Октябрь 8 лунӧ Кӧрткерӧс районса Вомын сиктын паськӧдчыліс «Чомӧр» йӧзкостса гаж. Нэмъяс чӧж коми войтыр кыпыда пасйӧны му вылын арся удж эштӧдӧм-сигӧртӧмсӧ.
17 во нин вомынсаяс чукӧртлӧны ыджыд гаж вылӧ оз сӧмын ас районсаӧс, но и мукӧд кар-сиктын олысьясӧс. Воысь-во татчӧ волывлӧ пыр унджык и унджык гӧсьт. И абу дивӧ, ӧд «Чомӧр» дырся капустаыс тані медся на чӧскыд! И бипур вылын пӧртйын пуӧмыс, и шоммӧдӧм-солалӧмыс!
Асывсяньыс сиктса культура керка дорын меститчисны асланыс йӧр-овмӧсӧн (подворьеӧн) районса сикт-грездысь воӧмаяс. Быдӧнлы найӧ вӧзйисны чӧскыд пӧжас, град выв пуктас, йӧв, чери-яй, весиг юква да самӧварын сӧмын на пузьӧдӧм уна сикас турун-вотӧса тшай.
Вочасӧн заводитчис кыпыд гаж. «Чолӧм» сьыланкывйӧн гӧсьтъясӧс вочааліс Вомын сиктысь «Коми ань» котыр. Сы бӧрын ставнысӧ чолӧмаліс Кӧрткерӧс районса юралысь Константин Анатольевич Сажин да сиис водзӧ нуӧдны да сӧвмӧдны пӧль-пӧчлысь традициясӧ.
Шензьӧдіс гӧсьтъясӧс видз-му овмӧс техника парад. Шӧр туй вылын мыччысисны быд ногыс мичмӧдӧм-баситӧм мотоблокъяс: руль сайын вӧлі и жӧника-невесталӧн кӧлысьдырся «кортеж», и телегаын шойччысь ичӧтик кукань нуысь доярка, «тэрыб отсӧг», Ёма-баба да сылӧн мошкоритчысь-отсасьысьяс, а сигӧртіс ставнысӧ Александр Зюзевлӧн мичмӧдӧм ыджыд лӧз тракторыс! Но и дасьтысьӧмаӧсь жӧ! Кутшӧм молодечьяс! Ёна мичмӧдісны асланыс петкӧдчӧмӧн кыпыд гажсӧ!
Техника парад бӧрын гӧсьтъяс бӧрйисны медся мичасӧ да аслыспӧлӧссӧ. Вермысьнас лоины Ёма-бабалӧн да сылӧн мошкоритчысь-отсасьысьяслӧн мойдвывса мотоблокыс. Вӧлӧмкӧ, тайӧ котырыс воӧма юркарысь, уджалӧны-зільӧны найӧ Коми Республикаса содтӧд тӧдӧмлун сетан шӧринын.
– Кольӧм во Вомынысь ме ньӧби дача, гожӧмбыд тані олам, нимкодясям мича вӧр-ванас да татчӧс шань да сибыд йӧзнас, пыдди пуктам найӧс традицияяс видзӧм-сӧвмӧдӧмысь да уна сикас гаж котыртлӧмысь, – висьталіс парадын вермысь Надежда Боровкова. – Конкурсӧ пырӧдчим олан ру кыпӧдӧм да гажӧдчӧм могысь, а тшӧтш и уджвывса ёртъяс воисны ме дорӧ гӧститны, ӧдйӧ и мӧвпыштім ӧтув дасьтысьны. Со и артмис миян мойдвывса аслыспӧлӧс петкӧдчӧм.
А сцена вылын водзӧ юргисны мыла сьыланкывъяс. Ставныс петісны йӧктыны Володя Трошевлӧн да «Гуляночка» ансамбльлӧн сьылӧм-ворсӧм улӧ. Гажӧдісны чомӧрасьысьясӧс тшӧтш и юркарысь «Греннис» котыр, Оля Сан да уна мукӧд петкӧдчысь.
Пуӧм капустаӧн чӧсмасьӧм могысь ковмис весиг кузь ӧчеред сулавны, сы мындаӧн окотитісны видлыны пӧртйын душник корйӧн да сэтӧр вожйӧн пуӧм вӧлӧгатӧ. А чӧскыд да! Дульваыд визувтас…
Рытланьыс гажыс эз на помась – ставнысӧ виччысисны йӧктыны «Капуста Danсe» дискотека вылӧ.
* * *
Збыльысь гажа вӧлі Вомынын! Торъя шань руӧн ӧвтіс сэні. Ыджыд аттьӧ кыпыд гаж дасьтысьяслы, нуӧдысьяслы, отсасьысьяслы, пусьысь-пӧжасьысьяслы, тшӧтш и гажӧдчысьяслы.
Лача кутам, и локтан воӧ, и водзӧ уна-уна во на усьлас шуд сьӧлӧмсянь чомӧрасьны-гажӧдчыны Вомынын. <>
Дасьтіс Галина МАКАРОВА.
Снимокъясыс авторлӧн да «ВКонтактеын» «Дом культуры с. Вомын» котырлӧн.