Дмитрий Осипов зільӧ Коми Республикаса биысь видзчысян да войтырӧс доръян управлениеын, а стӧчджыка кӧ, тайӧ ведомствоас йӧзкӧд йитӧд кутан юкӧнын медшӧр специалистӧн. Том морт радейтӧ ассьыс профессиясӧ да бура тӧдӧ кусӧдчысьяслӧн уджлысь аслыспӧлӧслунсӧ, торйӧн кӧ, мый колӧ вӧчны виччысьтӧм лоӧмторъяс дырйи. А тайӧ зэв тӧдчана йӧзыслы.
Быдлунъя олӧмас ӧд быдсяма неминучаыс вермас суны. Биысь видзчысян да войтырӧс доръян управлениеын уджалысьяс тшӧкыда ветлӧны республикаса кар-районъясӧ, керкаысь керкаӧ пыралӧмӧн сёрнитӧны йӧзыскӧд да нуӧдӧны колана инструктаж. Шуам, тӧвнас, кор ёна колӧ ломтыны пач, биӧн кужтӧг вӧдитчӧмысь тшӧкыда овлӧ пӧжар. Сідзкӧ, асьным мыжаӧсь, кор татшӧм неминучаыс суӧ.
– Кор аддзысьлан да сёрнитан йӧзыскӧд син на син, найӧ бурджыка гӧгӧрвоӧны, кыдзи колӧ видзчысьны биысь. И ӧтуввезйын та йылысь юӧрсӧ йӧзӧдам. Зілям гижны, сёрнитны кокни кывйӧн, ог вӧдитчӧй тӧдтӧм терминъясӧн, мед воӧдчыны быдӧнлӧн вежӧрӧдз, – висьталӧ том морт.
Биысь видзчысян да войтырӧс доръян управлениеын зільысьяс и быдсяма чукӧртчылӧм-аддзысьлӧм-гажӧ пырӧдчӧны.
Тӧвнас лызьӧн котралӧны-ордйысьӧны, а гожӧмнас тшӧкыда уна сикас спортивнӧй вермасьӧм овлӧ. Шуам, кольӧм во татшӧмыс вӧлӧма Сыктывдін районса Нювчимын да Луздорса Абъячойын.
Гожӧмнас Дмитрий Вадимович уджалӧма челядьлӧн лагерын «Школа юного спасателя» сменаын, бӧрас вӧчалӧма снимокъяс да гижӧма, кыдз шойччӧмаӧсь томулов, кутшӧм тӧдӧмлун-сям босьтӧмаӧсь та дырйи.
Арнас кадетъяслӧн пожарно-спасательнӧй школаӧ волӧма.
–Менам мог – чукӧртны быдсикас татшӧм аддзысьлӧм йывсьыс юӧр, снимайтны да йӧзӧдны, – шуӧ том морт. – Тайӧ и кусӧдчысьяслӧн ордйысьӧм, и кадетъяслӧн выпускнӧй рыт, и «Школа юного спасателя», и миян управлениеӧ да йӧзӧс доръян да виччысьтӧм лоӧмторъяс музейӧ экскурсияӧн челядьлӧн волӧм да с.в.
Дмитрий Вадимович неуна висьтыштіс и ас йывсьыс. Чужӧма сійӧ Сыктывкарын. Бать-мамыс овлӧмаӧсь Сыктывдін районса Выльгортын да, зонка помалӧма сэтчӧс 1-ӧд номера школа. Сэсся пырӧма велӧдчыны Сыктывкарса канму университетӧ политология факультетӧ.
Армияын служитӧм бӧрас нин тӧдмалӧма, мый корсьӧны уджалысьӧс биысь видзчысян да войтырӧс доръян управлениеын йӧзкӧд йитӧд кутан юкӧнӧ. Окота лоӧма видлыны сэні ассьыс тӧдӧмлун-сямсӧ, и ӧні ньӧти оз жалит. Радейтана сылы тайӧ уджыс да.
Прӧст кадӧ Дмитрий ветлӧ тренажёрнӧй залӧ, окотапырысь лыддьысьӧ. Тайӧ пӧ сетӧ позянлун сӧвмыны. Школаас сійӧ абу вермӧма пыдісянь велӧдны коми кывсӧ: нёльӧд классӧдз сӧмын босьтӧма сы кузя тӧдӧмлунсӧ, да и университетас абу жӧ вӧлӧма та могысь позянлуныс. Та понда кольӧм во волывлӧма Коми Республикаса войтырлӧн Ёртасян керкаӧ коми кыв велӧдан курсъяс вылӧ. И таво кӧсйӧ водзӧ велӧдчыны. Сылы кажитчӧ пырӧдчыны и историяӧ. Кыкысь нин ветлӧма Ямалӧ археологическӧй экспедицияӧ.
– Медводдзаысь татшӧм экспедицияас вӧлі 2017 воын, а сэсся во мысти. Ветлім Салехард карсянь неылӧ. Миян могыс вӧлі туявны-корсьны IX-XIX нэмъясӧ овлӧм войвывса хантылысь гуасянінъяссӧ да колясъяссӧ. Унатор аддзим: и паськӧм-кӧлуй, и баситчанторъяс, и весиг мумия. Ставсӧ козьналім сэтчӧс музейлы, – висьталӧ сійӧ.
Том морт радейтӧ ветлывны кар-районӧ, аддзысьлыны республикаын олысьяскӧд. А сылӧн уджын тайӧ зэв колана. Сэсся и уналаӧ кӧ пӧ ветлан, унатор и аддзылан-кывлан. И быд пӧрйӧ вежӧрад мыйкӧ бурыс да тӧдчанаыс кольӧ.
Екатерина Микушева.
Снимокъясыс Дмитрий Осиповлӧн.