Сӧвет кадся техника чукӧртӧ Луздор районса Лопъювомысь Никита Шурмин. Чужан посёлокас сійӧ восьтӧма музей, кытчӧ виччысьӧ экскурсияӧн и верстьӧӧс, и томуловӧс. Водзмӧстчысь мужичӧй чукӧртӧ техникасӧ да дзоньталӧ сійӧс аслас сьӧм вылӧ да ачыс.
Музеяс талун СССР кадся 50 гӧгӧр нин мототехника: кык мотоколяска, 2 скутер, мотоблок, мотоцикл, мотороллер, мопед, велосипед, сідз шусяна мокик да педаля машина. Дерт, ставсӧ тайӧс уналы окота видзӧдлыны да, тшӧкыда и волӧны нимкодясьыштны-шензьыштны да томдырсӧ казьтыштны оз сӧмын посёлокын олысьяс, но и мукӧдлаысь гӧсьтъяс.
Ичӧтдырсянь радейта
Никита Валентинович чужӧма Лопъювом посёлокын. Техника дорӧ пӧ ичӧтсянь нин кыскӧ. Сылӧн ӧти пӧльыс вӧлӧма тепловозса машинист, мӧдыс – шопер. Гашкӧ, налӧн жӧ кок туйӧд зонка мунӧма да, сьӧлӧм вылас воӧма техникаӧн вӧдитчынысӧ.
–Ичӧтсянь техникаӧн нокся, батьӧкӧд на заводиті дзоньтасьны. Медводз аслам вӧлі велосипед, сэсся «Минск» мотоциклӧн журъялі. 2015 воын юрӧ воис мӧвп – гашкӧ, чукӧртны, мися, аслым татшӧм техникасӧ? Буретш сэки жӧ босьтчи дзоньтавны «Рига-13» мопед. Сэсся кык во мысти и музей восьтӧм йылысь думышті. 2018 воын гожӧмнас «Инноватика Крохаль» республикаса форум дырйи мойвиис шедӧдны «Возрождение мототехники СССР» музей лӧсьӧдӧм-восьтӧм вылӧ грант, – висьталӧ Никита Шурмин. – Посёлокса клубын вичмӧдісны та могысь кык жыр. Вочасӧн техникаыс содіс да, эз кут ставыс сэтчӧ тӧрны. 2021-2022 воясӧ мӧд стрӧйба лои дзоньталӧма, да сэсся сэтчӧ вуджӧдім музейсӧ.
Сылӧн медшӧр могыс – тӧдмӧдны мототранспорт историяӧн, кыдзи сӧвмис татшӧм техникаыс воясӧн.
Зэв нимкодь Никита Валентиновичлы, кор мойвиӧ аддзыны аслас коллекцияӧ мыйкӧ выльтор. Республика пасьталаын ӧд техникасӧ корсьӧ-юасьӧ, а сэсся выльмӧдӧ-дзоньталӧ. Кодсюрӧ, кывласны да, асьныс вайӧны.
«К-55» мотоцикл – «Возрождение мототехники СССР» музейын медся важсяыс, 1950-ӧд воясся на. Сійӧс орчча сиктысь аддзӧма Никита.
Та кындзи эмӧсь «Минск», «Иж-56», милиционеръяслӧн «Урал», а сідзжӧ «Муравей» мотороллер, кодӧн водзті вӧдитчылӧмаӧсь поштаын уджалысьяс, а сідзжӧ новлӧмаӧсь йӧв да нянь. Унджык техниканас позьӧ на ветлыны.
Никита Шурмин висьталӧ, кор пӧ воис юрӧ мӧвп чукӧртны Сӧвет кадся техникасӧ, матысса-тӧдсаяс шензьыштісныкодь. Дерт, ӧні, кор нин аддзӧны, мый мужичӧйлӧн гуся дум-мӧвпыс збыльмис, зэв нимкодь и налы тшӧтш. Йӧзыс тӧдӧны, мый эм кӧ гаражас ковтӧм нин мотоцикл, мопед, мотороллер либӧ мукӧд сикас техника, позьӧ козьнавны либӧ неыджыд донысь вузавны.
–Татшӧм музейыс миян республикаын абу, – водзӧ висьтасьӧ том морт. – Татчӧ окотапырысь быдласянь волӧны. Верстьӧджыклӧн томдырся кадыс йитчӧма татшӧм техникаыскӧд да, нимкодь налы. Томулов окотапырысь жӧ видзӧдалӧны. Гашкӧ, мойвиас коркӧ татшӧм техниканас парад вылӧ петавны. Ставыс на водзын.
Челядькӧд тшӧтш
Никита Валентинович нуӧдӧ Тыдор грездса школаын история, обществознание, информатика урокъяс. Помавлӧма Сыктывкарса канму университет, велӧдчӧма история да право нырвизь серти.
Школаын тӧдӧмлун сетӧм кындзи ышӧдӧ ныв-зонмӧс музейын экспонатъяссӧ сыкӧд тшӧтш дзоньтавны. Челядь сяммӧны нин и ремонт вӧчны, и музеяс экскурсия нуӧдны. Код тӧдас, гашкӧ, на пиысь кодкӧ тшӧтш ыззяс татшӧм техникасӧ чукӧртны… <>
Екатерина МИКУШЕВА.
Снимокъясыс Никита ШУРМИНЛӦН гортса архивысь.