Спортыд морт олӧмын зэв тӧдчана. Радейтан кӧ волывлыны спортзалӧ, таысь водзӧсыс ыджыд. Медводз, дерт, дзоньвидзалунтӧ ёнмӧдан. Но, гашкӧ, кодлӧнкӧ та вылӧ кадыс оз вичмы, мукӧд помка на сюрас и. Век жӧ медшӧрыс – аслад кӧсйӧм. Тадзи жӧ чайтӧ Герман Снигирёв – кроссфит кузя Коми Республикаса чемпионатын вермысь.
Герман ичӧтсяньыс радейтӧма спорт. Видлӧма ассьыс вынсӧ уна сикасын: командаӧн ворсанын – футболын да баскетболын, и ӧткӧн петкӧдчылӧма быдсяма единоборствоын да пызанвывса теннисын. Штанга да гантель заводитӧма лэптавны 16 арӧссянь. А во вит сайын видлӧма асьсӧ кроссфитын, и сэтшӧма кажитчӧма тайӧ спорт сикасыс, мый сыысь дугӧдчынысӧ оз нин вермы.
–Кроссфит воӧ сьӧлӧм вылӧ сы понда, мый тані торйӧн нин колана зумыд дисциплина, а сідзжӧ гӧгӧрбок ставсӧ водзвыв артыштны, кыдзи мый вӧчны.
Тайӧ спорт сикассӧ пыртӧны медся сьӧкыдъяс лыдӧ, ӧд медым вӧчны уна пӧлӧс упражнение, колӧ, ок, ёна дасьтысьны. Сӧмын татшӧм ногӧн лоан вына, винёв да тэрыб.
Кӧсъян кӧ нимавны, колӧ лунысь-лун сӧвмӧдны асьтӧ. Да и быдлунъя олӧмад вын-эбӧсыд отсалӧ. Чеччалам, быдсяма мытшӧдсӧ венам, спорт снарядъяс местаысь местаӧ новлам – мыйсӧ сӧмын ог вӧчӧй.
Упражнениеыс 200 гӧгӧр сикас, и тренировкаясыс ёна торъялӧны. Та понда кроссфит уналы лӧсялӧ да кажитчӧ. Волӧй, асьныд видзӧдланныд, – окотапырысь висьтасьӧ Герман.
Том морт – юркарын «Стратег атлетик» нималана спортклубысь атлет, зільӧ пырӧдчыны уна сикас ордйысьӧмӧ, но майшасьӧ, мый оз тшӧкыда котыртлыны кроссфитын вермасьӧмсӧ.
Кольӧм во шедӧдӧма Коми Республикаса чемпионатын мӧд места. Тайӧ сетӧма позянлун петкӧдчыны Рытыв-Войвыв кытшса ордйысьӧмын, но доймӧм понда абу ветлӧма.
Водзмӧстчӧ и сьӧкыд атлетикаын, тані сылӧн мӧд верстьӧ разряд. Унаысь вермылӧма карса ордйысьӧмъясын.
Но ӧні пӧ некутшӧм вермасьӧм кежлӧ ог дасьтысь, тренерӧн уджала да, оз судзсьы кадыс пырӧдчыны кроссфит кузя республикаса ордйысьӧмӧ. А бура да тырвыйӧ дасьтысьтӧг петкӧдчыны оз окотит. Но, сідзкӧ, мӧдысь видлас вынсӧ, а ӧні быд лун волывлӧ радейтана спортзалӧ, медым водзӧ сӧвмыны-ёнмыны да тшӧтш и мукӧдӧс ышӧдны пырӧдчыны спортӧ. Та могысь и торъя йӧзлы фитнес-тренералӧ, и быдса котырлы кроссфитысь да бодибилдингысь занятиеяс нуӧдӧ.
–Воӧн-джынйӧн нин уджала тренерӧн. Кажитчӧ сёрнитны-аддзысьлыны йӧзкӧд, а тайӧ зэв колана, торйӧн нин кор ставӧн быттьӧ сибдӧмаӧсь соцсетьӧ да ӧтуввезйӧ. Быдӧнлӧн аслас помка, мыйла шыӧдчӧ тренер дорӧ. Кодлыкӧ окота вӧсньӧдчыны, а кодлыкӧ мӧдарӧ – «быдтыны» яйчиг (мышцы). Ставлы окота лоны мичаӧн, а кыдзи тайӧс вӧчны, оз быдӧн тӧд. Та понда и шыӧдчӧны профессионалъяс дорӧ. Нимкодь, кор отсалан кодлыкӧ збыльмӧдны кӧсйӧмсӧ. Йӧзсянь аттьӧыс меным медся дона. Сідзкӧ, тренерлӧн уджыс пыр лоӧ колана да пыдди пуктана, – водзӧ юксьӧ аслас мӧвпъясӧн Герман.
Сы серти, ӧнія кадӧ спортыд лоӧма аслыспӧлӧс трендӧн. Спортзалӧ волысьыс содӧ, кодсюрӧ и ас кежаныс тренируйтчӧны.
Бур, мый пыр унджыкӧн ёнмӧдӧны дзоньвидзалунсӧ, песӧны вир-яйсӧ. А такӧд тшӧтш и тренерлӧн уджыс нималӧ, пыр тӧдчанаджык лоӧ. Уна велӧдчанінын сетӧны буретш тайӧ специальносьтсӧ.
Герман помалӧма Москваын фитнес-школа да ӧні тренералӧ «Персональный тренер», «Дието-логия», «Инструктор тренажёрного зала» нырвизьясын.
– Спортзалын уджысь кындзи отсала торъя йӧзлы урчитны лӧсялана сёян-юанног, – шуӧ Герман. – Бура да колана ногӧн сёйӧм сайын – спортын, да и абу сӧмын таын, вермӧмлӧн 70-80 прӧчентыс. Верман лунтыръясӧн песны вир-яй, но кыдзсюрӧ да мыйсюрӧ кӧ сёян-юан, ставыс весьшӧрӧ лоӧ. Шуам, кӧсъян кӧ мынтӧдчыны ковтӧм сьӧктаысь, этшаджык колӧ сёйны углевода вӧлӧга – юмовтор, пӧжас, госа да жаритӧм сёян, тшӧтш и быдсяма соус. Сэк жӧ пызан вылад мед унджык вӧлі чери да град выв пуктас. А нӧшта – ёнджыка радейтӧй спорт. Чайта, абу сьӧкыд вежоннас куимысь ӧти час песны вир-яйнытӧ. Видлӧй, и ставыс артмас!
Герман Снигирёв вӧзйӧ:
–этшаджык сёйны сакар, кампет, варенньӧ да макарон, а сідзжӧ пӧжас, майонез, кетчуп да калбас;
–печенньӧ пыдди ньӧбны хлебцы да сы вылӧ нин мавтны, шуам, рысь (хлебцыыс кӧ юмов), сыр да пуӧм чипан яй (хлебцыыс кӧ сола);
–юны юммӧдтӧм 100 прӧчента сок;
–сёйны сыр, но мед эз вӧв 50 прӧчентысь госаджык;
–ӧрек сёйны 16 часӧдз да 50 граммысь оз унджык;
–чай-кофе юны сёйӧм бӧрын 30 минут мысти;
–дасьтыны сёян оливки выйӧн;
–яйтӧ жаритӧм дорысь бурджык пуны.
Екатерина Микушева.
Снимокъясыс Герман Снигирёвлӧн да ӧтуввезйысь.