2018 вося ноябрын «Земскӧй фельдшер» уджтас серти Синдорӧ воис Сергей Александрович Вологдин. Посёлоксаяс дзик пыр кутісны радейтны да пыдди пуктыны тӧлка специалистӧс. Том фельдшер зэв бура тӧдӧ ассьыс уджсӧ, кывкутӧмӧн матыстчӧ нёрпалысь-шыӧдчысьяс дорӧ, сюся кывзӧ быдӧнӧс, зільӧ сетны колана медицина отсӧг, кужӧ лӧньӧдны тшӧтш и сьӧлӧм шог-дой.
Шулӧны, мужичӧйлы пӧ олӧмбыднас колӧ садитны пу, быдтыны пи да кыпӧдны керка. Шуӧны кӧ, тадзи и колӧ вӧчны. Ӧд семьясӧ радейтысь батьыд нэм чӧжыс кутас тӧждысьны челядь вӧснаыс.
Медик гозъя Екатерина Юрьевна да Сергей Александрович Вологдинъяслӧн быдмӧны Лидия ныв да Тимур пи.
Туйвизьсӧ тӧдӧма водзвыв
Сергей Александрович чужӧма Удмуртияын. Школаас велӧдчӧма «нёль» да «вит» вылӧ. Пы-рӧдчӧма тшӧтш кокни атлетикаӧ. Том зон водзын ӧдзӧсыс вӧлӧма восьса быдлаӧ, но 9-ӧд классянь нин сійӧ тӧдӧма, мый олӧмсӧ сиас медициналы, кутас бурдӧдны йӧзӧс.
11 класс помалӧм бӧрын Сергей пырӧма велӧдчыны Глазовса медицина колледжӧ. Тӧдӧмлуныс сетчӧма кокниа, ӧд зон нэмсӧ зільӧма тӧдмавны мыйкӧ да мыйкӧ выльтор. Велӧдчигас на студентъясӧс окотапырысь корлывлӧмаӧсь санитаравны тэрыб отсӧг сетанінын. Тані Сергей чӧжӧма сям-кужӧмлунсӧ. Нёльӧд курсын нин том морт стӧча тӧдӧма, мый профессияыс сылы сьӧлӧм сертиыс, да тайӧ туйӧдыс и мунас водзӧ олӧмас. Йӧзлы отсавны кӧсйӧмыс йиджӧма сылы нэм кежлас.
Екатерина гӧтырпуыскӧд найӧ велӧдчӧмаӧсь ӧтлаын колледжын. Унаторйын ӧткодьӧсь вӧлӧмаӧсь да, бӧръя курсын гозйӧдчӧмаӧсь. Медицина колледжсӧ помалӧмаӧсь фельдшеръясӧн.
Некымын во зільӧмаӧсь Удмуртияса бурдӧдчанінъясын. А сэсся тӧдмалӧмаӧсь «Земскӧй фельдшер» уджтас йылысь. Княжпогост районса шӧр больничасянь звӧнитӧмаӧсь да, Сергей шуӧма ветлыны «разведкаӧн». Синдорын сылы кажитчӧма, да и гӧтырыслы удж вӧлӧма. Семья-котыр чукӧртчылігӧн помшуӧмаӧсь: «Мунам».
Донаяс дай радейтанаяс
2012 воын том гозъялӧн чужӧма радейтана нылук – Лидия. Тайӧ нимыс семьяас вуджӧма пӧчьяссянь посниджыкъяслы да лоӧма зэв муса-матыссаӧн.
– Лидия мича нимыс талун зэв шоч. Миян нывным зэв шань, век майшасьӧ-тӧждысьӧ орччаясыс вӧсна. Мортлы кӧть пемӧслы кӧ лёк, инас оз ӧшйы, пыр зільӧ отсавны. Лидук нӧшта на и смел: кедзовтӧматӧ быть доръяс-мездас, – висьталіс Сергей Александрович. – Тимурлы 8 арӧс тырис. Мӧд классӧ нин котралӧ. Тшӧтш зэв шань да мелі. Челядькӧд ӧні лыддям «Тимур и его команда» небӧг. Ме серти, зонпоснилы колӧ лыддьысьӧмӧн сӧвмыны, а верстьӧлӧн мог – отсавны налы таын.
Вологдинъяс семьянас пырӧдчӧны спортӧ. Ветлӧны физкультураӧн ёнмӧдчан комплексын секцияясӧ, ворсӧны баскетболӧн, футболӧн. Тӧвнас исласьӧны лызьӧн, гожӧмнас журъялӧны велосипедӧн. Тимурлӧн эм нин медводдза вермӧм – «Россияса лыжняын» коймӧд места.
– Медся шудаӧсь семьяӧн коллялӧм лунъясыс. Тадзсӧ и челядь велӧдчӧны бура, пыр нырччӧны выляс. Найӧ ӧд видзӧдӧны миян вылӧ, а сэсся и асьныс сідз жӧ олӧны, – пасйис Сергей Александрович.
Семьяын шуд да лад
Вологдинъяс прӧст кадсӧ зільӧны тшӧкыдджыка коллявны став семьянас: гуляйтӧны, лыддьы-сьӧны, чужан лун да мукӧд гаж пасйӧны. Ставсӧ вӧчӧны сӧгласа да ӧтув.
– Екатерина Юрьевна гӧтырӧй – ыджыд молодеч. Сійӧ вӧчӧ челядькӧд гортса удж, чуйдӧ-воспитайтӧ найӧс. Кыкнанным уна уджалам. А менӧ и рыт-войын тшӧкыда корлывлӧны висьысьяс дорӧ. Гӧтырӧй фельдшер жӧ да, бура гӧгӧрвоам ӧта-мӧднымӧс. Екатерина Юрьевна зільӧ Синдорса поликлиникаысь лунся стационарын, – гӧгӧрвоӧдіс мужичӧй.
Семьяыс збыльысь сӧгласа. Екатерина Юрьевна тшӧтш зэв шоныда висьталіс верӧс йывсьыс:
– Сергей Александрович – тӧлка да сюсь морт, радейтысь верӧс да бать. Зэв веськыд, тӧждысьысь, кывкутысь, ылӧдчысьястӧ оз радейт. Челядь быдторйын велӧдчӧны сылысь. Сылӧн век вичмӧ меным да челядьлы кадыс, кӧть эськӧ и удж-нокыс юр выв тырыс. Оз бара-й ӧвтыштчы миянысь, кӧть сэсся мыйыс сӧмын удж вылас оз овлы.
Быд здукӧ орччӧн
Синдорса школаын велӧдчысьяс Лидия да Тимур ошкӧны жӧ батьсӧ. Сійӧ пӧ ён, винёв, аслас вынӧ эскысь, и сы вылӧ позьӧ быдторйын мыджсьыны. Челядь помтӧг радейтӧны Сергей Александровичӧс. Тимур кӧ ловнас усьӧ, батьыс быть серам петкӧдлас, ловрусӧ кыпӧдас: тешкодьтор висьталас, ворсны либӧ мыйкӧ мукӧдтор вӧчны ышӧдас. Ныв-пи батьыскӧд тшӧтш пазл тэчӧны, конструкторысь модель мастеритӧны, ывлаын гуляйтӧны. Овлӧ, вильшасигмоз небыд чачаӧн лыйсьӧны-шыбласьӧны.
Лида шуис, батьӧс пӧ удж кузяыс лун кӧть вой вермасны чукӧстны нёрпалысьлы отсӧг вылӧ да, сыкӧд орччӧн коллялӧм быд здук миянлы зэв дона да колана.
Сергей Александрович тшӧкыда волывлӧ и школаӧ, юасьӧ, кыдзи велӧдчӧны ныв-пиыс. Окотапырысь пырӧдчӧ сэн котыртлан быдсикас чукӧртчылӧмӧ: праздник-гаж пасйӧмӧ, гажа ордйысьӧм-ворсӧмӧ, «Нацияяс кроссӧ», «Россияса лыжняӧ». Бать челядьыскӧд век орччӧн да, таысь быдтасъясыс медся на ёна пыдди пуктӧны сійӧс.
Сергей Вологдин кутӧ велӧдысьяскӧд топыд йитӧд, отсасьӧ школаын дзоньтасян уджын, мукӧд юалӧм видлалӧмын да мытшӧд-гӧрӧд разьӧмын.
Матысса йӧзыд – олӧмын козин, да сійӧс колӧ вылӧ донъявны.
Людмила БАБАК,
Княжпогост р.
<> Комиӧдіс Елена ПЛЕТЦЕР. Снимокъясыс ВОЛОГДИНЪЯСЛӦН гортса архивысь.