Кызь во сайын искусство гимназияӧ «Горадзуль» этнокультура слёт вылӧ чукӧртчылісны республикаса школаясысь гырысь классъясын велӧдчысьяс. Сэки жӧ шуисны лэдзны альманах, а нимтісны петассӧ «Горадзулльӧн» жӧ.
Кольӧм пекничаӧ «горадзулькаяс» (тадзи ыдждӧдлӧны ёрта-ёртсӧ альманах дасьтысь том журналистъяс) нимӧдісны петас лӧсьӧдӧмсянь тшупӧда пас, казьтыштісны вӧвлӧмсӧ, тӧд вылас уськӧдісны медбур гижӧдъяс, весиг сорсьылӧмъяссӧ явитісны – а кыдз нӧ натӧг, кыккирудз пукалысьыд ӧд сӧмын некор оз сорсьыв.
Гимназияӧн вӧвлӧм веськӧдлысь Мария Вячеславовна Кузьбожева альманахлӧн медводдза воськовъяс йылысь висьталігӧн пасйис, кыдзи пӧ ми видзам бырӧмсьыс горадзуль дзоридзсӧ, сідзи жӧ колӧ видзны и ассьыным кывнымӧс, оласногнымӧс. Татшӧм мог и пуктӧма вӧлі петас водзын.
– А серпасаліс горадзуль-купальничасӧ Ирина Вадимовна Федосова, – висьталіс сійӧ. – И сэтшӧма сійӧ кажитчис гимназиясалы, мый мичмӧдӧ и концертасян залысь занавессӧ.
Альманах дасьтӧм вӧсна кывкутіс сэки роч кыв да литература велӧдысь Валентина Кимовна Торлопова. Школаын на пӧ стенгазетъяс лэдзлім да, пыр кӧсйи журналистӧн лоны. Но лои велӧдысьӧн, а гижны кӧсйӧмӧй пӧ эз чин, да окотапырысь босьтчи тайӧ уджас.
– Челядьлысь творчествосӧ сӧвмӧдны альманахыс вель ёна отсалӧ. Гимназистъяс гижӧны асланыс велӧдчӧм, олӧм йывсьыс, юксьӧны мӧвпъяснас, тӧждъяснас. Со Оля Баженова чужан кыв кӧсйӧ сӧвмӧдны, Катя Битнер аскиа лун йылысь мӧвпалӧ, Алина Игушевалӧн гижӧд нимыс – «Кыдзи лолыд кӧсйӧ», а Элина Пинягиналӧн – «Ловзьӧдам вичко», – висьталіс сійӧ. – Альманахыс лоис гимназиялӧн аслыссикас летописьӧн. Юбилей водзын босьтчи листавны важ номеръяссӧ да лыддьысьӧмсьыс эновтчыны эг и вермы. Син водзӧ сувтіс ставыс, мый йылысь сэні гижӧма.
Ольга Баженова да Мария Игушева помавлісны нин гимназиясӧ. Ӧтиыс ӧні велӧдӧ Сыктывкарса университетын, а мӧдыс велӧдчӧ сэні. Найӧ казьтыштісны «Горадзулльын» зільӧм йывсьыс. Ольга Николаевна висьталіс, кыдзи тӧдмасьӧма журналистика жанръясӧн, а Мария шуис, журналистлысь уджсӧ пӧ и ӧні вӧча студотрядъяслӧн пресс-службаын.
Людмила Ивановна Игушева могмӧдӧ альманахсӧ снимокъясӧн. И восьтіс гусятор, мый йылысь некод на эз тӧд. Петаслӧн кышӧдӧ коллаж дасьтігӧн пӧ фото вылас веськаліс ичӧтик-ичӧтик горадзуль, да некод сійӧс эз и казяв. Сылы сэсся медъёна и клопайтісны, ошкисны на, тайӧ номерыс пӧ раритетӧн лоас. А альманах вӧсна ӧнія кывкутысь Павел Иванович Симпелевлы «горадзулькаяс» козьналісны перӧа-блокнота журналистлысь серамбана серпас. Журналистыдлы пӧ сюсь синмаӧн да чош пеляӧн колӧ лоны…
«Горадзульсаяс» топыд йитӧд кутӧны коми газет-журнал редакцияяскӧд, кӧні тшӧкыда йӧзӧдӧны налысь гижӧдъяссӧ. Коми йӧзӧдчан керкаӧн веськӧдлысьлысь удж вӧчысь Галина Валерьяновна Макарова ошкис найӧс зільӧмысь да медся водзмӧстчысьяслы сетіс аттьӧалана гижӧдъяс. Дипломъяс босьтісны и «Горадзульлӧн» юбилейлы сиӧм конкурсын вермысьяс. Налӧн гижӧдъясыс петасны и республикаса коми газет-журнал лист бокъясын. <>
Павел Анохин.
Снимокъясыс Людмила Игушевалӧн.