Страдна… Кор нӧ, он кӧ тайӧ кадас, нуӧд ытшкысьяслысь гажтӧ. Таво нёльӧдысь нин Кӧрткерӧс районса Одыбын чукӧртчылісны гӧрбуш да литовка косаясӧн, триммерӧн ытшкысьяс.
Сиктдорса видз вылӧ йӧзыс асывсяньыс мӧдісны чукӧртчыны. Локталісны эз сӧмын одыбсаяс, воалісны и мукӧдлаысь. Выльгортысь Елена Римских во-мӧд сайын кывлӧма ордйысьӧм йывсьыс да шуӧма аслыс, быть пӧ коркӧ ветла да ассьым сямӧс петкӧдла жӧ. И таво гожӧм со тшӧтш ордйысис. Одыбысь Евгений Поповӧс детинкаӧн на косанас вӧдитчыны велӧдлӧма батьыс. Шуӧ, гӧрбуш косанад пӧ медбур ытшкынытӧ.
Мужичӧйяслы покоссӧ вӧлі индӧма комын метр кузьта, нывбабаяслы – кызьӧс. Командаясӧн венласигӧн мужичӧйяс ытшкисны 20 метр, аньяс – 10-ӧс. Водтӧдӧм турунсӧ сэсся коліс куртны, юравны.
Кыдзи пӧ уджалан, сідзи и гажӧдчан. Гажсӧ дасьтысьяс бура лӧсьӧдчӧмаӧсь: турунысь быдсяматорсӧ вӧчалӧмаӧсь, сьылысь-ворсысьясӧс корӧмаӧсь, пусьӧмаӧсь-пӧжасьӧмаӧсь. Сиктса ветеранъяслӧн сӧветысь войтыр чӧсмӧдлісны гӧсьтъясӧс сьӧла да кук яйӧн, сир да ёді юкваӧн, чериняньӧн, чӧдъя да льӧмъя лязӧн, туруна чайӧн.
Татшӧм гаж бӧрад кодъяслыкӧ и аслыныс окота лоас босьтны киас косатӧ да локтан воӧ тшӧтш волыны Одыбӧ ордйысьны. <>
Лист боксӧ дасьтіс Павел АНОХИН. Снимокъясыс ӧтуввезйысь.