«Коми му» газетлӧн воддза номерас гижлім, мый неважӧн Сыктывкарын связь, юӧр сетан технологияяс да СМИ-яс бӧрся видзӧдан службаӧн да Рытыв-Войвыв федеральнӧй кытшын Роскомнадзор управлениелӧн меставывса тэчасъясӧн веськӧдлысьяслӧн чукӧртчылӧм дырйи сёрни вӧлі тыр арлыдтӧмаясӧс ӧтуввезйын шогмытӧм юӧрысь дорйӧм йылысь. Окота юавны, а мый ті вӧчанныд ассьыныд челядьнытӧ интернетын татшӧм лёксьыс ӧлӧдӧм-видзӧм могысь?
Александра Ануфриева, кык челядя мам:
–А кыдзи найӧс и видзан ӧтуввезсьыс, сытӧг лун оз коль да? Дерт, ӧлӧда, мед быд нинӧм абусӧ оз видзӧдны-лыддьыны, тӧдтӧм йӧзкӧд оз варовитны.
Тимур Пантелеев, таксист:
–Менам пиӧй 12 арӧса. Быдта-велӧда гаджеттӧг. Телефоныс важ пӧлӧс, сӧмын звӧнитны либӧ эсэмэс гижны. Дузъялыштіс эськӧ, ёртъяслӧн пӧ… Мися, мукӧдыс вылӧ эн видзӧд.
И менам сійӧ унатор кужӧ, мужикӧн быдта да. Кӧть ӧні пармаӧ ӧтнассӧ коль, кужас овны, оз вош.
Екатерина Ливсон, кык челядя мам:
–Миян видзӧдтӧг телефон-планшетӧн вӧдитчыны ог лэдзӧй… Дерт, челядь ичӧтӧсь на, нёль да сизим арӧсаӧсь. Варя эськӧ ачыс кужас и гаджетнад вӧдитчыны, и ӧтуввезйӧ пыравны. Но видзӧдӧ сійӧс, мый ме либӧ батьыс бӧръям-вӧзъям.
Михаил Осипов, директор:
–Ми некыдз ог вермӧй дугӧдны челядьӧс интернетысь. Гортын кӧ ог лэдзӧй компьютерӧн вӧдитчыны, найӧ вермасны восьтыны ӧтуввезсӧ мобильник да смартфон пыр. Талун уналаын, тшӧтш и гырысь вузасян шӧринъясын, кинотеатрын, кафеын да и улич вылын эм восьса Wi-Fi.
Но интернетын эм бурыс и лёкыс. И надея кутны, мый челядь асьныс гӧгӧрвоасны, кӧні бурыс, а кӧні лёкыс, оз ков.
Сэк жӧ ӧнія кадӧ ӧтуввезтӧгыд некыдз. Та вӧсна колӧ велӧдны челядьнымӧс лючки сыӧн вӧдитчыны. Татӧг налы лоас олӧмас зэв сьӧкыд.
Данил Семёнов, шопер:
–Кыдзи кутан ӧтуввезйын лёксьыс кагатӧ? И сӧмын ӧмӧй интернетысь колӧ видзчысьны?
Со шуам, ті мунанныд сизим арӧса пиыдкӧд «Интим» лавка дорті. Но сійӧ сэтчӧ мыйлакӧ оз пыр, кӧть и гӧгӧрвоӧ нин, кутшӧм сяма тӧвар сэні вузалӧны.
Либӧ шкапад куйлӧ кутшӧмкӧ «Пӧсь стюардессаяс-2» верстьӧлы диск. Бур, кагаыд та йылысь оз тӧд, сы вӧсна мый дисксӧ ті дзебинныд, а шкапсӧ нӧшта на томналінныд.
И коймӧд серпас. Ті локтанныд дзолюкыдкӧд детсадйысь, а керка дорад сулю код мужичӧй матькӧ-пинясьӧ быдӧн вылӧ. И тіян кагукныд тӧдмалас выль кывъяс, кодъяслысь вежӧртассӧ оз на и гӧгӧрво.
Вот тайӧ и эм «интернет», кодысь колӧ видзчысьны.
Анастасия Кишиева, горт олысь:
–Кор ми мунам лавкаӧ, сьӧмтӧг немтор оз вузавны. Интернетлӧн лёкыс сыын, мый кага вермас сэтысь кыскыны кутшӧмкӧ видео – мультфильм, кино, музыка да сідз водзӧ. И тайӧс позьӧ вӧчны уджйӧзӧн, и бать-мам весьӧпӧрӧны, кор тӧдмалӧны, мыйта сьӧм колӧ вештыны.
Вермасны корны кагаӧс ыстыны кутшӧмкӧ sms и та дырйи мобильнӧй телефон пырыс кыскасны став сьӧмсӧ.
Та вӧсна бать-мамлы колӧ стрӧга видзӧдны, кутшӧм сайтъяс видзӧдӧны челядьныд.““
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.