Вӧлінныд-ӧ коркӧ Зілӧн да Чераньлӧн кӧлысь вылын? Серамыс, чайта, уналӧн петіс татшӧм юалӧм вылад. Но татшӧм позянлуныс збыльысь вӧлі апрель 19 лунӧ юркарса коми культура шӧринӧ «З-з-з-і» радейтчана-криминальнӧй водевиль вылӧ волысьяслӧн.
Гажсӧ сиисны «Чушканзі» журналлӧн 65 тшупӧда паслы. Ок, и ёна серамсӧ петкӧдліс КВН-ын ворсысьяслӧн юркарса «Километръяс» котыр. Быдӧн кужис сьӧлӧмсяньыс пырӧдчыны аслас рольӧ. «Чушканзі» журналса главнӧй редактор Анжелика Елфимова ворсіс Зіӧс, код дорӧ корасьны волісны быдсяма гут-гагйыс. Роч ной гача Пытш, нильӧг Лёльӧ-бобӧ, жеб Геб, збой сьӧлӧма Ном, пӧрнӧй жӧник Лӧдз, вӧсни коска Кодзувкот, кыз рушкуа Черань, виж мундира Тӧрӧкан – коді сӧмын эз гажӧд зал тыр видзӧдысьясӧс. Дивӧ кӧть абу, но Зіыд бӧрйис верӧсӧн … Чераньӧс!
Зэв ыджыд аттьӧ артистъяслы, коми стендапер Виктория Агарковалы, тшӧтш и Коми Республикаса шылада-драмаа театрысь артистка Алёна Сметанина режиссёрлысь удж вӧчӧмысь да «Зарни туис» котырлы мичаа сьылӧмысь.
Аддзысьлытӧдз, коми шмонь радейтысьяс! <>
Екатерина Микушева.
Снимокъясыс Сыктывкарса коми культура шӧринысь.