Тадзи ми Коми КВН-ысь ворсан «КилоМетръяс» котыркӧд вуджӧдлім Ёлкалысь «На большом воздушном шаре» сьыланысь кывъяссӧ. И тайӧ жӧ кывъясыс да шыладыс бергалісны юрын бӧръя вежон чӧжыс, ӧд водзвыв нин тӧді, мый вежалунӧ, июнь 23 лунӧ, ме лоа Ыбса финн-йӧгра этнопаркын «Ловъя сынӧд» фестиваль вылын.
Ыджыд шаръясӧн лэбалан татшӧм фестивальсӧ котыртлісны коймӧдысь нин. И этнопаркӧ волысьыс воысь-во содӧ. Та пӧрйӧ Ыбын гажӧдчис-шойччис, ылӧсалӧм серти, 6 сюрс гӧгӧр морт. Майбыр, быдӧнлы позис бӧрйыны аслыс сьӧлӧм вылӧ воанатор: лыйсьыны ньӧввужйысь, шенасьыштны мечӧн, йӧктыштны, пӧльтыштны быгйысь гадь, ветлӧдлыштны ходулиӧн, чеччалыштны батут вылын, вӧчасьыштны кос турунысь, дорны кӧрт лэбачӧс, журъялыштны мото- да квадроциклӧн, веж кӧ петас – чӧсмасьыштны юмов ватаӧн да пражитӧм яйӧн…
Ыбса этнопаркын ставсӧ водзвыв артыштӧмаӧсь, тшӧтш и сійӧс, мый поводдяыс кутас ыръянитны да, шаръяс оз вермыны качӧдчыны енэжӧ. Сідз кымын и лоис: пекничаӧ кӧ, июнь 21 лунӧ, Россия пасьталаысь да весиг Казахстанысь воздухоплавательяслы мойвиис – тӧлыс эз вывтіась да, найӧ вермисны ордйысьны ӧта-мӧдныскӧд, то субӧта-вежалунӧ вӧлі зэв тӧла. Та вӧсна лэбавны ыбъяс весьтті шаръясӧн эз позь. Сэк жӧ рытланьыс неуна лӧньыштліс, да окотитысьяс вермисны качӧдчывны енэжӧ сідз шусяна аэролифтӧн: шарсӧ кӧрталӧны, мед ылӧ-бокӧ оз лэб, да тадзи лэдзӧны кыпӧдчывны 40-50 метр вылнаӧдз.
Кыдзи висьталісны воздухоплавательяс, Ыбын, ӧти-кӧ, тӧла да сійӧ ёна вежласьӧ, а мӧд-кӧ, лэбавны ёнасӧ некӧн, зэв гежӧдлаӧ позьӧ пуксьывны да. Ю саяс пӧ и дзик нин сук парма, сылань нинӧмла и веськӧдчынысӧ.
Лэбавны кӧ та пӧрйӧ эз артмы, сьӧлӧмӧй бурмис «Город 312» котырлӧн сьылӧм-ворсӧмӧн. Сцена вылӧ петӧмсяньыс да помӧдзыс солистка Ая (Светлана Назаренко) сьыліс «ловйӧн», мыйӧн торйӧн нин нимкодьӧдіс, ӧд талун унджык «кодзулыс» фонограммаасьӧны. Этнопаркӧ локтысьяс йӧктісны да ливкйӧдлісны музыкантъяскӧд тшӧтш бура нин тӧдса «Фонари», «Невидимка», «Обернись» да, дерт, «Останусь» сьыланъяс.
Сигӧртісны фестивальсӧ аэростатъяслӧн уна рӧмӧн ворсӧдчӧм-ӧзъялӧмӧн.
А ме карӧ мунігӧн бара на ас кежысь гусьӧник сьылі: «А ме лэбзя пӧльтӧм шарӧн…» И лэбзя. Сӧмын локтан воӧ нин…
Елена Плетцер.
Снимокъясыс Галина Макаровалӧн.
«Коми му» газет позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.