Оркестр бура ворсӧ сӧмын сэк, ӧтувтчӧмаӧсь кӧ сэтчӧ енбиа музыкантъяс, кодъяс кылӧны ӧта-мӧдсӧ, и на пиысь быдӧн зільӧ тырвыйӧ петкӧдлыны ассьыс сямсӧ, да юрнуӧдӧ кӧ наӧн ставнысӧ котыртны кужысь дирижёр.
Ӧтувъя котырӧн, командаӧн уджавны кужӧмыс колӧ оз сӧмын оркестрын ворсысьяслы. Кутшӧм мог кӧть ог босьтчӧй збыльмӧдны, медводз корсям миян моз жӧ мӧвпалысь, вӧчысь, миянӧс гӧгӧрвоысь уджъёртъясӧс. И бӧръям ас костысь сійӧс, кодлы вын сертиыс лоас колана нырвизьын котыртны уджсӧ.
Тайӧс тӧд вылӧ босьтӧмӧн кольӧм пекнича-субӧтаӧ искусство гимназияын нуӧдісны коммунаръяслысь сбор. Нимтісны сійӧс «Арся оркестрӧн», могыс ӧд вӧлі ӧтувтны гырысь классъясын велӧдчысьясӧс да педагогъясӧс командаӧ. Оркестр кодь командаӧ, кӧні быдӧн тӧдӧ сы водзӧ сувтӧдӧм могсӧ, кӧні кывзӧны да кылӧны, пыдди пуктӧны ёрта-ёртсӧ, кӧні век дасьӧсь отсавны орччӧн сулалысьлы. И кӧні лоас нырщик, водзмӧстчысь морт, кодлы кутасны эскыны да код бӧрся вӧтчасны.
Медводдза лунас коммунаръяс юксисны команда котыртӧм йылысь мӧвпъяснас, а сідзжӧ сёрнитісны, кутшӧмӧн колӧ лоны мортлы, медым ёртъясыс шуисны сійӧс асланыс нырщикӧн. Мукӧдыслӧн пӧ татшӧм сямыс ичӧтнас на тыдовтчӧ: татшӧмыслысь кывзысьӧны, быд венын, туйвежын бӧръя кывсӧ сысянь виччысьӧны. Зумыд пытшкӧсса сюрӧсыс сылӧн сэки нин тӧдчӧ. Но медым пӧ юрнуӧдны, нӧшта колӧ и тӧдӧмлун, и йӧзкӧд ладмыны да ӧтувъя уджӧ ышӧдны кужӧм, и пуктӧм мог збыльмӧдан туйвизь корсигӧн нырис. Сэки сы гӧгӧр ӧтувтчӧм йӧз вермасны венны уна мытшӧд-падмӧг.
Мӧд лунас ӧкмыс котырӧ юксьӧмӧн коммунаръяс петкӧдлісны командаӧн уджавны кужӧмсӧ. Вель зэлыд гӧрӧдъяс налы ковмис разьны, эз ӧти налькйысь петан туй корсьны. Сідз, векньыдик пос вылӧ радӧн сувтны да ӧтар помсяньыс мӧд помӧдзыс воӧдчыны. И мед некод эз усь. А оз усь, стӧча кӧ тӧдӧ, мый ёртъясыс топыда кутӧны сійӧс да оз сетны вильснитны ни крукасьны.
Дас татшӧм мытшӧд коліс венны. Эз став котырыслӧн тайӧ артмы. Но командаӧн зільӧмлысь кӧрсӧ тӧдмалісны ставӧн. Мудзисны ёна, но лов выланыс вӧлі долыд: некод йӧз мыш сайӧ эз дзебсясь, вын-эбӧссӧ эз жалит. Эз жалит, мед сӧмын командаыс бура петкӧдчис.
Ордйысьӧм кындзи котырлӧн ӧтувъя уджыс, вӧлӧмкӧ, колӧ и быдлунъя нокын: джодждӧра пыркӧдігӧн, пицца пӧжалігӧн, да весиг сёркни быдтіг-дӧзьӧритігӧн, урожай босьтігӧн. «Сёркни» мойдсӧ казьтыштісны жӧ сбор дырйи, серамбана сценка сы серти дасьтісны да петкӧдлісны. Пӧль да пӧч, да внучка, пон да кань, да шыр ӧд ӧтувтчӧмӧн жӧ сӧмын сёркнисӧ нетшыштны вермисны…
* * *
Искусство гимназияын коммунаръяслысь сборсӧ таво кызьӧдысь нин нуӧдісны. Дерт, уна традиция нин та дыранад лоис: гитара улӧ «орлята кытшын» радейтана сьыланкывъяс сьывны, асъя зарядка вӧчны, рытъяснас лунтырӧн чӧжсьӧм сьӧлӧмкылӧмъясӧн юксьыны… Тадзи вӧлі и та пӧрйӧ. Тшӧтш и сборыс отсалӧ вӧчны гимназиясӧ челядьлы мӧд гортӧн. Кыдзи шуис вӧвлӧм гимназист, кодӧс корлісны жӧ сбор вылас, гортӧн пӧ, кӧні тэнӧ виччысьӧны, кӧні тэнӧ гӧгӧрвоӧны, кӧні тэнӧ радейтӧны… <>
Павел СИМПЕЛЕВ.
Снимокъясыс Людмила ИГУШЕВАЛӦН.