Кудым-Ош му вылын

Июль 8-9 лунъясӧ Кудымкарса перым-коми этнокультура шӧринын «Народы коми: история, культура, сотворчество» этнокультура форум вылӧ чукӧртчылiсны Перым муысь, Коми Республикаысь да Киров обласьтысь комияс.

Кыдзи пасйис гажсӧ восьтігас этношӧринӧн веськӧдлысь Мария Носкова, татшӧмсяма форумыс Перым муын котыртчӧ мӧдӧдысь. Пансьӧма ставыс 2018 воын сусед-комияслӧн ӧта-мӧд дорӧ волӧмсянь, а мӧд вонас нин мӧвпыштӧмаӧсь да медводдзаысь кыпыда нуӧдӧмаӧсь ӧтувъя гажсӧ. 2022 вося аддзысьлӧмсӧ сиӧма йӧзкостса искусство да Россияса войтырлысь культура нимӧдан волы. Сьӧмыс вичмӧма «Общество да власьт» Перымса государственнӧй программа серти.

Форумыс ӧтувтіс уна площадка: кыв туялысьяслысь, гижысьяслысь, велӧдысьяслысь, культураын уджалысьяслысь, ас киӧн вӧчасьысьяслысь.

Тӧдчана лоӧмторйӧн вӧлi Коми Республикаса национальнӧй политика да Перым-Коми кытшын тӧжд-мог кузя министерствояс костын коми-зыряна да перым-коми войтырлысь йитӧд ёнмӧдӧм, этнокультурасӧ водзӧ сӧвмӧдӧм йылысь сёрнитчӧм кырымалӧм.

Комиысь форум вылын вӧлi бура ыджыд делегация: национальнӧй политикаса министр Роман Носков, «Коми велӧдысь» котырӧн веськӧдлысь Мария Кузьбожева, финн-йӧгра культура шӧринын уджалысь Светлана Козулина, кыв туялысь Евгений Цыпанов, Пӧдтыбокысь «Любава» сьылан котыр, библиотекаын да музейын уджалысьяс, гижысьяс, журналистъяс да мукӧд. Быдӧн зiлис юксьыны рӧдвуж войтыркӧд аслас удж-опытӧн, тӧдӧмлунъясӧн, сямлунӧн.

Тӧдчана сёрни вӧлi кыв туялан да кыв велӧдан площадкаясын. «Син сайын чулалӧм кад» лекторий дырйи перым-коми гижӧд кыв паськӧдан туйяс йылысь висьтасис филологияса доктор Евгений Цыпанов:

Перым-коми ёртъяс ёна кольччӧмаӧсь чужан кыв паськӧдан уджын. Сёрни дырйи индi некымын нырвизь, мый серти зэв на унатор колӧ вӧчны, торйӧн кӧ, лӧсьӧдны быдсикас выль кывкуд, дасьтыны да йӧзӧдны перым-коми гижӧд кыв велӧдан небӧгъяс верстьӧ йӧзлы, гижны уна йӧзлы лыддяна уджъяс комиӧн да рочӧн, да мукӧдтор.

Кыв велӧдан площадка ӧтувтіс велӧдысьясӧс, общественникъясӧс, коми кыв радейтысьясӧс. Та пӧрйӧ уджас пырӧдчисны Сыктывкарса 38-ӧд номера школаын коми кыв велӧдысь Марина Жданова да «Коми велӧдысь» котырӧн веськӧдлысь Мария Кузьбожева.

Сёрниыс муніс велӧдӧмӧ быдсикас ӧнія технология пыртӧмӧн челядьӧс коми кыв велӧдны ышӧдӧм йылысь.

Коми гижысь, «Би кинь» журналса шӧр редактор Алёна Нестерова пырӧдчис гижысьяслӧн площадкаӧ. Тані сёрниыс пансис талунъя литература йылысь.

Роч автор Игорь Тюленев тӧдмӧдіс Перым гижысь котырлӧн уджӧн, этношӧринын зільысь Людмила Войлокова висьтасис Перымын небӧг да литература газет-журнал йӧзӧдӧм йылысь, чужан му туялӧмын водзмӧстчысь Михаил Мартынов тӧдмӧдіс аслас выль небӧгӧн, Алёна Нестерова петкӧдліс да козьналіс этношӧринлы Коми йӧзӧдчан керкалысь финн-йӧгра культураӧн тӧдмӧдан петасъяс, а сідзжӧ висьтасис Коми Республикаса гижысь котырлӧн удж йылысь:

Литература сӧвмӧдӧм могысь Коми Республикаын унатор вӧчсьӧ. Культура да национальнӧй политика министерствояс гӧгӧрвоӧны гижӧда кывлысь вынсӧ да коланлунсӧ да быд ногыс отсасьӧны. Кар-районъясын библиотекаяс ышӧдӧны йӧзӧс лыддьысьны. Гижысьяслы эм кыдзи петкӧдчыны творчествонас: позьӧ йӧзӧдчыны журналъясын, ӧтувъя сборникъясын, пырӧдчыны фестивальясӧ, конкурсъясӧ, аддзысьлыны лыддьысьысьяскӧд. Миян эмӧсь асланым литературнӧй премияяс, нуӧдсьӧны семинаръяс, эм некымын литература котыр. Уна на позьӧ лыддьӧдлыны. Чайта, медыджыд пайыс таын Елена Васильевна Козловалӧн, коді матӧ 27 во веськӧдліс Коми Республикаса гижысь котырӧн.

Рытнас Белоево сиктса библиотекаын Алёна Нестерова аддзысьліс ичӧт войтыркӧд, тӧдмӧдіс найӧс «Би кинь» журналӧн, нуӧдіс коми кывъя «Пӧла-пӧла» пызанвывса ворсӧм. Уна коми кыв перым-коми зонпоснилы вӧлӧма тӧдса нин, и найӧ любӧпырысь видлісны ассьыныс выннысӧ Би киньӧн дасьтӧм юржугланын. Тані аддзысисны и кык ӧткодь мога журнал-вокъяс: «Би кинь» да «Сизимок». «Сизимокын» тшӧтш йӧзӧдӧны челядьлы да налысь литература гижӧдъяс, корсьӧны енбиа авторъясӧс, петас пырыс сӧвмӧдӧны кыв да культура.

Коми Республикаса национальнӧй музейын уджалысь Наталья Хозяинова пырӧдчис этнокультура уджтасъяс нимӧдан площадкаӧ. Тані культураын зільысьяс висьтасисны Комиын да Перымын том йӧзӧс коми оласногӧ ышӧдӧм йылысь. Чукӧртчысьяс юксисны, кыдзи музейясын, библиотекаясын, культура керкаясын, гожся лагеръясын пӧртӧны олӧмӧ быдсикас тӧдчана уджтас. Натальялӧн форум бӧрся висьтасьӧмысь:

Сёрниыс мунiс сы йылысь, кыдзи талун йитны нэмӧвӧйся культуралысь озырлунсӧ ӧнiя кадыскӧд, вӧчны сiйӧс том йӧзлы моднӧйӧн. Ме, музейын уджалысь, сёрнитi, кыдзи музейса коллекция подув вылын вӧчавны сувенир коми серӧн мичмӧдны чышъян либӧ шарп. Сёрнитi, кыдзи Удора районӧ ӧти ветлӧм бӧрын миян чужис «Кунды-мунды» уджтас, кодлӧн нырвизьыс история да культура памятникъяс видзӧм. «Войдӧр» выставка йылысь висьтасигӧн петкӧдлі видлӧг, кыдзи музей режиссируйтӧ сэтчӧ волысьяслысь мӧвпъяссӧ, медым налӧн чужасны юалӧмъяс, да на вылӧ вочакывъяссӧ аддзасны танi жӧ.

Кудымкарӧ ветлӧмын чуймӧданаӧсь вӧлiны медводз восьса сьӧлӧма йӧзыс. И карсаяс, и сиктсаяс. Мунiгӧн нимкодьпырысь лыддим налысь вӧр-ва нимъяссӧ: Сёйва, Сю Нимкодь и, мый том йӧз оз кодлӧнкӧ тшӧктӧм-индалӧмӧн, а асланыс водзмӧстчӧмӧн зiльӧны йитны вужвойтырлысь нэмӧвӧйся культурасӧ ӧнiя олӧмыскӧд. Павел Здорнов том зон та боксянь бур пример. Сiйӧ ачыс вурӧ шамшура перым-коми аньяслысь чышъян. Гожся лагерын этнокультура смена дырйи дизайнералӧ.

Кыкнан лунсӧ Кудымкарын да орчча сиктъясын сэтчӧс олысьясӧс да форум вылӧ воӧмаясӧс гажӧдісны сьылан-йӧктан котыръяс. Ас киӧн вӧчасьысьяс нуӧдісны мастер-классъяс. Та пӧрйӧ вӧлi и «Кипода морт» вермасьӧм. Павел Здорновлы, кодлӧн уджъясыс торйӧн нин воисны сьӧлӧм вылас коми делегациялы, конкурс котыртысьяссянь тшӧтш вичмис козин да аттьӧалана гижӧд.

Этношӧринын том йӧзӧс кысьыны-вурсьыны-печкыны велӧдӧ зарни киа ань Надежда Климова. Колӧ шуны, перым-коми этношӧринын челядькӧд да верстьӧкӧд нуӧдсьӧ збыльысь зэв тӧдчана удж. Быдӧн вермас пырӧдчыны кӧсйӧм сертиыс енбисӧ сӧвмӧдан нырвизьӧ: ас киӧн вӧчасьны, сьывны, йӧктыны, спектакльын ворсны, кывбур-висьт гижны. Шуам, Кудымкарӧ вотӧдз туй вылас Комиысь делегацияӧс сьыланӧн да шаньга-сурӧн вочааліс «Шондібан» ансамбль. Тайӧ лои зэв виччысьтӧм да та вӧсна торйӧн нин нимкодь. Форумсӧ восьтігас сцена вылын аньяс петкӧдчисны уна сикас бабаюрӧн. Зэв мичаа видзӧдсис. Та кындзи этнофорум дырйи вӧлі восьтӧма юркышӧда фотовыставка. Татшӧм жӧ выставка мӧдіс и Комиӧ, финн-йӧгра культура шӧринӧ.

Пӧдтыбокысь миян «Любава» ансамбль уналаын жӧ петкӧдчис тайӧ кык лунас. Екатерина Семяшкина, артистъяс пиысь ӧти, удж сертиыс – библиотекар, висьтасис ветлӧм йывсьыс тадз:

Этнофорумын меным кажитчис дзик ставыс. Ветлӧмыс вӧлi менам водзвыв чайтӧм серти ёна бурджык. Медся ёна сьӧлӧм вылӧ воис форумыслӧн кыпыд да югыд лолыс. Ӧд комиӧн сёрнитысь сэтшӧм уна тӧлка йӧз чукӧртчисны! Ставныс енбиаӧсь, киподтуяӧсь, шаньӧсь югыд йӧз, кодъяс ышӧдӧны-нуӧдӧны ас бӧрсяыс. Зэв нимкодь, кор тыдалӧ, кыдзи вужвойтыр видзӧ-cӧвмӧдӧ ассьыс культурасӧ. Выль тӧдмасьӧмъяс чужтісны выль мӧвпъяс, ми ӧд пыр ёрта-ёртлысь велӧдчам.

Ме зэв рад, мый збыльмис важся кӧсйӧмӧй: сёрнитны перым-комияскӧд комиӧн. Майшасьыштi, мися, гӧгӧрвоам ог ёрта-ёртнымӧс? Зэв на и бура тайӧ миян артмис. Перым-коми кыв зэв мыла, небыд да авъя, кыдз и миян чужан коми кывным. Ми збыльысь ӧти войтыр. Чайта, неуна дырджык кӧ олыштiм Кудымкарын, велалiм эськӧ сёрнитны и перым-коми ног.

* * *

Форум вылӧ воысьяслы мойвиис кытшовтны ставнас Кудымкарсӧ, шензьыны-нимкодясьны сэтчӧс музейӧн, ывласа скульптураясӧн, кайлыны Изъюр кыр вылӧ, кытчӧ медводдзаӧн тувччӧма Кудым-Ош багатыр да шуӧма Кува да Иньва ӧтлаасянінӧ овмӧдны ас войтырӧс. Тадзи и пансьӧма 1579 воын Кудымкарыс. И вокъясным, перым-комияс, талун сьылӧны да виччысьӧны ставнымӧс гӧститны муса чужанінас:

Кык сой Кува да Иньва да вылын берег дор.

Радейтам ёна мийӧ Кудымкар гажа горт

(Михаил Вавилин.)

<> Алёна НЕСТЕРОВА. Снимокъясыс ӧтуввезйысь.

Кудым-Ош му вылын

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх