Куим яръюгыд рыт козьналісны искусство радейтысьяслы Маяковский нима Москваса академическӧй театрысь артистъяс.
Радейтана «кодзувъяс»
Медводдза спектакльыс, кодӧн Виктор Савин нима драмтеатрын петкӧдчисны Москваса артистъяс, вӧлі Б.Шоулӧн «Пигмалион». Сюрӧсыс тӧдса: профессор заклад вартӧ полковниккӧд, мый некымын тӧлысьӧн вермас велӧдчытӧм дзоридз вузалысьысь вӧчны герцогиняӧс…
Нималана пьесаын ворсісны Ольга Прокофьева, Анатолий Лобоцкий, Игорь Костолевский, Наталья Палагушина, Юлия Самойленко, Евгений Парамонов, Юрий Соколов да мукӧд.
Мӧд яръюгыд постановка – Л.Толстой серти «Плоды просвещения». Видзӧдысьяс сералісны дворяна вылӧ, кодъяс эскӧны ловъясӧ да сійӧ либӧ мӧд юалӧмъясӧн шыӧдчӧны на дорӧ. Шӧр геройыс помещик Звездинцев (ворсіс Игорь Костолевский) весиг юасьӧ ловлысь, позьӧ оз вузавны крестьяналы му. Сылысь гӧтырсӧ зэв бура ворсіс Татьяна Аугшкап. Ань оз эскы мӧдаръюгыдса олӧмӧ, видлӧ восьтыны верӧсыслысь синсӧ, но весьшӧрӧ.
Тайӧ жӧ постановкаын дзирдалісны радейтана артистъяс Михаил Филиппов, Любовь Руденко да Светлана Немоляева.
Толстойлӧн пьесаын Светлана Немоляева ворсіс ичӧт роль – кухаркаӧс. А Островскийлӧн «Бешеные деньги» тешын РСФСР-са народнӧй артисткалӧн вӧлі ыджыд роль – олӧма нин гӧльмӧм дворянка Надежда Антоновна Чебоксарова.
Островскийлӧн пьеса сюрӧсыс и ӧнія кадлы лӧсялӧ. Дерт, дворяна ӧні абуӧсь, но гӧльмӧм озыр йӧз, кодъяс велалӧмаӧсь лышкыдасьны, а сьӧмыс абу, паныдасьлӧны. Со и тайӧ спектакляс Москваысь рӧзӧритчӧм дворяна ветлӧдлӧны экипажӧн, юӧны шампанскӧй, видзӧны слугаясӧс, ньӧбасьӧны, но ставсӧ уджйӧзӧн.
Тадзи жӧ велалӧмаӧсь лышкыдасьны Чебоксарова мама-ныла. Кыдзи пасйи нин, мамсӧ ворсіс Светлана Немоляева, а сьӧм вылӧ горш 24 арӧса Лидия нывсӧ – Полина Лазарева. Полина, коді оз тӧд – Светлана Немоляевалӧн внучка. Том «кодзув» пӧчыс кодь жӧ енбиа…
Водзӧ лыддьӧй талунъя «Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.
Екатерина МАКАРОВА.
Снимокъясыс Виктор Савин нима драмтеатрлӧн сайтысь.