Кольӧм шойччан лунӧ Кулӧмдін районса Пожӧгын, ок, бура гажӧдчисны! Тані муніс «Йиркап» тӧвся ворсӧм. Юбилейнӧй нин, шуны кӧ рочӧн.
Сиктса олысьяс виччысьӧмӧн виччысисны гӧсьтъяслысь волӧмсӧ, ӧд тӧдӧны, кутшӧм гажаа да шоныд сьӧлӧмкылӧмӧн колляласны тайӧ лунсӧ. Вобыд кежлӧ теш да серам, а тшӧтш и сиктса сёрни-басни.
«Йиркап» гаж йылысь и сёрнитім Кулӧмдін районса велӧдан управлениеын том йӧзлӧн политика юкӧнӧн веськӧдлысь Вероника Пантелеймоновна Савельевакӧд.
– «Йиркап» ордйысьӧм-ворсӧм лӧсьӧдӧм кузя медводдзаӧн ыззис Пожӧгса школаын коми кыв да литература велӧдысь, сиктса да районса олӧм сӧвмӧдӧм-бурмӧдӧмӧ ыджыд пай пуктысь Владимир Шомысов. Сылӧн водзмӧстчӧмӧн 2011 воын и гижӧма вӧлі колана проектсӧ да шуӧма, мый гажыс кутас мунны Пожӧгын. Тадзи и лоис татчӧс олысьяслӧн аслыссяма бренд, – паніс сёрнисӧ Вероника Пантелеймоновна. – Медводдзаысь районса котыръяс аддзысьлісны-ордйысисны 2012 вося тулысын. Быд командаын вӧлі нёль морт: кык ань да кык мужичӧй.
Ме и юалі, мися, мыйла быть нёль морт? Меным нимкодьпырысь и вочавидзисны: аньяслы пӧ мужичӧйястӧгыд некыдз, и сэк жӧ дзоля машинаӧ пӧ шопертӧгыс тӧрӧ сӧмын нёль морт. Сідзкӧ, ворсӧмӧ пырӧдчысьяслы оз ков корсьны автобус, а позьӧ пуксьыны-сӧвны ичӧт машинаӧ да тӧвзьыны коланаинӧдз.
– Тавося ордйысьӧмыс лоис тшупӧда пасаӧн, – водзӧ висьталіс Вероника Савельева. – Ассьыныс удаллунсӧ, вынсӧ, повтӧмлунсӧ, команда вӧсна кывкутны да ёрта-ёртлы отсасьны кужӧмсӧ петкӧдлыны волісны ӧкмыс котыр: Вӧльдінысь «Удал зон да эзысь нывъяс», Донысь «Ён Армия», Пожӧгдінысь «Зумыд ош», Помӧсдінысь «FLASH (ФЛЭШ)», Ручысь «Ёль», Ярашъюысь «Войвывса ёртъяс», Кулӧмдінысь «Убойная сила» да «Оптимисты» и Зимстанысь нӧшта ӧти «Оптимисты».
А вочаалісны ворсысьяссӧ няньӧн-солӧн Зарань да ачыс Йиркап. Старт водзын корисны котырсаӧс воськовт-ны бедь вомӧн, медым «вӧралысьяс» локтісны гортаныс озыр кыйдӧсӧн.
Таысь кындзи котырсаяслысь сьӧлӧмкылӧмсӧ кыпӧдісны-ышӧдісны Кулӧмдін районса да Пожӧгса администрацияясын да культура юкӧнын зільысьяс.
– Ворсысьяслы коліс мунны «Йиркап туйӧд» («Тропа Йиркапа»), викторинаын петкӧдлыны Россияса культура кузя тӧдӧмлун да пырӧдчыны мастер-классъясӧ.
Йиркаплысь туйсӧ дасьтіс быдса команда, – шуис ань. – Но шӧр суддянас вӧлі Виктор Бугримов, Кулӧмдінса спорт шӧринысь инструктор.
«Йиркап туйӧд» мунігкежлӧ котыръяслы быть коліс лӧсьӧдчыны водзвыв: кышавны шоныд паськӧм да кӧмавны гын сапӧг, команда вылӧ дасьтыны ӧти лямпа гоз, ноп, чер, истӧг, сюмӧд, компас, аптечка. Татӧг «вӧрса туйтӧ» он вен!
Водзті вӧралысьяс некымын тӧлысь чӧж овлісны-кыйсисны ягын, сяммисны пестыны бипур да пуны сёян. Тайӧ традиция вылас жӧ и мыджсьӧмаӧсь «Йиркап» конкурс дасьтысьяс да лӧсьӧдӧмаӧсь ӧнія «вӧралысьяслы» туй.
Ордйысьысьяслы ковмис мунны «нюрӧд» (чеччалісны тэчӧм брусокъяс вывті), пестыны бипур (став коланаыс сьӧрсьыс), розя ведраӧн кыскалісны пусьыны лым, сёян дасьтыны «кыйисны» пуантор (шыблалісны гын сапӧг да бедь), сэсся «кыйдӧссӧ» вайисны базаӧдз (чой паныд даддьӧн кыскалісны ёрта-ёртсӧ). Мытшӧдъяс вылӧ видзӧдтӧг кадыс кольӧма ӧдйӧ да зэв гажаа, торйӧн нин видзӧдысьяслы да котыръяс вӧсна «висьысьяслы».
Спорт юкӧн бӧрын вӧлӧма мӧд тшупӧд – ворсысьяс петкӧдлӧмаӧсь Россияса культура кузя тӧдӧмлун (тайӧ восӧ культуралы сиӧма да). Викторинасӧ дасьтӧма Пожӧгса библиотека-филиалӧн веськӧдлысь Полина Сенькина.
Збыльысь кӧ шуны, викторинаысь юалӧмъясыс меным кажитчисны сьӧкыдджыкӧн, но сэк жӧ пыдісянь мӧвпалӧмӧн позис босьтны содтӧд тӧдӧмлун. Тані вӧліны вичкояскӧд, нималана гижысь-композиторъяскӧд, серпасасян нырвизьяскӧд да культуракӧд топыда йитчӧм уна мукӧд юалӧм.
Медъёна меным сьӧлӧм вылӧ воис со татшӧм юалӧм. Дерт, дыркодь мӧвпалі, но сеті жӧ сэсся колана вочакывсӧ. Гашкӧ, и ті тӧданныд? «Кыдзи шусис чача, коді артмӧма ӧта-мӧдас тэчан некымын сідз шусяна предметысь? Медводдзасӧ вӧлі вӧчӧма 1890 воӧ, и тайӧ вӧлӧма сарапана да дзоридза чышъяна крестьянка, киас кутӧма сьӧд петук». Вочакывсӧ ог висьтав, тӧдмалӧй! А пожӧгсалы да ордйысьысьяслы – т-сс, энӧ чуйдӧй!
Ворсӧм-ордйысьӧмлӧн коймӧд юкӧныс вӧлӧма творчествоа. Быд окотитысьлы позьӧма пырӧдчыны мастер-классъясӧ да вӧчны сюмӧдысь вазочка, ичӧтик гын сапӧг-сувенир, видлыны выннысӧ коми йӧзкостса «Шег» да «Коми шашки» ворсӧмъясын.
Гаж дырйи уджалӧма и районса культура керкалӧн автоклуб. Тані жӧ позьӧма шонтысьны пӧсь тшайӧн да небыд пӧжасӧн, ньӧбны и сувениръяс.
И сідз, ордйысьӧмын быть эмӧсь вермысьяс. На йылысь тшӧтш пасйыштам. Коймӧд местасӧ шедӧдӧма Зимстанса «Оптимисты» котыр. Мӧдыс вичмӧма Кулӧмдінысь «Оптимисты» нима жӧ командалы. А вермысьнас лоӧма Помӧсдінса «FLASH (ФЛЭШ)» котыр. Кольӧмвося кубоксӧ найӧ жӧ босьтлӧмаӧсь. Молодечьяс!
Таысь кындзи ворсӧмас быд пырӧдчысьлы вичмӧма козин да аттьӧалана гижӧд.
* * *
– Окота аттьӧавны ставнысӧ, кодъяс пуктісны гаж котыртӧм-нуӧдӧмӧ ыджыд пай, – кывкӧрталіс Вероника Савельева. – Водзмӧстчысьястӧг да волонтёръястӧг, Кулӧмдін районса да Пожӧг сиктса администрацияясын, культура да велӧдан юкӧнъясын зільысьястӧг, спонсоръястӧг «Йиркапыд» эськӧ эз вӧв татшӧм нимкодьӧданаӧн.
Надежда Пунегова.
Снимокъясыс Кулӧмдін районса велӧдан управлениеысь том йӧзлӧн политика секторлӧн.