Июнь 18 лунсянь Кулӧмдін районын заводитісны уджавны гожся шойччан да уджалан лагеръяс. Восьтыны сменасӧ волісны юрсиктӧ 57 велӧдчысь да 9 котырлӧн веськӧдлысь.
Тайӧ: Шӧръягысь “Дружба”, Немдінысь “Комета”, Діасёръяысь “Динамо”, Тымсерысь “Виктория”, Керчомъяысь “Юность”, Зимстанысь “Алые паруса”, Помӧсдінысь “ЛеТо”, Кебанъёльысь “Инициатива”, Кулӧмдінысь “Беспокойные сердца”.
Чукӧртчысьясӧс чолӧмавны волісны Кулӧмдін районӧн веськӧдлысь С.В. Рубан, татчӧс администрацияӧн веськӧдлысь В.П. Игнатова, уджӧн могмӧдан шӧринысь – О.П. Попова, велӧдан юкӧнысь веськӧдлысьӧс вежысь Т.Л. Артеева. Найӧ корисны кокниа пырӧдчыны уджӧ, да мед пӧ ставыс колис бура да мытшӧдъястӧг.
Аддзысьлӧм котыртысьяс нӧшта на казьтыштісны, мый том йӧзлы татшӧмсяма уджалӧм-шойччӧмыс зэв кивыв. /д эм позянлун велӧдчыны вӧчны верстьӧ удж, а такӧд тшӧтш и сьӧм нажӧвитыштны. Таысь кындзи тӧдчӧдісны, мый оз ков торкны корана индӧдъяс.
Медбӧрын воӧм котыръяслы нуӧдісны “Театральная история” квест-ворсӧм, кодӧс сиисны Россияын театр волы. Тані нин участникъяслы коліс гижны выль мойдкыв, пуктыны-петкӧдлыны импровизируйтӧм спектакль, вӧчны аквагрим да мукӧдтор. Кадыс колис зэв гажаа да ӧдйӧ.
Квестлы кывкӧртӧд вӧчӧм бӧрын тыдовтчис, мый вермысьнас лои кык котыр. Тайӧ Зимстанса “Алые паруса” да Шӧръягса “Дружба”. Налы вичмисны дипломъяс да козина сертификатъяс. Мукӧд командалы сетісны аттьӧалана кывъяс.
Татшӧм ыджыд гаж котыртӧмын ассьыныс пай пуктісны и “эзысь” волонтёръяс: уджалісны регистрация дырйи, ыджыдалісны кухняын, лӧсьӧдісны квест нуӧдӧм кежлӧ площадка, фотографируйтісны.
Татшӧм бура уджалан да шойччан смена восьтӧм бӧрын том йӧзлы ковмас пуктыны став выннысӧ, медым ставыс вӧлі лючки.
Кулӧмдінса администрациялӧн юӧр серти.
Талунъя «Йӧлӧга» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.