Салехардын кыпыда пасйисны Коми культуралы сиӧм лунъяс. Ямалса юркарын тайӧ аддзысьлӧмыс лои яръюгыд лоӧмторйӧн Коми Республикаысь, Мурманск обласьтысь да Ненеч автономия кытшысь общественнӧй котыръясын водзмӧстчысьяслы, кодъяс ӧтувтчӧны вужвойтырлысь нэмӧвӧйся культура-традиция видзӧм-сӧвмӧдӧм могысь.
Батьӧй – ханты, а мамӧй – коми
Коми культуралы сиӧм лунъясӧ пырӧдчис и Салехардын олысь ань Лидия Кельчина. Медводдза лунӧ сійӧ тӧдмӧдіс гӧсьтъясӧс тайӧ карнас. Татшӧм экскурсиясӧ сійӧ нуӧдлӧма нин да, та пӧрйӧ окотапырысь жӧ кӧсйысьӧма петкӧдлыны туристъяслы Салехардын нималанаторъяссӧ. Та дырйи медвойдӧр пасйис, зэв пӧ нимкодь вӧлі, кор тшӧтш и Обдорын заводитісны сёрнитны комиӧн.
Лидиялӧн батьыс – ханты, а мамыс – коми Удора, районса Путшкымдінысь. Та понда коми кывсӧ ань бура тӧдӧ, кӧть и чужӧма-быдмӧма Салехардын. Школа помалӧм бӧрас велӧдчӧма Санкт-Петербургын, но сэсся бӧр чужан карас локтӧма.
Лидия Кельчина шуӧ, меным пӧ пыр вӧлі окота тӧдмавны уна сикас войтырлысь оласногсӧ, мыйӧн торъялӧ налӧн культураыс, национальнӧй сёян-юаныс…
– Гоз-мӧд во сайын вӧлі Абхазияын да тӧдмаси сэтчӧс нывбабакӧд. Сійӧ висьталіс асланыс традиционнӧй сёян – мамалыга – йылысь. Окотапырысь видлі-чӧсмаси, – висьталӧ Лидия. – Нӧшта пыр зіля туявны-тӧдмавны, мыйла оз быдлаын ӧткодя шуны ӧтиторсӧ: шуам, кӧнкӧ «керка», а Удораса Путшкымдінын – «горт». Да и «гымга» кыв оз жӧ ӧткодя юргы – «гимга» либӧ «верша». Уна татшӧм пример, торйӧн нин войвылын олысь войтыркӧд йитчӧмасӧ, зіля сюркнявны пель сайӧ. Менам бать унатор жӧ висьтавлӧ-петкӧдлӧ, та понда и ичӧтсянь быдтор окота тӧдны. А, гашкӧ, сы вӧсна тшӧтш, мый батьӧй да мамӧй – ханты да коми – ӧтсӧгласӧн ӧта-мӧдсӧ радейтӧмӧн да пыдди пуктӧмӧн олӧны.
Томулов волісны – и тайӧ бур!
Салехардын Коми культура лунъяслы сиӧм гажыс ёна воӧма сьӧлӧм вылас Лидия Кельчиналы, торйӧн нин йӧзыслӧн кыпыд руыс. Нимкодясьӧ, мый томуловыс уна вӧлӧма. И тайӧ пӧ зэв бур!
Лидия вӧлӧма аддзысьлӧмсӧ котыртысьяс лыдын. Паныдасьлім пӧ ми, ӧткодя мӧвпалысьяс, да ӧтув сёрнитім ассьыным проект-уджтас водзӧ збыльмӧдӧм йылысь, медым сӧвмӧдны-видзны коми кыв, йӧзкостса традицияяс, озырмӧдны культура да коми войтыр йылысь тӧдӧмлун.
– Лидия, кыдзи чужис тайӧ мӧвпыс: Салехардын котыртны Коми культура лунъяс?
–Мӧвпыс чужи, кор кутіс матыстчыны Ямал-Ненеч кытшын «Изьватас» ӧтмунӧмлысь съезд нуӧдан лун. Такӧд йитӧдын уна вӧлі сёрниыс Коми культура лунъяс нуӧдӧм йылысь. Окота вӧлі котыртлыны мыйкӧ тӧдчанаӧс, интереснӧйӧс, шемӧсмӧданаӧс, медым гӧсьтъяс да делегатъяс дыр казьтылісны гажсӧ.
Шыӧдчим регионса гранта конкурсӧ пырӧдчӧм кузя, тӧдмӧдім асланым проект гугӧн и банӧн, мый кӧсъям сы весьтӧ збыльмӧдны. Гажсӧ шуим дасьтыны сідз, медым сэтчӧ пырӧдчысьяс эз сӧмын кывзыны докладъяс, а тшӧтш и асьныс зілисны мыйӧкӧ выльӧ босьтчыны. Со и чужи мӧвп котыртны сідз шусяна креативнӧй сессия да мастер-классъяс.
Водзвыв урчитім, мый гаждырся став мӧвп-вӧзйӧмсӧ пыртам 2026 воӧдз «Изьватас» ӧтмунӧмлӧн «Туйвывса картаӧ», водзӧ вылӧ уджалан планӧ. Медшӧр мӧвпыс – мед оз сӧмын ӧтмунӧмнас веськӧдлысь да правленньӧ мӧвпавны локтан 3 вося удж йылысь, но и мед ми ставӧн лоам сідз шусяна соавторъясӧн. Сідз и артмис.
– Кымын морт чукӧртчыліс-воліс?
– Коми культуралы сиӧм лунъясӧ пырӧдчис 100 сайӧ морт, на лыдын и волонтёръяс. Унаӧн карсаяс вӧліны, концерт видзӧдысьыс эз этша вӧв и. Менам бать Геннадий Кельчин тшӧкыда волывлӧ мам чужанінӧ, Путшкымдінӧ да, тӧдӧ жӧ коми кывтӧ. Сійӧ радпырысь жӧ воліс аддзысьлӧм вылас да комиӧн сёрнитіс!
– Кутшӧм удж нуӧдінныд?
– Вӧлі томуловлы сиӧм чолӧм-аддзысьлӧм, кӧні ныв-зон тӧдмасисны ёрта-ёртныскӧд, а сідзжӧ экскурсия, концертъяс, коми ремеслӧ кузя да сідз шусяна верхӧвӧй набойкаысь мастер-классъяс.
Менам ёрт Ирина Терентьева нуӧдіс коми кыв урок, а Удора районысь Елена Екимова да Олеся Бушенева котыртлісны коми йӧзкостса ворсӧмысь мастер-класс.
Тайӧ кык аньыслӧн, Косланса библиотекаын уджалысьяслӧн, Ямалӧ волӧмыс зэв аслыспӧлӧс артмис, медводдзаысь на тані вӧліны.
Кольӧм во тӧвнас Елена корис менӧ волыны Косланса библиотекаӧ висьтавны сэні Ямалын олысь войтыр йылысь. Буретш сэки жӧ Путшкымдінӧ кӧсйи ветлыны да, мӧвпышті, мый ветлӧмыс пӧпуттьӧ лоӧ. Ме ӧд уджала Войвылын этша лыда вужвойтырлӧн удж кузя департаментын да, эм мый висьтавны такӧд йитӧдын.
Сьӧрысь вайи уна небӧг, сувенир, буклет. Весиг петкӧдлі национальнӧй спорт сикас кузя мультфильм. Зэв пӧсь артмис аддзысьлӧмыс. Зонпосни вӧлі велӧдӧмаӧсь коми кывбуръяс да окотапырысь лыддисны.
Удораын олысьяскӧд мӧдысь аддзысьлім Косланса библиотекаын
уджалысьяслӧн корӧм серти кольӧм-вося августын. Ми волім батькӧд. Тӧдчӧда, сійӧ вуджӧдліс ханты кыв вылӧ роч классикъяслысь гижӧдъяссӧ, Пушкинлысь, Ершовлысь да мукӧд нималана авторлысь мойдъяссӧ, туялӧ фольклор, сылы сетӧма «Ямал-Ненеч автономия кытшын культураса заслуженнӧй уджалысь» почёта ним. Аддзысьлӧмсӧ нуӧдім восьса енэж улын, библиотека водзын, да сиим Вужвойтырлӧн войтыркостса лунлы (вӧлі тайӧ август 9 лунӧ). Ставыс зэв ёна кажитчис и челядьлы, и миянлы.
И со опытӧн юксьӧм могысь кори Еленаӧс да Олесяӧс волыны Ямалӧ. Нуӧдлім найӧс нӧшта Аксарка сиктӧ (Салехардсянь 68 километр ылнаын) челядьлы библиотекаӧ, кӧні найӧ висьталісны зонпоснилы коми войтыр йылысь, тшӧтш и ворсӧдісны найӧс.
– Коми культуралы сиӧм лунъяслӧн кутшӧм вӧлі медшӧр могыс?
–Зілим петкӧдлыны коми войтырлысь аслыспӧлӧслунсӧ, мый найӧ йӧзкостса традицияяссӧ тӧдӧны да видзӧны, мый чужан кывныс ловъя, и комиӧн йӧзыс сёрнитӧны. А нӧшта окотитім, мед татчӧс комияс ӧтув чукӧртчыласны, и томулов тшӧтш. Мед быдӧн кылас тайӧ ӧтувъялунсӧ да гӧгӧрвоас, кутшӧм озыр миян Россия уна сикас войтырӧн да традицияясӧн.
– Мыйӧн медся ёна кажитчис тайӧ гажыс?
– Мый зэв уна том йӧзыс вӧлі, мый ми ӧтув урчитім водзӧ вылӧ удж-мог. Ставныслы зэв ыджыд аттьӧ тайӧ шоныд да кыпыд аддзысьлӧмсьыс!
* * *
Рытнас ямалсаӧс да гӧсьтъясӧс гажӧдіс «Обдорянка» группа. Петкӧдчисны тшӧтш мукӧд фольклор котыръяс. Артистъяс лыдын вӧлі и Комиысь том гудӧкасьысь Владимир Трошев.
Аддзысьлӧмыс сэтшӧм и артмис, кутшӧмӧн сійӧс мӧвпалісны нуӧдны – зэв кыпыдӧн да югыдӧн. Чужис уна выль мӧвп, мый серти Ямал-Ненеч кытшын «Изьватас» ӧтмунӧм кутас водзӧ зільны чужан кыв, традицияяс, вужвойтыр культура, спорт да мукӧдтор видзӧм-сӧвмӧдӧм могысь. <>
Екатерина МИКУШЕВА.
Снимокъясыс Лидия КЕЛЬЧИНАЛӦН гортса архивысь да ӧтуввезйысь.