Тулыс – сьӧкыд кад. Абу сы вӧсна, мый заводитчис гӧра-кӧдза, а сы понда, мый школаын триньӧбтіс бӧръя звӧнок, коді водзті шусьыліс “выпускнӧй балӧн”.
Гажӧдчӧны оз сӧмын 11 да 9 класс помалысьяс, тшӧтш и начальнӧй школа да детсад. Бать-мам пӧсь петмӧныс котралӧны-дасьтысьӧны-ньӧбасьӧны, чукӧртӧны сьӧм банкетасьны да велӧдысьлы либӧ воспитательлы козин вылӧ.
Ӧтияс заводитӧны чӧжны сьӧмсӧ велӧдчан во заводитчӧмсяньыс на, а мӧдъяс уджйӧзасьӧны банклысь.
Ӧти тӧдса ань висьтасис:
—Бать-мамлӧн медводдза собранньӧ вылын нин шуисны тыртчыны 20 сюрс шайтӧн мортсянь. Сэки нин тшӧкмунлі, но велӧдчан во помас тайӧ деньгаыс некымын сюрс вылӧ на содіс. ӧти-кӧ, арнас ми арталім сэкъя донъяснас, а мӧд-кӧ, колӧ на ӧд нывлы вӧчны парикмахерскӧйын причёска, макияж, ньӧбны мича платтьӧ, выль тупли. Да и ачым ог жӧ ротозей моз мун…
Парикмахерскӧйын кывлі шогӧ усьӧм мӧд мамлысь норасьӧмсӧ. Психолог пыдди сійӧ бӧрйӧма юрси шыльӧдысь-мольӧдысьӧс.
—Пиӧй помалӧ 9 класс. И выпускнӧй вылас классыс шуӧма нывъяслы локны кӧлысь дырся платтьӧӧн (свадебнӧй), зонъяслы фракӧн да бабочка галстукӧн. Мый морлаӧ! Кытчӧ сэсся челядь татшӧм паськӧмнас мунасныӧ Содтӧд колӧ на сьӧм велӧдысьяслы козин, “Выпускник” гижӧда лента, грамота, шаръяс мукӧд шылльӧ-мылльӧ вылас. Мед кӧть ӧдйӧджык нин помалас ассьыс школасӧ да мунас, гашкӧ, сэки дугдасны миянӧс “кодзнытӧ”…
Дерт, позьӧ на гӧгӧрвоны школа помалысьясӧс. Гажыд налы колӧ, но мед абу жӧ рӧзӧритчымӧнъя.
Но некыдз ог гӧгӧрво, мыйла колӧ выпускнӧйасьны начальнӧй школаын да детсадйынӧ! И ӧд налӧн балыс ньӧти абу донтӧмджык. Налы ӧд абу жӧ окота кольччыны гырысьджыкъясысь: гуляйтны, дак гуляйтны тшӧтш!
Водзті начальнӧй школа помалӧм бӧрын сӧмын дневникӧ пасйылісны: “вуджӧдӧма 5 классӧ”. А ӧні, видзӧдан да, татшӧм гижӧднад он мын!…
Да и детсадйын, помнита, сӧмын утренник котыртлісны, кӧні асьныс жӧ зонпосни бать-мам водзас сьылісны-йӧктісны. А ӧні быть колӧ ресторан-банкет. Быттьӧ он кӧ ресторан пыр мун, школаад оз босьтны.
Ӧткымын детсадйын бать-мам висьталӧм серти, веськӧдлысьясыс вывті нин горшӧсь. Юркарса ӧти садйын заведующӧйыс сетӧма бать-мамыслы список, мый колӧ школа петӧм водзас налы ньӧбны: занавес, креслӧ, телевизор… Ӧдвакӧ тайӧ эмбурыс дзолюклӧн ранецӧ тӧрас. Но сэсся пӧ корӧмсӧ киритӧма. Тыдалӧ, кодкӧ погона йӧзӧн повзьӧдӧма.
Колӧ пасйыны татшӧм жӧ “добровольно-принудительнӧй благотворительносьтыс” эм и садйӧ либӧ школаӧ пыригӧн. Унатор мый чукӧртӧны велӧдчанінӧ, урок-занятие вылын весиг оз ковмыв.
Странаын велӧдысьясӧс веськыда бать-мамлысь сьӧм дзайгӧмысь ӧлӧдӧм бӧрти, татшӧм мытшӧдыс эз быр, сӧмын сійӧс “ӧшӧдісны” сідз шусяна рӧдительскӧй комитетӧ пырысьяслӧн пельпом вылӧ.
Кыдзи и водзті, бать-мамлы ӧтарӧ лоӧ тыртчыны воспитатель либӧ велӧдысь лун, март 8 лун, Выль во, чужан лун кежлӧ козинъяс вылӧ. И абу катшасинысь букет мед ньӧбны, кӧть эськӧ сійӧ абу жӧ донтӧм. А спа-салонӧ либӧ зарни вылӧ сертификат, шоныд саридз дорӧ путёвка… Фантазияыд, майбыр, тырмӧ, мед сӧмын сьӧмыд вӧлі-а… Сэсся классын колӧ дзоньтасьны, принтерӧ кабала ньӧбны, велӧдысьлысь телефон мынтыны, мед эсэмэскаяс гижис либӧ звӧнитчис бать-мамлы, кутшӧмкӧ мог кӧ суас. Оз жӧ ӧд ас зепсьыс кут видзны. А он кӧ, шуам, окотит мукӧдыскӧд тыртчыны, кага вылад кутасны будзгылясьны, ӧтдортны.
Со и артмӧ, мед ветлыны детсадйӧ, велӧдчыны школаын да кыпыда найӧс помавны, сьӧмтӧ колӧ босьтчыны чӧжны кага чужӧмсяньыд нин.
Екатерина МАКАРОВА.
«Чушканзі» журналысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.
Фотоыс — 1obl.ru