Кольӧм пекничаӧ Кӧрткерӧс районса Ыджыдвидз сиктын вӧлі, ок, и гажа! Став сиктӧн да воӧм гӧсьтъяскӧд сэні пасйисны Прокопей лун.
Зэв нимкодь, мый дзик быд во (пандемия кадысь ӧтдор) Ыджыдвиддзын пасйӧны сиктыслысь чужан лун, кодӧс йитӧмаӧсь буретш Прокопей лункӧд. Колӧ тӧдчӧдны, орчча Джиян грездын пасйӧны Иван лун, Зулӧбын – Пантелей, а Висерын – Илля лун. И тайӧ крам праздникъяссӧ сэні нимӧдӧны уна во нин.
Прокопей лунӧ Ыджыдвидзса культура керка дорын йӧзыс вель уна чукӧрмыліс: ичӧт челядьсянь верстьӧ-олӧмаӧдз.
Медводз ставнысӧ кыпыд гажӧн чолӧмаліс Ыджыдвидзса сиктсӧветӧн веськӧдлысь Евгений Мишарин. А сэсся мича сьылӧм-йӧктӧмӧн паськӧдчыліс ыджыд концерт.
Ок, и сизьдісны-йӧктісны да мылаа сьылісны Висерысь, Зулӧбысь, Типӧсиктысь да, дерт жӧ, ас сиктысь котыръяс. Мича сьыланкывъяс козьналіс Шойнатыысь Владимир Ширяев.
Эз вунӧдны гаж дырйи сины крепыд дзоньвидзалун сиктса медся олӧма йӧзлы: 1931 воын чужлӧм Мария Александровна Симпелевалы, Мария Капитоновна Макаровалы (1932), Агния Архиповна Габовалы (1932), Капитолина Алексеевна Панюковалы (1933) да Нина Александровна Никифоровалы (1935).
Коми йӧзӧдчан керкасянь Ыджыдвидзса клублы сиктлысь чужан лун пасйӧмкӧд йитӧдын козьналім витнан коми газет-журнал вылӧ гижӧдчан сертификат.
А «Коми му» газеткӧд топыд йитӧд кутӧмысь, ёртасьӧмысь, ас сикт да татчӧс войтыр йылысь гижӧдъяс дасьтӧмысь аттьӧалана гижӧдъяс сетім Анна Александровна Поповалы да Ольга Ивановна Мишариналы. Буретш налӧн водзмӧстчӧмӧн Ыджыдвиддзын олӧм-вылӧм йылысь тӧдмалӧны и республикаса мукӧд кар-районын олысьяс.
Сиа тайӧ кыпыд да паськыд, чача кодь мича керка-йӧръяса, водзмӧстчысь, нималана, зіль да уджач йӧза сиктыслы водзӧ сӧвмыны-быдмыны, видзны ас культура да традицияяс. Кузь нэм да бур шуд, дона Ыджыдвидз! <>
.
Галина МАКАРОВА. Снимокъясыс Илья МАКАРОВЛӦН.