Неважӧн Кулӧмдінса культура керкаын муніс зэв аслыспӧлӧс гаж – «Не детский рок-н-ролл». Тайӧ вӧлі «Платформа» студиялӧн отчётнӧй концерт.
Гажыс юргис часӧн-джынйӧн. Сьылан-ворсан кужӧмлун-енбинас видзӧдысьяскӧд юксисны челядь и верстьӧ войтыр.
Гаж котыртӧмын водзмӧстчысь Никита Рассыхаевкӧд и артмис дженьыдик сёрниным.
– Татшӧмсяма концертыс Кулӧмдінын вӧлі медводдзаысь, – заводитіс висьтасьӧмсӧ том морт. – Гажын ворсысь-сьылысьясыс – менам студияӧ котралысьяс. Корлім тшӧтш и миян районса бур тӧдсаясӧс, профессионалъясӧс, кодъяс эз нин ӧтчыдысь петкӧдчывны ыджыд сцена вылын.
Никита Рассыхаев чужӧма-быдмӧма Кулӧмдінын. Сэсся велӧдчӧма юралысьбердса искусствояс гимназияын, сы бӧрын босьтӧма тӧдӧмлун юркарса искусствояс колледжын, а нӧшта велӧдчӧма вузын – Тамбовса С.В. Рахманинов нима консерваторияын. И уна воӧн чӧжӧм став озырлуннас сійӧ бӧр локтӧма чужанінас.
Велӧдчӧм мортыд ӧдйӧ и аддзӧма асьсӧ. Культура керкасакӧд кутӧ топыд йитӧд, тшӧкыда петкӧдчӧ накӧд быдсикас гажын. Таысь кындзи во сайын восьтӧма и ассьыс «Платформа» студия, кӧні челядь куим арӧссянь велӧдчӧны ворсны барабанӧн, клавишаа инструментӧн, гитараӧн да бас-гитараӧн. Неважӧн студияын воссьӧма и «Скорочтение» нырвизь. Эмӧсь и водзӧ сӧвмӧм кузя мӧвпъяс.
– Студияын челядь окотапырысь ворсӧны-сьылӧны, – водзӧ сёрнитіс Никита. – Но тайӧ концерт кежлас сьӧкыдджыка дасьтысим. Босьтім эськӧ гырысьджыкӧс нин – 8 да ыджыдджык арлыда ныв-зонмӧс. Репетицияясным мунісны лун и вой, весиг шойччан лунъясӧ. А томуловлы коліс ӧд удитны и велӧдчыны да гортса удж вӧчны.
Ачым полыштікодь, мый огӧ вевъялӧй тыр-бура дасьтысьны концерт кежлас. Меным, котыртысьлы, коліс корсьны сценарий гижысьӧс, звукорежиссёрӧс, аранжировщикӧс, гаж нуӧдысьӧс, челядьӧс дасьтыны, репетиция нуӧдны…
Бур, ставыс артмис колана ног, гажыс муніс шыльыда-мольыда да зэв ёна кажитчис видзӧдысьяслы. Чайта, тайӧ концертыс шемӧсмӧдіс йӧзсӧ выльлуннас. И водзӧ вылӧ ковмас мыйкӧ мӧвпыштны, медым бара чуймӧдны волысьясӧс!
Культура керкалӧн сцена вывсянь ӧткодя юргисны классика и рок – став сьыланкывйыс вӧлі сьӧлӧмтӧ вӧрзьӧдана. И мый медтӧдчана – сьылысьяс уджалісны «фанератӧг», «ловйӧн»! Налы, коді ёна окотитіс видзӧдны, но волыны эз вермы, позис кывзыны сьыланкывъяссӧ ӧтуввезйын.
Сценарий вӧсна кывкутіс Ирина Гулько. Звукорежиссёръясӧн вӧліны Валерий Васильев да Владимир Козловец. Асланыс шензьӧдана сьыланкывъяснас ёна отсасисны Помӧсдінса енбиа зонъяс – Дмитрий Филиппов да сылӧн «Электрические ребята» ВИА, небось, кужисны кыпӧдны видзӧдысьлысь ловрусӧ.
Гажсӧ нуӧдіс «Июль» котырын сьылысь Сергей Ефремов. Сійӧ и ачыс сувтліс сьывны, и сэк жӧ кужӧмӧн да шмоньсорӧн сёрнитіс залын пукалысьяскӧд.
Сьылысь-ворсысьяскӧд тшӧтш окота тӧдмӧдыштны. Носимысь Анатолий Турьев петкӧдчис «Самая любимая женщина» сьыланкывйӧн. Помӧсдінысь Дмитрий Филиппов тӧдмӧдіс кывзысь-видзӧдысьясӧс «луп» стильӧн. Юлия Турьева электрогитараӧн ворсіс Моцартлысь «Турецкое рондо». Никита Иванушкин сольнӧя петкӧдчис акустическӧй гитараӧн.
Сцена вылӧ петалісны «Созвездие», «Фанта», «Фриссон» ВИА-яс. «Созвездие» ворсіс «Пираты Карибского моряысь» саундтрек.
Таысь кындзи сьылісны Людмила Яснецова, Анастасия Голайдо, Надежда Карпова, Ирина Гулько, Сергей Ефремов, Андрей Третьяков да «СоДа» дуэт. И ставныслы ворсісны «созвездиеса», матӧ 13 сьыланкыв.
Концертлы кывкӧртӧдсӧ вӧчис выль обработкаа «Маръямоль» сьыланкыв.
– Медся сьӧкыд вӧлі, дерт, «Созвездиесалы», – висьтасис Никита Рассыхаев. – Тайӧ налӧн ыджыд сцена вылын медводдза петкӧдчӧм. Та понда жӧ дыр и дасьтысим. Но ставыс бур, челядь молодечьяс! Чайта, водзӧ вылӧ томуловлӧн полӧмныс бырас, да найӧ окотапырысь петкӧдчасны районса быд гажын.
* * *
Кулӧмдінсаяслы татшӧмсяма концертыд лоӧма шензьӧданаторйӧн. Абу и дивӧ, ӧд сцена вывсянь сьылӧмаӧсь найӧ, кодъяс збыльвывса артистъяс нин, и найӧ, кодъяс сӧмын на вӧчӧны тайӧ воськовсӧ.
Да и ворсысьясыс – сӧмын на велӧдчысьяс, а кутшӧм бура да кужӧмӧн ёртасьӧмаӧсь ворсан инструментыскӧд, бӧрйӧмаӧсь колана шылад.
Ыджыд аттьӧ окота шуны Никита Рассыхаевлы, гажын водзмӧстчысьлы да сійӧс котыртысьлы, коді абу повзьӧма ырыштчыны ыджыдтор вылӧ да нимкодьӧдны-шензьӧдны ас сиктса войтырӧс. <>
Надежда Пунегова.
Снимокъясыс Кулӧмдінса культура керкалӧн сайтысь.