Июль 15 лунӧ Комиын котыртлісны видз-му овмӧсын зільысь специалистъяслы ордйысьӧм. Та дырйи вӧлі тшӧтш бур пӧрӧдаа скӧт петкӧдлан выставка.
Суйӧрсайса странаясӧн Россия дзескӧдан санкцияяс йӧзӧдӧм понда талун торйӧн нин тӧдчана сӧвмӧдны ассьыным быдсикас производство, тшӧтш и видз-му овмӧсын унджык скӧт вӧдитны, йӧв-яй вӧчны да град выв пуктас быдтыны. Ӧд та сайын — страналӧн продовольственнӧй безопасносьтыс.
Со и петкӧдлісны Комиысь аграрийяс ассьыныс сям-кужӧмлунсӧ, а сідзжӧ мыйӧн ми озырӧсь да мыйӧн вермам ошйысьны. Профессияын медбур ним шедӧдӧм вӧсна ордйысис 28 специалист: машинаӧн мӧс лысьтысьяс, зоотехник-селекционеръяс да стада выльмӧдӧм кузя операторъяс. А бур пӧрӧдаа 40 сюрук-пемӧс петкӧдлісны регионса 14 предприятие да фермер овмӧс. Та кындзи выставкаысь позис аддзыны кӧза, ыж, кӧр, вӧв, кролик, гортса пӧтка да весиг як. А черисӧ лэдзисны тшӧтш и вугравны.
Регионса селекция шӧринӧн веськӧдлысь Виктория Молодцовалӧн юӧр серти, талун предприятиеас рӧдмӧдӧм могысь видзӧны 19 племеннӧй ӧш: 17-ыс — производительяс, «уджалӧны», кыкыс томӧсь на. На пӧвстысь медся арлыдаыслы — 7 во, медся ёныс — тоннаысь сьӧкыдджык, холмогор пӧрӧдаа. Татшӧмсяньыс сюрукъяс вонас лысьтӧны 9 сюрс гӧгӧр килограмм йӧв.
Селекция шӧринын видзӧны ӧшъяслысь 523 сюрс доза «кӧйдыс». Весиг 1980-ӧд воясся эм, сыӧн вӧдитчӧны холмогор пӧрӧда видзӧм могысь, вывті гежӧд нин пӧ да, быранвыйын.
Ставнас жӧ Комиын талун видзӧны 4 сюрс гӧгӧр мӧс-кук, кызвыннас холмогор да айршир пӧрӧдаа. Племеннӧй овмӧсъясысь медуна йӧв лысьтӧны Межадорсаын — 8.037 литр. Яй вылӧ скӧтсӧ рӧдмӧдӧны сӧмын Куратовын, но та серти уджсӧ пӧ колӧ водзӧ нуӧдны.
Ордйысьны воӧмаясӧс чолӧмалігӧн Коми Республикаса юралысь Владимир Уйба пасйис, мый видз-му овмӧсыс экономикалы зэв тӧдчана. Та вӧсна и государствосянь отсӧгыс ӧтарӧ содӧ. Сідз, таво республикаын та могысь урчитӧма вичмӧдны 1,2 миллиард шайт. А регионын видз-му овмӧсса министр Алексей Буткин сиис конкурсӧ пырӧдчысьяслы бура петкӧдчыны да шедӧдны медбур специалистъяслысь ним.
Ордйысьысьяс петкӧдлісны сям-кужӧмлунсӧ некымынлаын: республикаса племеннӧй удж кузя предприятиеын, агропромышленнӧй комплексын зільысьяслысь тӧдӧмлун кыпӧдан институтын, Сыктывкарын «Пригороднӧйлӧн» да Сёськаын «Сыктывдінса» овмӧслӧн фермаясын.
Торйӧн кӧ, мӧс лысьтысьяслы ковмис разьны-тэчны аппаратсӧ да, дерт, лысьтыны сюрукъясӧс. Линейнӧя лысьтысьӧмын вермысьясӧн шуисны «Вишерскӧй» СПК-ысь Анна Калистратоваӧс, «Северная Нива» ООО-ысь Леонид Доронинӧс да «Княжпогостса» овмӧсысь Ольга Курмановаӧс. Залын лысьтысьӧмын медбуръясӧн лоины «Нёбдінса» ООО-ысь Татьяна Габова, «Пригороднӧй» ООО-ысь Надежда Метелкина да «Сыктывдінса» ООО-ысь Ольга Корычева.
Тырсьӧдчысьяс пӧвстын вермӧмсӧ шедӧдісны Татьяна Архипова («Изваильскӧй-97» племхоз), Ирина Шешко («Ухта-97» племхоз) да Тамара Новосельская («Нёбдінса» ООО).
Зоотехник-селекционеръясысь медбуръясӧн шуисны Татьяна Чупроваӧс («Ухта-97» племхоз), Виктория Макароваӧс («Нёбдінса» ООО) да Дарья Владыкинаӧс («Межадорса» ООО).
Бур пӧрӧдаа скӧт петкӧдлан выставкаын вермысьясӧн лоины «Пригороднӧй», «Изваильскӧй-97» племхоз, «Межадорса» да «Ухта-97» племхоз ООО-яс. <>
Лист боксӧ дасьтіс Елена ПЛЕТЦЕР.
Снимокъясыс Коми Республикаса видз-му овмӧс министерствоысь.