Коді шуис, мый ытшкӧмыс – мужичӧй удж? Миян сикт-грездад олӧны збыль Аньяс. Одыб сиктын «Ытшкы, коса!» гаж вылӧ медводдзаысь на воӧм Ольга Старцева – на пӧвстысь ӧти.
Ичӧтдырйиыс Ольгалы турун пуктыны гежӧда вичмывлӧма, асьныс скӧт абу видзӧмаӧсь да. Но чуксав-лӧмаӧсь кӧ сиктсаяс, окотапырысь ветлывлӧма отсасьны.
Ныв шуӧ, лэчтавны косасӧ пӧ колӧ мужичӧйлы, а со бура ытшкынытӧ и нывбаба велалӧ. Медся тӧдчанаыс – косаыс мед лӧсяліс кузьта-пасьтанас, да мед эськӧ и пелькиник да кокньыдик вӧлі. И ытшкынысӧ колӧ асъя лысва дырйи: сэки и туруныс сетчӧджык, и косаыд озджык ныжмы.
Горт дорас Ольга Старцева тшӧкыда ӧвтчӧ литовкаӧн. Шойччан пӧ вӧр-ва бердас, и сьӧлӧм-лолыд бурмӧ чӧскыд турун дуксьыс. <>
Снимокыс да гижӧдыс Кӧрткерӧсса библиотекаысь медиаволонтёръяслӧн.