арлыда сюрсысь унджык олысь шыӧдчылӧмаӧсь врачьяс дорӧ дзоньвидзалуннысӧ пыдiсяньджык туявны.
А ветлӧмаӧсь медучреждениеясӧ «Демография» нацпроект весьтӧ жӧ буретш та могысь ньӧбӧм автобусъясӧн.
Кыдз юӧртiс Комиын удж, занятосьт да йӧзлы социальнӧй отсӧг сетӧм кузя министр Екатерина Грибкова, олӧма морт вермас ветлыны больнича-поликлиникаӧ татшӧм автобуснас мынтысьтӧг кӧть кымынысь.
Екатерина Грибкова сiдзжӧ пасйис, мый «Демография» нацпроект весьтӧ ньӧбӧм автомашинаяснас жӧ вайӧны колана лекарство-препарат да сёян-юан налы, кодъяс омӧль дзоньвидзалун пондаыс оз вермыны петавны гортсьыныс. А кор колӧ, на дорӧ гортаныс волывлӧны врачьяс.
Комиын удж, занятосьт да йӧзлы социальнӧй отсӧг сетӧм кузя министерствоысь лыдпасъяс серти, мӧйму олӧма йӧз дорӧ гортаныс медикъяс волӧмаӧсь татшӧм автомашинанас 96-ысь, а лекарство-препаратсӧ да сёян-юансӧ вайӧмаӧсь 98-ысь.
Казьтыштам, Луздор, Сыктыв, Сыктывдiн, Княжпогост, Чилимдiн, Удора да Изьва районъясысь, а сiдзжӧ Вуктыл карысь йӧзлы социальнӧй отсӧг сетан шӧринъяслы тайӧ кӧкъямыс автомашинасӧ ньӧбӧмаӧсь 2019 воын «Демография» нацпроектлӧн «Старшее поколение» уджтас весьтӧ федеральнӧй бюджетысь сьӧм вылӧ, медым нуӧдлыны ылi сикт-грездысь 65 арӧсысь ыджыдджык арлыдаясӧс медучреждениеясӧ.
<> Гижӧдсӧ дасьтiс Александра АРТЕЕВА.
Снимокыс ӧтуввезйысь.