Летка вожса Гурьёвчиын начальнӧй школаыс воссьылӧма 1912 воын. Сылӧн стрӧйбаыс и ӧні на сулалӧ, сэні меститчӧм музейын позьӧ тӧдмасьны и сиктыслӧн, и школаыслӧн историяӧн, и татчӧс войтырлӧн оласногӧн.
Велӧдчанінлысь сё дас вося юбилейсӧ Гурьёвчиын пасйисны кольӧм пекничаӧ. И лӧсьыда ставсӧ мӧвпыштӧмаӧсь, медым и ныв-зонмӧс гажӧдыштны, и велӧдысьясӧс нимӧдны, а субӧтанас нӧшта и вӧвлӧм велӧдчысьяссӧ чукӧртлыны – школаыс ӧд ставныслы налы муса да дона, и юбилейыс ставныслӧн ӧтувъя.
Кӧть и пасйи, мый ныв-зонмӧс гажӧдісны, збыльвылас найӧ петкӧдлісны ассьыныс тӧдӧмлунсӧ и сям-кужӧмсӧ. Татшӧм позянлунсӧ налы вӧчисны асывсяньыс воӧм гӧсьтъяс – туризм сӧвмӧдан агентствоын, финн-йӧгра этнопаркын да республикаса войтырлӧн Ёртасян керкаын уджалысьяс. Найӧ унатор висьталісны Коми му да регионысь тӧдчанаинъяс йылысь, нуӧдісны мастер-классъяс.
Этнопаркӧн челядьӧс тӧдмӧдіс Елена Иванова, паркнас веськӧдлысь, петкӧдліс и вӧралысьлӧн ордым йылысь видеоролик. Ольга Чабанова йӧзкостса шылада инструментъяс сьӧрсьыс вӧлі вайӧма, ачыс ворсіс и нывъяслы да зонкаяслы ворсны сетліс, йӧктіс и томуловӧс йӧктӧдіс. Ольга Останкова Ёма-бабаӧ пасьтасьліс да ворсӧдіс зонпосниӧс. А найӧ и радӧсь вӧлі ворсыштнытӧ – гаж дырйи ӧд гажӧдчыны, шмонитны-серавны колӧ.
Ёртасян керкаысь Надежда Мальцева нуӧдіс велӧдчысьяслы «Вежӧра йӧз» викторина. Гурьёвчиса ныв-зон тӧлкӧн вочавидзисны уна юалӧм вылӧ, кӧть эськӧ мукӧдсьыс и ме шӧйӧвошлі, вочакывсӧ эг тӧд да. Кутшӧм вӧлӧга пӧ комияс век босьтлісны сьӧрсьыс, зэв нин сійӧ пӧтӧса да вын-эбӧс содтана? Ме мӧмъяла на вӧлі, а челядь пыр и горӧдісны, шаньга пӧ.
«Висьтав мӧд ног» ворсӧм дырйи ныв-зон тӧдмалісны выль коми да роч кывъяс. Ыззисны да зэв жӧ окотапырысь ворсісны.
А гӧсьтъяс сэтшӧм жӧ окотапырысь тӧдмасисны школанас, «Точка роста» жыръясӧ пырисны да бӧрсӧ петны оз вӧлі слӧймыны, сы мында дивӧ сэтысь аддзисны да. Челядьлӧн да велӧдысьяслӧн киӧн, вежӧрӧн вӧчӧм дивӧсӧ. Екатерина Николаевна Морокова петкӧдліс сідз шусяна виртуальнӧй реальносьта стен. Сійӧ отсалӧ велӧдчысьяслы ворсігмоз сӧвмӧдны-кыпӧдны тӧдӧмлун-сямсӧ. Кристина Валерьевна Мусанова быдтасъясыскӧд – Витя Пантелеевкӧд, Кира Мороковакӧд, Ефросинья Осиповакӧд да Павел Сидоровкӧд – висьталісны, кыдзи мультфильм снимайтӧны. Пластилинысь пӧ вӧчалам морт-пемӧс, а сэсся вочасӧн найӧс ньӧжйӧника вешталӧмӧн быд кадр снимайтам, бӧрас комиӧн шы-сёрнисӧ гижам. «Сёркни» мультфильм налӧн дась нин, ӧні лӧсьӧдчӧны выльӧс снимайтны.
Алексей Андреевич Черных физика, математика да информатика велӧдӧ, но та кындзи челядькӧд тшӧтш и лего-конструированиеысь кружок нуӧдӧ, чукӧрталӧны лего кодь ичӧтик юкӧнъясысь быдсикас машина-крансӧ. Зонулов пӧ тадзи техникасӧ бурджыка тӧдмалӧны.
Коптеръяс, 3D-принтер, VR-ӧчки вӧсна кывкутӧ 11 классын велӧдчысь Роман Лобанов. Школалӧн юбилей вылӧ воысьяслы козин пыдди «110 во» паса значоксӧ асьныс и вӧчӧмаӧсь тайӧ 3D-принтернас. Рома висьталіс, мый позьӧ вӧчны VR-ӧчкинас, да меным тшӧтш окота лои пасьтавлыны сійӧс. Медводдзаысь татшӧмнас ӧчкиасьлі да муртса эг янав том йӧз водзас, но Рома отсӧгӧн кыдзкӧ тай личкалі жӧ ки-пультлӧн кнопка-рычагъясас.
Тайӧ вӧлі юбилей лунлӧн воддза джынъяс. А сэсся бара на выль гӧсьтъяс воисны, медым чолӧмавны гурьёвчиӧс школалӧн тшупӧда пасӧн.
–Сьӧлӧмсянь чолӧмала школаын уджалысьясӧс, ныв-зонмӧс, ветеранъясӧс ыджыд праздникӧн, педагогъяслы сиа вежӧра велӧдчысьясӧс да уджын вермӧмъяс, а челядьлы да налӧн бать-мамлы – збыльмӧдны ас водзаныс пуктӧм могъяс, – кыпыд чукӧртчылӧм дырйи висьталіс йӧзӧс велӧдан министерствоӧн веськӧдлысьлысь удж вӧчысь Наталья Якимова.
Гурьёвчиса шӧр школа – республикаын медся лунвыв велӧдчанін. Тӧдӧмлунсӧ сэні босьтӧны и орчча сикт-посёлокысь – Якуньёлысь, Мутничаысь, Слудкаысь, Таличаысь, Гуляшорысь – челядь. Ӧтувъя госэкзамен дырйи век уна балл шедӧдлӧны Надежда Максимовна Осиповалӧн, Любовь Владимировна Потаповалӧн, Людмила Васильевна Косныревалӧн быдтасъяс.
Директорыс, Светлана Анатольевна Рожкина, тӧдчӧдӧ, миян пӧ став велӧдысьыс бура, кывкутӧмӧн уджалӧ, ышӧдӧ челядьӧс зіля велӧдчыны, петкӧдчыны районса, республикаса да регионкостса конкурсъясын. И водзӧсыс эм: школаас 1-сянь 11-ӧд классӧдз велӧдчӧ 95 ныв да детинка, на пиысь дасыс – сӧмын «5» вылӧ, нӧшта нелямын ӧтиӧн – «4» да «5» вылӧ. Бӧръя квайт восӧ быд во на зарни медальӧн помалысь вӧлӧма.
Светлана Анатольевна юрнуӧдӧ школанас нёльӧд во, Гурьёвчиӧ овны семьянас воӧмаӧсь Сыктывкарысь. Нёль ныв пӧ менам быдмӧ. И, кыдзи казялі школаса олӧмӧн тӧдмасигӧн, директорлӧн нывъясыс водзмӧстчысьӧсь жӧ. Викторияыс со и велӧдчӧ бура, и лыжиӧн котралӧм кузя ордйысьӧмъясӧ пырӧдчӧ, а Анастасия волонтёралӧ. Но Светлана Анатольевна медводз пасйӧ мукӧд велӧдчысьсӧ: Рома Лобанов пӧ, эскам, таво школасӧ помалас зарни медальӧн, Настя Коснырева – отличница, спортсменка да волонтёр. А таво пӧ бур боксянь «воссис» 8 классысь Кира Осипова: Василий Юхнинлы сиӧм лыддьысьӧмъяс дырйи висьтасис, кыдзи Гурьёвчиын пасйӧны Илля лун, да висьтасьӧмыс сэтшӧма кажитчӧма «Би кинь» журналса шӧр редактор Алёна Нестеровалы, мый вӧзйӧма йӧзӧдны сійӧс «Коми му» газетын.
–Некымын во нин пырӧдчам «Народнӧй бюджет» уджтасӧ, – сёрнитігӧн шуис меным Светлана Анатольевна. – «Здорово быть здоровым» проектӧн шедӧдӧм гранта сьӧм вылӧ ньӧбим том спортсменъяслы да туристъяслы коланаторъяс. Кольӧм во «Сиктса дзолюкъяс» программа серти мультфильм снимайтны оборудование босьтім. «Уроки творчества» уджтас отсалӧ нывъяслы пусьыны-пӧжасьны велӧдчыны. А таво шедӧдім грант патриотизм сӧвмӧдан «Мы помним» проектӧн. Тайӧ жӧ нырвизьын кольӧм восянь школаын нуӧдсьӧ «Застава» конкурс, томулов ордйысьӧ вын-пельклуннас. Таво кӧсъям корны венласьны тшӧтш и суседъясӧс – Киров обласьтса Мурашиысь войтырӧс. 2020 воын миян «Точка роста» воссис. Велӧдысьяслы тайӧ зэв ыджыд отсӧг, и министерстволы таысь, дерт жӧ, аттьӧ колӧ висьтавны. И нӧшта мый миянлы зэв тӧдчана: дась нин школа капитальнӧя дзоньталӧм кузя проект, ӧні экспертизалысь кывкӧртӧд виччысям. Эскам, кыдзи и вӧлі кӧсйысьӧма, 2025 воын школанымӧс дзоньталасны.
Кыв шутӧг, тайӧ эськӧ лоис школалы медыджыд козинӧн. И окота сины, мед тадзи и лоас. <>
Павел СИМПЕЛЕВ.
Снимокъясыс авторлӧн да ӧтуввезйысь.