Кулӧмдін районса Помӧсдінын ӧтувтчылісны водзмӧстчысь ныв-зон. Тайӧ важся мича сиктас коми томуловлӧн «МИ» котыр котыртліс блогеръяслысь школа. Кыпыд аддзысьлӧм вылӧ волісны эз сӧмын Коми Республикаса кар-районысь, но и Удмуртияысь да Марий Элысь гӧсьтъяс.
«МИ» котырӧн веськӧдлысьӧс вежысь Ксения Таскаева висьталіс, кыдзи коми том блогеръяс кык лун велӧдчисны вӧдитчыны аудио-, фото-, видеоаппаратураӧн, босьтны интервью, вӧчны операторлысь удж.
– Ксения, мыйла буретш Помӧсдінын чукӧртчылінныд?
– Ми кӧсъям быдтыны том этноблогеръясӧс, кодъяс гижӧны комиӧн асланыс чужан му, тӧдчана лоӧмторъяс да нималана йӧз йылысь. Кыдз тӧдса, миян республикаын кызвын комиыс олӧны буретш Эжва йылын. Кулӧмдінын, Помӧсдінын али кӧні медъёна кывнас вӧдитчӧны? Бӧрйим Помӧсдін, кӧні коми томуловыс уна, да сэсся сэні таво буретш школа воссис, кӧні быдсикас выльторйӧ кокниджык босьтчыны.
– Кодъяс пырӧдчисны «Блогеръяслӧн школаӧ»?
– 50 морт чукӧртчылім. Медуна вӧлі, дерт, гырысь класса велӧдчысьыс, ставӧн сиктса томулов. Сӧмын ӧтиӧн вӧліны Интаысь да Сыктывкарысь. Волісны тшӧтш Удора да Кӧрткерӧс районъясысь, Эжва йывса мукӧд сикт-посёлокысь ныв-зон.
– Кӧні олінныд?
– Велӧдчысьясӧс бать-мамыс новлӧдлісны, кодсюрӧ автобусӧн волісны. А ми, гажсӧ котыртысьяс, Сыктывкарса делегация, Усогорскысь «Войвыв Ру» рок-котыр, Удмуртияысь да Марий Элысь гӧсьтъяс, школаса интернатын олім. Зэв бура миянӧс вочаалісны-примитісны сэні.
– Кыдзи пансис том йӧзлӧн уджыс? Быдӧн ас кежас уджаліс али котырӧн?
– Юксим некымын нырвизь серти. Ӧтияс велӧдчисны гижны комиӧн профессиональнӧй интервью. Налы отсасисны «Юрган» телеканалын зільысьяс да «МИ» котырӧн веськӧдлысь Светлана Макарова. Сыктывкарса «КуБрик» медиа-школаысь Павел Прошутинский велӧдіс вӧчны съёмка сідз шусяна хромакейӧн. Скетч снимайтны дасьтісны «КуБрик» школаӧн веськӧдлысь Вероника Тарзянлӧн юрнуӧдӧм улын. Ныв-зонлы вӧлі лӧсьӧдӧма и видео снимайтны велӧдан юкӧн, кӧні отсасисны Удмуртияысь «КУАРА» котырысь уджъёртъяс. Ставлы ёна кажитчис веськыд эфирын петкӧдчӧм. Никита Чернов быдса студия вайліс та могысь.
– Мый артмис тайӧ кык луннас томуловлӧн?
– Быд котыр петкӧдліс ассьыс медиауджсӧ. Клип, скетч, интервью… Ставсӧ вермам аддзывны миян телеканалын да ӧтуввезйын. Кор челядь петкӧдлісны ёрта-ёртныслы вӧчӧмторсӧ, ставӧн сьӧлӧмсяньыс ошкисны-клопайтісны. Быдӧнлы козьналім «МИ» котырлысь да «Блогеръяслӧн школалысь» значок-пас, медым гӧрдитчӧмӧн новлісны морӧсаныс. Миян весиг хэштегъяс чужисны. На отсӧгӧн водзӧ вылӧ вермам кокниа аддзыны миян проектӧ пырӧдчысьясӧс. Но челядьлы медся ыджыд наградаӧн лои, дерт, выль тӧдӧмлун босьтӧм. Тайӧ ёна ковмас налы водзӧ уджын. «Блогеръяслӧн школакӧд» йитӧдын миян весиг чужи фотовыставка проект. Искусствояс гимназияысь босьтлім концертасян мича этнопаськӧм. Тима Веньлӧн керка-музей дорын Павел Прошутинскийлӧн туйдалӧмӧн томулов вӧчисны мича снимокъяс. Наысь сэсся дасьтам фотовыставка да петкӧдлам республикаса мукӧд кар-районын олысьяслы.
– «Блогеръяслӧн школа» – тайӧ абу ӧтка проект?
– Дас воысь дыржык «МИ» котыр нуӧдӧ тайӧ уджсӧ. Республикаса районъясын водзті вӧлі нин блогеръяслӧн кӧкъямыс школа. Ӧні тайӧ водзмӧстчысь томулов дорас содіс нӧшта 50 кымын морт. Талун ёна нималӧ блогер уджыс. Быдӧнлӧн нин зептас эм смартфон, мыйӧн став мирыслы верман висьтавны-петкӧдлыны, мый аслыд окота. Медтӧдчанаыс – лоны интереснӧй мортӧн да мыйкӧ интереснӧйтор жӧ висьтавны. Ми ышӧдам та могысь томуловӧс да быд боксянь зілям отсавны налы.
– Гашкӧ, водзӧ вылӧ нин мӧвпъяс эмӧсь?
– Корӧны нин миянӧс бара котыртлыны татшӧм школасӧ, но ичӧтджык арлыдаяслы. Гашкӧ, регыдъя кадӧ нин босьтчам таӧ. Мӧвпалам и Удора районкӧд водзӧ ӧтувъя удж йылысь. Усогорскысь «Войвыв Ру» котырлӧн абу профессиональнӧй альбомыс. Кутам корсьны та вылӧ сьӧм. Блогеръяскӧд аддзысьлӧмсӧ корӧны нуӧдны и Удораын. Локтан вося тулысын, чайтам, чукӧртчылам. Водзӧ вылӧ уджыс миян тырмымӧн. <>
Екатерина МИКУШЕВА.
Снимокъясыс ӧтуввезйысь.