–Студенталӧм кадколастыд олӧмад зэв тӧдчана. Чайта да, буретш сэки гӧгӧрвоан, мый тэныд кажитчӧ, мый оз, тӧдмалан асьтӧ, йӧзсӧ… Унаторйӧ велалан, – юксис мӧвпъяснас Василий Габов. – Школаын велӧдчигӧн, бать-мамкӧд олігӧн тэ асьтӧ быттьӧ кутан, а студенталігӧн верман рыт сёрӧдз гуляйтны, лыддьысьны, видзӧдны кино.
Василий Кӧрткерӧс районса Ӧзын грездысь. Велӧдчӧ историкӧ Сыктывкарса госуниверситетын.
–Ӧні коймӧд курсын нин. Неважӧн тупким витӧд сессия, – висьтасис зон. – Тӧдӧмлун босьтӧм кындзи ӧнія студентъяслӧн позянлуныс зэв уна, и та боксянь зэв ёна отсасьӧ миян вуз. Эм кӧ кутшӧмкӧ мӧвп-вӧзйӧм – шыӧдчан СГУ-ысь специалистъяс дорӧ, дасьтан план, и тэныд отсаласны аддзыны сьӧм, места, команда. Ӧні збыльысь став туйыс восьса!
Том морт зіля пырӧдчӧ «Народнӧй фронт» ӧтмунӧмын том йӧзлӧн («Молодёжка ОНФ») котырӧ.
–Зілям йӧзлы мыйкӧ бурӧс вӧчны, – водзӧ нуӧдӧ сёрнисӧ Василий. – Миян эмӧсь торъя проектъяс. Шуам, «Тренер» серти том йӧз босьтчӧны отсавны тыр арлыдтӧмъяслӧн делӧяс кузя учёт вылын сулалысь челядьлы, отсалӧны мын-тӧдчыны «вильыд туйсьыс».
Котыртлам и акцияяс. Шуам, кольӧм во март 8 лунӧ юркарын козьналім дзоридзьяс тайӧ праздник лунӧ уджалысь нывъяслы. Таттян лун кежлӧ тшӧтш жӧ котыртлім гаж: студентъяслы ывлаын нуӧдім ворсӧм, а сэсся козьналім конькиӧн иславны билет. Томуловлӧн лун кежлӧ эмӧсь жӧ акцияяс. Кольӧм во Киров паркын нуӧдім том фотографъяслысь выставка. Унаӧн аддзылісны мича снимокъяссӧ, йӧзыслы кажитчис.
Отсалам пӧртны олӧмӧ и «Сӧстӧм Арктика» уджтас. Кольӧм во октябрын Коми Республикаысь нёльӧн да Москваысь та мындаӧн жӧ ветлім Усинскӧ. Сэні вежон весалім-идралім ключ гӧгӧр, кытчӧ йӧзыс шыблалӧны вӧлӧм важ шина-покрышка. Такӧд тшӧтш мичмӧдім «Войвыв кытш» стела: дзимлялім гӧгӧр, дзоньталім-мавтім жугласьӧминсӧ.
Пырӧдчӧ Василий и «Мы вместе» акцияӧ. Тайӧ уджтасыс пан-сьыліс пандемия заводитчигӧн на: том йӧз отсасисны олӧмаяслы да налы, кодъяслы эз позь петавны уна йӧзаинӧ.
–Акцияыс век на мунӧ, век на отсасям да и водзӧ кутам. Коркӧ отсӧгыс колӧ унджык, коркӧ этша-джык. Со ӧні унаӧн висьмалӧны, а сідзкӧ, и йӧзкӧд уджыс миян бара содӧ, – висьтасис Василий Габов. – Уджтасӧ вермас пырӧдчыны быдӧн: колӧ пасйысьны сайтын, неуна ве-лӧдыштасны, а сэсся электроннӧй поштаӧ кутасны ыставны юӧр, кӧні, кодлы да кутшӧм отсӧг колӧ. И мунан отсасьны.
Кор миян дорӧ шыӧдчӧны, ньӧбам колана сёян-лекарство да ваям пӧль-пӧчлы. Эз на вӧвлы сэтшӧмыс, медым эг отсалӧй. Асьным кӧ ог удитӧй, корсям коді вермас.
Василий оз шу асьсӧ волонтёрӧн – тайӧ кывйыс пӧ абу миян да, оз во сьӧлӧм вылӧ. Роч ногӧн кӧ, доброволеч пӧ ме.
Юася, мый том мортӧс ышӧдӧ пырӧдчыны тайӧ уджтасас.
–Вӧча, мый сьӧлӧмӧй корӧ-тшӧктӧ, – вочавидзис сійӧ. – Нимкодь гӧгӧрвоны, мый ассьыд кадтӧ бур вылӧ видзан. И лов вылад сэтшӧм долыд, кор мортыс нюмъялӧ да радлӧ миянӧс аддзигӧн, кор воча дзоньвидзалун сиӧ. Быттьӧ сэсся нинӧм оз и ков, мед сӧмын аддзыны йӧзыслысь тайӧ сьӧкыд кадас долыд синсӧ.
Таысь кындзи Василий Габов пырӧдчӧ и Коми Госсӧвет бердын томуловлӧн парламентӧ.
–Регыд нин лоӧ во, кыдзи миянӧс бӧрйисны. Республикаысь тайӧ парламентас пырӧ 27 морт, – юӧртіс зон. – Мый тані вӧчам? Дасьтам проектъяс, донъялам томуловлӧн политикакӧд йитчӧм оланпасъяс, мӧвпалам, кыдзи найӧс позьӧ вежны-бурмӧдны. Шуам, кыдзи эськӧ позяс томъяслы ипотека кокниджыка босьтны, либӧ кутшӧм отсӧг позьӧ сетны ас вылас том уджалысьяслы. Миян эм некымын комитет, и быдӧн зільӧ аслас нырвизьын.
* * *
Юася Василийлысь, овлӧ-ӧ сылӧн прӧст кадыс.
–Прӧст кадыс тырмымӧн, – вочавидзис том морт. – И сериал видзӧдны, и небӧг лыддьыны, и ёртъяскӧд аддзысьлыны удита. Тшӧтш и соцсетьысь ог эновтчы: овлӧ, юрӧс шойччӧдігмоз заводита кутшӧмкӧ видео видзӧдны, сэсся казяла, мый видеоыс – велӧдана. Артмӧ, шойччигмоз тшӧтш и велӧдчан (нюммуніс).
А неважӧн зон заводитӧма велӧдны корея кыв:
–10-11 классъясын нывъёртӧй «висьмӧдіс» менӧ кореяса сериалъясӧн. Тасянь ставыс и заводитчис. Водзті китайса аниме на ёна видзӧді. Ог тӧд, мыйла татшӧма меным кажитчӧ асыввыв культураыс. Таво и курсӧвӧй уджӧс гижа Корея йылысь. Мӧд во дипломӧс такӧд жӧ йита. Меным, кыдз историклы, тайӧ зэв интереснӧ. А медым тырвыйӧ гӧгӧрвоны культурасӧ, чайта, быть колӧ тӧдны кывсӧ. Коми кыв йылысь тадзи жӧ верма шуны. Кӧсъян кӧ йӧзсӧ гӧгӧрвоны – медводз велӧд налысь кывсӧ.
Ирина Терентьева.
Снимокъясыс Василий Габовлӧн гортса архивысь да «ВКонтактеын»
«Молодёжка ОНФ» котырысь.